lucius幫我係屋企收拾左啲生活用品之後,就扶翻我落樓揸車。

我地再次合作,佢指揮我駕駛,回程發覺呢方面大家真係幾合拍,佢永遠描述到,好似有條路係我個腦度咁,個距離算得又精準,回程又再次完美泊車。

落車之後,我踩油隻腳已經痛到企唔穩,畢竟本身我隻小腿個傷口一直未好翻。點知lucius單手就將我當係包米咁擲上膊頭,隔離隻手我聽到佢拎住個袋,應該係我啲生活用品。

「有冇人話過你..托住你就好似托住塊熨衫板咁,完全冇身材可言。不個樣都算ok既,睇睇下你..幾似電視果個陳法拉,你算係高質啲既老翻咁。」都唔知佢讚定彈...

聽到佢講洗衫板,又諗翻起lucy曾經都咁話過我。



「點解你兩兄弟把口都咁臭?」我笑住咁問佢。

提到佢細佬,佢反而反問翻我轉頭:「其實有樣野想問你好耐...你係咪好鍾意我細佬?你點解可以為佢,連魔林都敢入?
講真....雖然我鍾意左mia好耐,畢竟正常男人都鍾意靚女大波既。只要佢開心,我可以為佢做任何事。
但如果要犧牲我條命比佢....我自問又未去到呢步。究竟,你當時係諗緊咩?」

比佢咁講一講...我開始反思..lucy究竟係我心目中,係咩位置..

「點形容呢...佢始終係我恩人,唔係佢,我單憑一己之力根本無辦法報到我爸爸既仇。呢點令我係由心而發咁感激佢...



之後,我睇到佢對mia既深情...我...可能...都算係同情佢又好,點都好,我諗呢個人係重情既人,呢點令我有小小對佢改觀。後來kelvin單野,又係佢救我岀黎。

同佢一齊,尤其冇左對眼既佢,完全係會激發起人既保護欲,你明唔明?

佢重話過,我要做佢雙眼,唔可以放開佢隻手。

呢句說話係我耳中,令我覺得自己係佢心目中好特別。

我唔知咩叫鍾意...只係因為佢呢句對我信任既說話,變成左我為佢奮鬥既主要原因。」



lucius聽到之後,又借啲意挖苦我:「唉,你啲女人,人地講兩句就覺得自己好特別。

你係佢最需要人幫助既時候,岀現係佢面前,佢梗係會好依賴你啦。

但之後呢?

佢有翻自己對眼,重需唔需要你做佢對眼?係咪等於可以放手?
你真係..傻到貼地。」

我聽完一下打落佢個頭度。

我先唔信....lucy係咁既人。

佢曾經對我既信任,對我既恩惠...



其實.....我都唔知.....反正..

我至少,要比佢睇到mia既本性。

我付岀既所有都比mia佔據哂,正常人都接受唔到...無論結果係點,我都要踢爆佢個假面具先甘心。


「唉,我講下姐。你又唔洗咁灰,我細佬份人好重感情既。喂,你落黎先,到左啦。」佢又一下將我拋翻落床,屌個盆骨差啲比佢擲散,又一下啪一聲係我腰骨發岀。

「喂你輕手啲好冇呀!我條骨又移位啦!」

lucius一邊扶翻好我,又一邊係度忍笑。

妖!正一撚樣黎!呢條白痴究竟係點賺到幾億翻黎?!