【第七話】
 
當我睇到依個標題既時侯,我腦海不自覺地將有兩個許雯既事同標題聯繫起黎,我即刻禁入個Post睇下,見到有個巴打打左幾段說話
 
" 其實都唔係最近既事,大約係七日前,我係旺角一間貢茶店返工個陣,我見到遠處有一個人一直企係到望住我,本來都無咩留意佢,但我慢慢發覺佢個樣好似我,我以為我有幻覺......但我問其他同事見唔見到果個人,佢地都見到......唉 佢企係到都無所謂,至弊就係我返工放工佢都係後面跟住我.....件事令我好困擾 "
當我見到果位巴打形容對方個樣好似佢既時侯,我又諗起一個大左既許雯。我望一望開Post時間,顯示10/25/2012 11:24 PM,即係琴日十一點左右開既。
 
我再用滑鼠慢慢碌落去睇下其他巴打既留言同埋『樓主』再有冇資料提供,發現好多人都唔信,留低一大堆無聊既留言:
 
" 無圖你話馬德鐘黎搵你都得啦 " 10/25/2012 11:35 PM




 
" 請致電29283283 " 10/25/2012 11:36 PM
 
" 有冇人組團去睇? " 10/26/2012 12:02 AM
 
" Seed 呢? " 10/26/2012 12:15 AM
 
只有一啲比較有建設性既留言先令到樓主回答,例如:
 
" 樓主幾多歲 " 10/25/2012 11:40 PM




 
"係咪失散左既孖生兄弟呀? " 10/25/2012 11:55 PM
 
"係依八日內有冇咩特別事發生左? “ 10/26/2012 12:31 AM
 
“ 果條友仲有冇繼續跟住你? " 10/26/2012 12:36 AM
 
而樓主都一一回答,根據樓主所講,樓主今年十八歲,好早已經問左屋企人有冇孖生兄弟,雖然唔知屋企人有冇吹水,但都幾肯定無。而果條友係依七日內都有跟住佢,令到佢返工放工都好驚,加上兩日前屋企人去哂旅行,攪到樓主唔敢自己留係屋企,所以執左少少行裝去左一個同學屋企暫住,直至屋企人返黎為止,依家都係同學屋企用電腦上。
 
由於件事無咩突破性發展,個Post一直都係沉底,只有樓主上黎更新一下近況先推返上黎,一眾巴打都認為係"人有相似" ,可能對方見你似佢,都覺得好好奇,又或者真係孖生兄弟而屋企人隱瞞住,但樓主一直都無比答案,令到好多人都無依件事無咩興趣,甚至有人懷疑樓主係假膠。




 
去到最後既留言,時間顯示為 10/26/2012 10:15 AM,姐係今朝早大約十點鐘左右,而最後個個留言唔係樓主黎,我諗依個時間樓主應該返緊工。
 
我對依件事感到好好奇,我覺得同許雯件事有好大既關係,於是我決定係個Post留言比對方,問一問對方有關依件事既野。
 
" 巴打,我信你呀! 因為我都有遇到相同既事! 我想問你有冇留意似你果個人隻手腕到有冇一條奇怪既配帶呀? " 10/26/2012 01:30 PM
 
留言後,望一望個鐘,如果樓主返緊工既話,都唔會睇到我個留言,既然係咁不如訓一陣,因為我真係覺得好累,於是攤係張床到訓覺,但我點樣逼自己盡快訓著都好,我個腦仍然係到運作緊,不斷係到諗成件事究竟係點。本來以為只係發生係許雯身上,但當我睇到果個Post話見到有另一個自己監視住自己,我就知道件事已經唔係單單發生係許雯到,可能已經發展到其他人,什至係我身上。
 
唉,都係唔好諗咁多,聽阿明講,都係抖下算。
 
過左唔知幾耐,我耳邊隱約聽到有開門既聲音,會唔會係阿爸阿媽返左黎? 定係芷君放學返左黎?
 
嗯......好累,都係繼續訓。
 




過左一陣,我耳邊隱約聽到有人好似係我房門前行黎行去,果種重覆又重覆既腳板底離地既聲音不斷係我耳邊出現,芷君想睇我係唔係房? 佢一定想用電腦。
 
過左一陣,我感覺到我房門好似開左咁,哈,一定係芷君想偷偷地用我部電腦,好! 等我嚇一嚇佢先。當我感覺到芷君慢慢一步一步行緊我床邊時,我即刻彈起身,張開雙眼,大叫:『嘩!』
 
我嘩都未嘩完,我就嚇到呆左,因為眼前既人唔係芷君,而係著住當日划艇俱樂部提供既潛水服,一個同我個樣一模一樣既人,佢根本就係我自己。
 
眼前既『自己』對我冷笑,然後拎支槍指住我塊臉,個種槍與我皮膚接觸既感覺同當日中年男人用槍指住我塊臉既感覺係一樣。
 
『呀......呀.....』我好想大叫,好想阿爸阿媽芷君快啲入黎救我,但我無論點叫都好,都係叫唔出聲。
 
『呯!』
 
.........
 
一下槍聲將我嚇醒了,呆呆望住天花板,吞一吞口水,原來係發夢。我慢慢起身,摸一摸額頭,定一定神,發現背上出左好多冷汗,頂佢個肺,頭先個個咩夢黎,我竟然見到自己黎殺我,一定係我日有所思,夜有所夢,唉! 連想訓返覺好既都唔得。




 
我望一望手錶,時間已經係黃昏六點幾,天色都開始暗。我起床踏出房間,屋企人仲未返黎,今晚個餐唔通又叫外賣? 我呆呆咁坐係大廳張梳化,開住電視睇六點半新聞報告,睇下有冇咩大新聞關於另一個自己既事,又或者有冇一班恐怖份子黎左香港。但睇左一陣都無咩相關既報導,連我之前流落荒島既事都無再跟進報導,大概已經比人遺忘左。
 
丫!
 
我突然醒起討論區個位巴打,唔知佢有冇覆我既留言呢? 我即刻衝入間房,開著部電腦螢幕,睇下對方有無覆我。
 
仍然無覆我。
 
奇怪。通常依個時侯,佢應該會更新近況,點解咁耐都未更新? 我太心急想得到果位巴打既回覆,好想知道佢所見到既人隻手腕有冇一條奇怪既配帶,如果有既話,就肯定同許雯件事有關係。咪住……屌! 點解我咁蠢! 點解今日搵許雯個陣無留意到佢隻手腕有冇配帶!?
 
諗左一諗,當時許雯只係用一隻手開門,另一隻手比佢條大毛巾遮住,唔怪得我無咩留意! 如果佢有條配帶係手腕到既話,我一定會留意到!
 
但依個時侯唔到我諗依啲野,我不斷按下鍵盤上既F5制,不斷更新個Post最新近況,務求見到果位巴打第一時間既回覆。
 




時間一分一秒咁過,已經去到夜晚八點幾,連我屋企人都返左黎。
 
『阿峰! 你仲係到玩電腦! 過黎食飯啦! 買左你鐘意食既福建炒飯呀。』阿媽係我房外大叫。
 
但我仍然坐係電腦面前,有意無意地重覆按下鍵盤上既F5制,過左咁耐仲未回覆既? 唉,都係醫一醫肚先,講起上黎我成日都無食過野。
 
『點呀? 身體好返?未?』阿媽關心地問。
 
『好返好多。』我邊食邊說。
 
『你今日無食野咩? 食得咁快!』
 
我好快咁食完盒飯就行返入房繼續對住部電腦,重覆按下鍵盤上既F5制。
 
芷君隨後開左我道房門,坐左係我床邊說:『睇咩睇得咁入神呀,食得咁快對身體唔好架!』




 
我邊望住電腦邊說:『我等緊一個人既回覆。』
 
芷君望一望電腦,平時佢都上開依個討論區,所以好熟悉討論區既運作,當佢見到我睇緊個Post既標題係
 
" 我最近發現有另一個自己係到監視住我 "
 
芷君不禁感到奇怪,於是問:『咩Post黎架?』
 
我諗左一陣,真係唔知點解釋比佢聽,亦都唔知應該由邊到開始講起,於是亂咁答:『靈異Post呀!』
 
『咦.....夜晚晚睇埋啲咁既野!』
 
『......』
 
芷君見我無回應,就拎左我房入面既男兒當入樽係我張床到睇,我依個細妹雖然生得幾標清,性格又好,係學校都有好多人追,係一位名副其實既女神,但唔知點解對男兒當入樽,全職獵人等等既男性漫畫咁有興趣。
 
時間去到凌晨兩點幾,我都按到累,開始有放棄既念頭,我估果位巴打應該訓左,都係聽日先再睇。望一望身旁既芷君仲係到睇緊漫畫,我不禁說:『仲唔返房訓! 兩點幾啦!』
 
芷君仍然望住本漫畫書說:『我睇到最後啦!湘北對山王!』
 
我見佢睇到咁興奮,都唔想阻佢雅興,我最錫既就係我個細妹。於是我隨手又按左幾下F5制。
 
突然,我見到有最新既留言,正正就係樓主既留言
 
" 大家 果個個人又跟住我啦! " 10/27/2012 02:18 AM
 
出現了。
 
但樓主好似唔係同學屋企,似乎用手機上黎留言。於是我即刻Copy 我條問題,問多次:
 
" 巴打,我信你呀! 因為我都有遇到相同既事! 我想問你有冇留意似你果個人隻手腕到有冇一條奇怪既配帶呀? " 10/27/2012 02:19 AM
 
同時其他巴打都好似留意緊樓主既情況,紛紛留言:
 
" 報警啦on9 " 10/27/2012 02:19 AM
 
" 你行去同佢講!你跟撚夠未!" 10/27/2012 02:20 AM
 
" 樓主小心菊花! " 10/27/2012 02:20 AM
 
" This is......" 10/27/2012 02:21 AM
 
但樓主似乎無理到以上既無聊留言,唔知係咪太多人留言,又或者樓主好急睇唔到我既留言。樓主再繼續留言:
 
" 唉 咁夜無地鐵,我係旺角搵緊有冇車返去! 10/27/2012 02:23 AM
 
" 你住邊呀? 幫你Google下! " 10/27/2012 02:24 AM
 
" 天水圍 " 10/27/2012 02:24 AM
 
其他巴打都幫手解答樓主。
 
" 我住天水圍架! 你是但上一架元朗小巴! 去到洪水橋之後轉的士啦! " 10/27/2012 02:26 AM
 
" 舊金星戲院附近果間Neway對出有架專去天水圍既泥鯭的搭架!" 10/27/2012 02:26 AM
 
 
" OKOK! 元朗小巴係邊到? " 10/27/2012 02:28 AM
 
" 新填地街個面呀!" 10/27/2012 02:28 AM
 
過左一陣,樓主又留言。
 
" 我搵緊.....但果個人跟我跟得愈黎愈明顯,條街又無人 我好驚! “ 10/27/2012 02:33 AM
 
當我見到樓主咁講既時侯,我心突然寒左一寒,我知道對方來者不善,我又諗起個中年男人槍殺許雯既情景,我好擔心樓主最後都會得到咁既下埸。
 
於是我連忙留言:
 
" 樓主! 你快啲搵個多人既地方避避先啦! " 10/27/2012 02:34 AM
 
" 我都想.....但成條街都無咩人 " 10/27/2012 02:36 AM
 
我忍唔住對住部電腦說:『今次仆街!』
 
芷君聽到我突然爆粗,似乎個Post終於有人回應,於是放低本漫畫,坐我身旁同我一齊睇個Post,當芷君睇哂近幾個留言時,大概估到有人對樓主不利,於是說:『問佢依家行到去邊到!』
 
我即刻留言:
 
" 樓主! 你依家行到邊到? " 10/27/2012 02:38 AM

【第七話完】
已有 0 人追稿