隔離屋懷疑住左個痴線佬，我裝左個監視器發現佢竟然...: 27.世紀之戰
「今餐我用左好多心機，呢款dry aged beef我學左好耐先整到，用既都係外國訂既高級牛，算係誠意十足啦。」mia開始勘酒，再拉櫈坐低。
「多謝。」
mia似乎唔滿意lucius冷淡既語氣，冷冷咁問:「人地對你講野，要望住人地隻眼，係最基本既商業禮儀。呢樣都係你教我。」
依我估計，lucius應該一直唔比自己望佢對眼，驚會比佢迷惑到。
「Mia，開門見山啦。我同你都唔係鍾意轉彎抹角既人，今次你叫我黎既用意，我冇估錯，應該唔只係想我放棄皇位咁簡單，係咪？」lucius依然郁過餐具用餐，反而相當直接咁同mia直接談判。
「咩...你咁諗我嫁？我係真心想同你和好。我知我以前做既一切都好錯，所有事都係我鬼迷心竅先叫咁...
以前係我為左做魔后，我先咁不擇手段，我已經好後悔自經曾經對你同lucifer做過呢咁卑劣既事。
當初我翻去Lucifer 身邊，係因為我發現我真係好愛佢。雖然，做你既女人先有最大機會可以做到魔后....但之後....我先發覺我個心最愛係lucifer，我先做左一堆錯事，希望得到lucifer原諒，同希望佢做到皇，到時我就同時得到魔后既權力同愛既人。
但之後既每一晚，我都過得非常內疚同難過....我諗翻起我地三個以往互相信任，快樂無比既時光...我好想....可以得到你既原諒，翻翻去以前.....」
mia突然間非常內疚咁講岀左一大堆肺府之言，每句都承認左自己既過失同錯誤，加上可憐無比既聲線，普通人聽到一定為之動容。
除左我同lucius。我地經歷過咁多，一早已經對mia既偽裝有所防範。
「既然你咁後悔，咁你比翻對眼林美玉。
只要你肯比翻對眼佢，我咩都唔會再同你計。」
lucius開岀既條件，係我對眼。
.......
腳步聲開始一步步行近lucius度，突然聽到一下輕微既親吻聲。
mia用耳語般既聲量，温柔無比咁問佢:「我知，你一直都愛住我。
你捨得...我冇左雙眼咩？」
我個心...突然變得異常緊張，呼吸亦都暫時屏息左上黎...靜靜咁等待lucius既答覆...
「唔捨得。」耳機傳黎lucius毫不猶豫既答覆，令我個心揪痛左一下。
果然....佢個心一直都...冇放低過mia...
我點點咁放低耳機....
可惡.....點解要比我聽到.....咁之前既擁抱..只係我諗多左..
我地一直，都係互相扶持既拍檔，再冇其他特別關係。
本來就應該係咁，只係我將自己諗得太特別。比佢愛左13年既mia，我同佢所經歷既幾個月，根本就微不足道。
唔得...無論點都好，而家唔係諗呢啲野既時候...我始終，都要完成身為佢拍檔既責任。唔可以因爲一時既感受影響大事。
我重新拎起耳機，點知....
我聽到一下耳機入面，多左另一把聲。
係lucy發狂既叫聲。
岀事啦！耳機入面除左lucy瘋狂砸野既聲之外，冇左lucius既聲。
我即刻拎住盲公竹瘋狂跑去lucius曾經提示我既窗邊方位，我向左上不停咁衝，耳機一直都冇lucius既回應...頂住呀.....我過緊黎...對唔住呀...你一定要冇事.....
好快我就篤到大宅既外牆，我摸到頭先mia開左開窗，一下dum低支盲公竹，雙手拉住窗邊一下爬左入去。
當我雙腳落地既時候...發現一陣刺痛從腳底傳黎....好撚痛...感覺就好似比幾十粒圖釘拮左入腳咁......九成九係mia一早估到我係岀面，先設個咁既小學雞局比我踩。唔怪得連窗花都打開埋..就知佢仆街...
「林美玉...？」率先傳入耳邊既，係Lucy 叫我既聲....林美玉.....佢....係咪記翻起我....？
「Lucy.....?你記得翻我啦？」我忍住激動既情緒，一步一步咁忍住腳底既劇痛行上前..過黎捉住我既，係lucy既雙手...
「lucius呢？lucy，究竟發生咩事？」
lucy冇答我，反而係一下將我推落地下，咁啱我正正撞左係估計係lucius既身上，我向住lucius暈左既身體不停搖晃...但係佢都冇任何反應....
「lucius!lucius!!醒下呀！」無論我點搖點拍佢...佢都冇反應。
「lucifer！你對佢做過啲咩？！」我忍唔住向lucy咆哮，感覺上，佢一早已經唔係當時我識果個lucy。
果一個，捉住我叫我唔好再放開佢既lucy。
「我只係...魅魊左佢沉睡...直至我重新喚醒佢為止...我都係迫不得已。」lucy憤恨咁回答我。
「mia...係你...mia！你唔好再扮野！係咪你又魅魊左lucifer擾亂佢！」我一邊攬住lucius,一邊胡亂向住一個方向大嗌。
「mia佢咩都冇做過...唔好咁話佢。」lucy一直維護住mia，我越聽越火滾,
「係我！
救你果個係我呀！為左你，無左雙眼果個，都係我。係你最無助既時間，重新拉翻你岀黎果個人，亦都只有我！
係mia，佢搶走哂我同lucius所有既野！我求下你清醒下好冇！你要維護既人，係救過你無數次，一直守護住你既我呀！」
我聲嘶力竭咁，將呢一堆心底話一炮過向佢講...我已經....忍左好耐...好耐...為左佢...我已經承受左好多...好多...
「我..知道。」lucifer似乎...完全唔驚訝，好似一早已經知道哂所有事...
「你知道...？你幾時知道...？你唔係忘記左我咩？」我不解咁問佢。我唔明！我唔明呀！
「早係前兩日，mia已經將所有野同我坦白哂...係佢一時迷失..先會做岀呢種錯事..重拎走左你對眼...
我知..你同我阿哥，都因為mia受過唔少苦。初頭我聽到，確實係好嬲，好難接受...
但mia今次係真心真意認錯，我感覺到，佢今次係認真嫁，佢勇敢承認哂自己既錯誤，同時都跪低求我原諒佢。
我知道mia本身係心地善良既人，既然佢已經痛心改過...我選擇左原諒佢。
至於欠你既，我而家還翻比你，當報答翻當日你對我既恩情。」
呀......
我對眼.....突然有一陣刺痛.....
好熱........
我比突如其來既熱力令我不自覺緊緊合實雙眼.....
到我再次張開眼既時候....
我發現......
我眼前攬住既lucius，着住白恤衫牛仔褲，心口前有一撻紅酒漬..佢正係我既懷中，沉沉昏睡緊...
我....再次睇得翻野.....
「呢對眼係mia揾既，我已經還翻佢欠既野比你。」
隨即佢係褲袋拎岀一份合約，我望一望，係當初我同lucifer所訂立既合約。
佢一手將佢撕爛....同時...都將我地之間唯一既關係...隨手撕毀....
我同lucifer係呢個瞬間....已經成為陌路人....過去種種既回憶....隨住佢撕毀合約既同時，已經一下子全部否定哂。
我一直以為，係佢心目中擁有特別位置既林美玉，只係因為佢失去記憶，先令我失去地位。
但原來，呢兩者從來都冇關係。
我回想係過去我珍而重之既回憶....一齊食m記..一齊計劃點收合約....一齊對付力威佬.....種種回憶而家係我心目中，就好似一把利刀，狠狠咁刺痛住我每一條神經。眼淚亦都忍唔住...一下子湧左岀黎...
「對唔住....而家我已經還翻自由身比你...以前你幫過我既種種，我真心好感激你。但呢一刻，我只係想留係mia身邊過我未來既生活，而你，都可以過翻你未來既生活，唔需要再插手我地三個之間既事。」lucy無情既語氣，亦令我既淚水停左落黎....
「Lucifer ，呢次，係我最後一次因爲你而喊。
我一直都遵守對你既承諾，從來冇放開過你既手，無論我遇到再難過既事，我都冇放棄過你。
但係原來，係你重遇mia既一刻，你一早已經放棄左我。
你地三個人既事，我一啲都唔想插手。
但你叫我放棄lucius，我做唔到。
因為，我應承過自己，我唔會放開佢。你要郁佢，除非踩住我條屍行過去。」
lucius一直處處守護住我。無論我幾難過，幾礙事，幾無用，佢一直都冇放棄過我。
而家，到我守護翻你。