【第一話】
 
兩日前,我同許雯參加划艇俱樂部活動,乘坐同一艘獨木舟同一班同學仔從深圳鹽田西湧灣出海。其間遇到風浪,好多同學都跌左落水,之後風浪將我地沖散哂,混亂之中,唔熟水性嘅許雯用力捉緊我隻手,我地兩個一直被風浪沖到唔知去咗邊到,喺海到漂流接近六小時,最後見到有個小島,我地博哂命咁游過去,最後安全上岸。
 
由於今次嘅活動屬於水上活動,為咗唔想比手機整濕,我地都無人帶手機出海,所以我地都唔知點樣向外求救,我地兩個一直坐喺岸邊等人救,而我目前最擔心嘅係-糧食。
 
『阿峰,我好頭暈,好辛苦。』許雯低著頭,雙眼發呆,皮膚本來已經好白嘅佢,依家顯得更白。兩日無食過野,無飲過水,許雯嘅身體已經開始支持唔住而變得好虛弱,加上驚慌不安嘅情緒一直糾纏住佢,許雯嘅精神都開始崩潰。
 
『無事嘅,好快就有人嚟救我地,依到唔係啲咩外國大荒島,我估應該係香港同深圳之間範圍嘅小島,我相信要搵我地其實唔難,所以我地一定要頂住。』我試圖安慰住許雯,身為男人喺依個時侯應該要冷靜,唔可以比許雯見到我不安嘅情緒,如果我亂嘅話,許雯只會更加亂。
 




『嗯......』許雯閉上眼,雙手攬住雙腳,低著頭睡了。兩日內許雯已經訓咗好多次,有時我擔心佢有一日訓咗就唔會再醒返。
 
***********************************************************************************
 
諗返起喺荒島嘅第一晚好難頂,氣溫跌得好快,變得好凍,我同許雯都只係著住潛水服,同埋一件救生衣,幾乎完全唔保暖,我地又唔識生火,唯有攬住大家,借用身體取暖先勉強捱過。
 
一般人如果知道一男一女流落荒島,腦海可能會諗到啲咸濕野,但依一刻既我完全無諗過依啲,我腦海只係諗點樣先可以快啲比人搵到,因為我唔想 咁快就死住,我只係一個二十二歲嘅後生仔,大學都未讀完,仲有好多野都未去試,如果咁就死左嘅話,我一定唔甘心。
 
喺荒島嘅第二日,為咗了解一下荒島嘅環境,同埋睇下有冇食物,我就喺島到周圍睇下有冇發現,而許雯就留喺岸到,廢事有人經過發現唔到有人。
 




可惜我幾乎咩都搵唔到,依個小島根本咩都無,而且條路又難行,就咁睇個島只有一片片草叢,就好似咩都無咁,我仲期望會有啲水果可以食下,最後我只係拎左幾塊大葉,諗住今晚凍個陣可以比許雯包住無咁凍。
 
返返岸到,許雯見我手上只係幾塊大葉,不禁有點失望:『咩都搵唔到丫?』
 
我無回應,只係點了頭,實在唔想講一啲負面既說話令到許雯擔心。
 
到左下午,太陽好猛,我同許雯不斷吞口水,我地實在太口渴,面對住眼前一片大海,卻連一淡水都無得飲。
 
『好掛住屋企人,好掛住屋企張床,我地會唔會死架?』許雯問。
 




『一定唔會,已經過咗一日,我相信好快就有人嚟救我地。』
 
『你依句說話已經講咗好多次。』
 
『你依個問題都已經問咗好多次。』
 
許雯見我咁串,笑住用手輕輕打我一下。
 
『係呢,你有冇睇過劫後重生? 湯漢斯做個套。』我想轉一轉話題,等許雯唔好再專注喺有冇人救嘅問題上面。
 
『嗯,我有睇呀! 明珠台成日都重播。』
 
『人地流落荒島都可以捱咁多年,我地捱幾日一定得。』
 
『哈.....但人地個島有好多資源呢。』說罷,許雯望一望身後嘅一片片既小草叢同附近好多比較特別嘅紅色岩石,然後說:『但我地就咩都無,點同。』




 
『嗯。』我無言以對。
 
兩日後嘅今日。
 
『已經過左兩日,我好辛苦......』許雯訓喺地上,雙眼快要撐不開,我見到佢咁樣,我都焦急了。
 
我拎住幾塊大葉喺許雯身旁遮蔭同撥涼,希望許雯感覺可以好返少少。
 
『對唔住......我好似變左個負累咁,令到你咁辛苦。』許雯似乎感到好抱歉。
 
『傻啦,話哂咁多年朋友,依啲野邊有得計,無話邊個負唔負累嘅,以前讀中學嗰陣,喺功課上你都幫我唔少架,依家就當我報恩喇!』
 
許雯聽到我咁講,用微笑嚟答謝,大概佢唔想再講野。
 




過左幾粒鐘,我望一望手錶,心諗:『再係咁落去,許雯一定捱唔住。』
 
『我再睇下附近仲有冇食物,你喺到等我,好嗎?』我問。
 
許雯點了頭。
 
我試圖再行上啲個島,行入小草叢,不斷搵下有冇水果,或者蘑菇都好,咩都好,有野入口就得。
 
突然,我聽到陣陣類似引擎嘅聲音,而且愈黎愈近,唔通有人黎救我地?
 
我即刻跑返轉頭,本來已經好累嘅我,依一刻突然體力充沛,就好似喺沙漠中見到綠洲一樣咁開心。
 
當我行出小草叢時,遠處見到一架快艇,船上有個中年男人慢慢走上岸,向住許雯方向行去,而許雯都見到有人嚟救我地,都撐起個身體慢慢等個男人黎。
 
『真係有人黎救我地!』我即刻跑去許雯到。




 
就係依個時侯,嗰個中年男人行到許雯面前,好似講左幾句說話。突然,個個中年男人喺袋到拎出一支槍,向住許雯連開數槍。
 
『呯! 呯 ! 呯 !』
 
許雯應聲倒下。我驚訝地望住個中年男人,對方亦都發現咗我,我即刻轉身衝入小草叢,不斷跑,不斷跑,腦海不斷重播岩岩許雯被人殺嘅片段......殺人......殺人.....殺人......許雯比人殺咗!!
 
我跑到去一個生長得比較密同高嘅 草叢到收埋自己,成個環境都好寂靜,我只係聽到自己嘅 喘氣聲同急促嘅 心跳聲。
 
『咻咻.....咻咻......咻咻....咻咻』
 
唔可以再喘氣,收聲呀,收聲呀! 我用力禁住自己把口,絕對唔可以發出任何聲音,好驚個中年男人會聽到而發現我。點解個中年男人會走嚟殺我地? 許雯係佢既仇家? 但點解突登走黎個島殺許雯?
 
我要冷靜,我慢慢放開手,吸一吸氣,我要好好諗下成件事,如果假設許雯係個中年男人嘅仇人,點解許雯見到佢都無咩反應,如果真係仇人既話,許雯見到佢嚟應該即時逃走,但許雯無咁做,好似真係等佢救嘅反應咁,姐係許雯係唔識佢?
 




但唔識佢又做咩會殺許雯,而且個男人似乎有備而來,好似一早知道我地係到咁,點解會咁!個男人究竟係咩人嚟架!
 
我慢慢從草叢中伸個頭上去望下,似乎無咩動靜,個中年男人無追上嚟? 佢個目標只係許雯? 都係睇定口啲,等到夜晚先再出去睇下。
 
『唔知許雯有冇事呢......呀......我真傻,如果人地有心殺佢,佢點會無事。激氣......』
 
過咗一陣,我開始感到一陣睡意,實在太累了。
 
『吱吱.....』
 
我聽到有人踩踏樹葉嘅聲音,精神再一次緊張起嚟,而且聲音愈嚟愈近,屌! 原來佢仲佢搵緊我!
 
突然,有人從後將我扯出小草叢,一野將我撻落地下,個中年男人見到我後,面帶不悅嘅神情說:『屌佢老味,竟然唔同我講仲有人喺到。』
 
『嗚呀!』我用盡所有嘅力,雙手雙腳不斷掙扎拍打個中年男人。但個中年男人一手將我半邊臉壓喺地下,然後用槍指住我說:『細路!你見到我個樣,我一定要殺咗你,就當你唔好彩喇!』
 
我嚇得連忙大叫:『唔好呀! 唔好呀!求下你放開我呀!』
 
我愈叫,個中年男人反而壓得更加大力,佢繼續說:『橫掂你遲早都比自己殺,倒不如早啲死係我手上好過喇!』
 
 
遲早都比自己殺? 佢講緊咩 ? 依一刻唔到我諗其他野,我知道我下一秒就會死,我絕對唔可以死,我一野大大力捏住佢個下體,有咁大力得咁大力,個中年男人痛到大叫,本能反應即時雙手禁住下體,我起身執起一舊石頭不斷扑佢個頭,係咁扑,係咁扑,我好似癲咗一樣,係咁扑落去,扑到我滿臉都係佢嘅血,直至扑到對方個頭好似變咗一Pat血漿嘅時侯,我先回一回神,坐低喺到,呆呆望住眼前條屍,突然眼前一黑,暈倒了。

【第一話完】
 
已有 0 人追稿