在IG上重遇你: 42（大結局）
第四十二章
為左避免尷尬，我一支箭衝左入洗手間。我坐左係到，腦裡面不停重覆自己嘅幻想，務求令呢條友「死無全屍」。
突然，我聽到外面有把好熟悉嘅聲音，我偷偷地從門罅望出去，係啱啱個男仔，佢好似傾緊電話。
「我好似撞到你個fd⋯⋯你今日約左佢？⋯⋯唔好再諗啦，聽表哥講⋯⋯」我隱隱約約聽到佢提起Bobo個名，不過我唔肯定係咪同一個人。
到我出返黎嘅時候，已經唔見左佢地。咁好嘅機會又一個錯過左，不過一陣間都可以同bobo講姐。我望一望時間，原來已經五點左右，即刻執嘢走人。「唔知會唔會遲到呢？」望住成條街一架的士都冇，真係屌左出聲。
隔左陣電話就響起，係Bobo打嚟添！我即刻接聽，第一時間講：「唔好意思呀！我可能遲少少先到。」
「傻佬，你再唔行返上行人路就真係唔洗嚟啦。」我俾佢呢句說話搞到一頭霧水，「你點知我企左係馬路㗎？」
突然有人一下啪落嚟，嚇到我差啲跌左部電話。「你點解會係度嘅？」
「我係你身上裝左GPS，你信唔信呀？」佢望住我個呆樣，「講下笑啫，你唔好咁認真啦！」
好快我地行到今日食晚飯嘅餐廳，竟然係一間位於小巷嘅拉麵店。成間舖十足日本嘅拉麵屋，好彩今日唔算好多人，等左一陣就有位。一坐底，身旁嘅女人就開口：「靚女，帶新朋友仔喎！係咪照舊呀？」
我露出一個疑惑嘅樣子，Bobo笑左笑：「係呀，老闆娘。」
「靚仔，第一次嚟一定要試下我地嘅招牌拉麵！」老闆娘用一個誠懇嘅眼神推薦俾我，「咁就要一個招牌啦！」
「唔好睇少呢間拉麵，食過一次保證你會上癮。」Bobo讚到天上有地下無。「咁就真係要試清楚，係咪真係咁好食先？」
等左陣我地叫嘅拉麵先後到齊，我都急不及待想試下係咪真係咁好食。「記住飲啖湯，先再食麵。記得記得，一定要！」睇唔出呢間細細嘅拉麵店，味道媲美啲出名嘅拉麵店。轉眼間，拉麵同湯汁已經一掃而空。
「係咪冇介紹錯呢？真係一試難忘。」Bobo露出一個得戚嘅樣子，十足小朋友爭住做第一。
我點頭表示同意，「睇唔出你都幾識搵食喎，咁隱閉都搵到。」Bobo伸出脷做鬼臉，「講到我好似淨係識食垃圾食物，今次係咪大跌眼鏡？」
我冇回應，因為我諗緊應該幾時送條手鏈俾Bobo。但係呢度送又好似好奇怪，一陣又唔知Bobo想去邊，真係好苦惱！
「Steven，Steven，做咩呆左呀？」Bobo嘅聲音拉左我返嚟。「冇事呀，啱啱諗緊嘢。你問我咩呀？」
「呵！肯定係唔知諗緊邊個女仔啦？係咪Queenie呀？佢都幾靚女呀…」Bobo講嘅嘢令我有少少不知所措，我竟然衝口而出講左呢句說話，「邊有諗緊第二個女仔，淨係諗住你啫！」
呢一刻，個時間好似靜止左，我同Bobo互相對望左一陣，即刻轉移視線周圍望。我內心真係十萬個尷尬，點解我會講左出口㗎？
好彩呢個時候老闆娘行出嚟，「我地嘅招牌係咪好好食呢？如果唔好食都可以講㗎。」
「好食呀！你睇我地食到咁乾淨就知唔夠喉啦！」
「哎呀！真係好識講嘢啫。平時肯定好叻氹你。」老闆娘瞇瞇眼望住Bobo。「唔知呢，可能好叻氹其他女仔。」
係一片尷尬嘅氣氛下，我選擇沉默應對一切，但個心就跳到好快。
「不如一陣間，去海旁行下。」一踏出門口，我鼓起左勇氣問。
Bobo諗左諗，「你冇約其他人咩？我冇所謂呀！」
點解Bobo咁奇怪嘅？我一邊行一邊諗，究竟係咪我又講錯嘢？
今晚嘅海旁都唔知咩事，個個都成雙成對，又拖晒手，又攬埋一齊。我同Bobo兩個人尷尷尬尬沿著海旁行，雖然有好多嘢想講，但Bobo好似專登行好快，差啲跟唔上佢嘅腳步。
突然，一班玩緊滑板嘅年輕人衝緊過嚟。我本能反應就一手拉住Bobo，點知Bobo失平衡撞左入我嘅胸膛。呢一刻，我竟然不自覺地攬住Bobo，但好快我反應過來。
「你做咩抽我水？你個鹹濕仔！」Bobo假裝自己好嬲咁，我即刻解釋：「我⋯我…我冇心㗎！我見⋯成班人⋯」
Bobo笑到見牙唔見眼：「你睇下你，講下笑又咁認真，仲要口窒窒。」
「我唔想俾你唔誤會，唔想影響形象。」我嘅心情有少少激動。
「你以為我唔清楚你為人咩？」Bobo看著一望無際的大海，細細聲講。唔知點解我感覺呢一刻係適當嘅時候送條手鏈，我係背囊攞左個小盒子，遞左俾Bobo。「本來呢份禮物係諗住星期三送，不過你臨時有事做，結果遞拖到依家。」
Bobo打開一睇，個樣有少少驚喜，「你點知我鐘意呢條手鏈，仲要刻左我個名！」
「其實呢⋯我仲有啲嘢想講」我深呼吸一下，等自己可以冷靜講，「由第一次見返你，中間經歷左咁多事，我就⋯就好想同你講，我⋯好⋯鐘意⋯你！可唔可以做我女朋友呀？」
我唔敢望向Bobo，唔想俾佢望到我塊面紅到好似蘋果。隔左一陣，我見Bobo好似冇咩反應，於是睜開眼望下。結果，Bobo竟然錫左我一啖。我俾呢個突如其來嘅吻嚇親，我向後退左兩步，「咁係咩意思？」
Bobo擰轉身，「你自己估下囉，傻佬！」
「係咪代表你應承我呀？」我開心到即刻從後攬住佢，「我幾驚你會拒絕我，我好怕你同我講你有男朋友。」
「其實好耐好耐之前，我已經鍾意左你。」Bobo突然提起，「所以當我見到你同Queenie嘅時候，我好怕你地已經一齊左。」
「但早幾日我見到你同個男仔一齊行，嗰個又係邊位呀？」
「你講緊嗰位係我表哥，你唔係誤會佢係我男朋友掛？」我即時擰頭，「邊有咁諗呢，哈哈哈！」
我唔再停留係呢個話題上，一下拖住Bobo，「我終於可以光明正大拖你隻手！」我地慢慢沿著海旁，享受下呢個寧靜嘅二人時光。