我是一名SEN的中學生: 第二十九章:悠長假期2-少男心事台

晚上十時，我乘坐的士到達了淘大花園的地下，只見已經有二十多人在龍頭排隊，準備拿下明天早上的報名頭籌。 

「補習姐，使唔使咁誇張呀？」我問輝仔。

 「你有所不知啦，我地排果個中文天王既live班好搶手㗎，我地4個人一齊同一班就要早啲黎報，而且多人同行有折扣喎！」

其實我也略看過這一位天王的筆記，的確比學校中文老師散亂的筆記文集整齊多了。然而，他真的教授得好嗎？

傳單聲稱萬人之師，五星星率全港最高，吸引了萬千在公開試中感到迷惘的學生，猶如汪洋中照亮周圍的燈塔，給了他們一個較為明顯的方向。





然而，我認為這一名名師是在他所有的廣告中下了降頭，以吸引學生報他的班。

我和輝仔盤坐在地上，各自做自己的事以打發時間， 我玩著我的手提遊戲機，他閱讀著自己從圖書館借來的愛情小說。

兩小時後，我也再按奈不了， 決定找輝仔談一談有關我今天上課所發生的事。

輝仔聽了我今天的狀況，首先是笑了一笑，然後說:「呢個唔關你係過度活躍症嘅患者事，基本上所有冇拍過拖嘅男仔都會發生同樣嘅狀況，建議你就唔好不斷搵悠悠撩佢講嘢，等呢件事化淡一啲再算，我唔想你變成好似之前喺網絡上面嗰一個痴漢。」

「有冇咁誇張呢？」





「你都知自己可以做啲過份同衝動嘅事啦，發生呢啲事真係唔出奇㗎！追女仔其實係一個心理遊戲，老實咁講唔係個個都玩得起。」

「咁即係我要放棄追求悠悠？」

「咁又唔係，不過你自問係咪好了解佢？ 咁你知唔知道佢當你係啲乜嘢關係？ 朋友？兄弟？定真係暗戀對象？」

「佢試過呀我個頭瞓覺喎，同埋食同一杯雪糕，同埋試過單獨出街。。。'」

「其實呢啲嘢好多比較friend嘅男女仔都會咁做，咁唔代表佢哋係互相愛慕對方㗎喎~」





「咁應該點先知道佢真係鍾意我？」

「你可以試下問一啲只係屬於你嘅答案嘅問題，例如可以兜個圈試下問佢平時佢自己對你咁好，有寫曬notice提醒你。。其實有冇同第二啲男仔咁試過相處？ 我遲啲再教你啦！」

「我知道啦，咁靠曬你喇！」

「又唔好咁講，你自己所付出嘅勇氣都好重要㗎！ 同埋你都要畀佢一個感覺你係可靠同埋安全感比較高先ok㗎！」

「呢個有啲難,因為不嬲都係佢提醒我生活上嘅大小事。。。」

「咁就要增值下自己啦！同埋唔好再要人擔心你咁多~」

「知道!」
 
「7月尾我喺長洲嗰間屋啲租客咁啱去咗外國旅行騰空咗成間屋出嚟，我哋4個去玩啦， 順便你可以同悠悠嘅關係再近啲，了解佢多啲，畀多啲好印象佢，咁咪順利啲囉！」





「好呀！」

接著，我們談論了學校同學老師的是非，最近的劇集劇情，以及遊戲機新遊戲的體驗，談論了接近六小時，基本上無所不談，很快便天亮了。 

九時的時候，我們也成功報了心儀的補習班，然後拖著疲累的身軀回到學校繼續補課， 順便也邀請了Tiffany和悠悠一起在7月尾到長洲輝仔的村屋度假，她們也答應了。

希望可以跟悠悠的關係拉近吧！

Background Sound:
https://www.youtube.com/watch?v=eRK2CklckF8