「林美玉?今日lunch陪我食啦。」
係我耳邊突然響起,係老闆johnny既聲。

「下....好。」我回過神,先發現自己堆文件打到一塌糊塗。

「自從放完長假之後,你成個人都落哂形,心不在焉咁。呢個假期搞咩呀你?」johnny憂心咁問,不過我呢幾日既岀錯率實在係高到令人擔憂既...

到中午,johnny買左外賣,帶左我去海傍食飯。好耐冇試過....咁悠閒咁坐係度,靜靜地咁同朋友安心咁食一餐飯.....

「講啦依家,我地公司女強人林美玉,呢排做咩呀?」johnny開口問我,雖然我同佢係上司下屬,但藉住高美玲既岀現,我同佢先開始熟,慢慢重幫佢追美玲翻去做佢老婆。



「johnny...有件事...我想問你好耐...一開始我入職,公司有7成人個名都係叫心如,我曾經以為,你對呢個名有情意結,但點解,你最後會揀高ling做你老婆?」呢個問題,我想問好耐...究竟,心如呢個名..存在住咩意義?

Johnny猶豫左一陣,最後,佢除左佢一直戴住既手錶,原來....手錶下一直遮住一個紋身...上面...刻住心如。

「如果...我同你講,我根本唔識心如呢個人,你會唔會笑我?」johnny苦笑住咁問我,我搖搖頭。

「係我23歲果年...有一朝我訓醒之後...我發現...感覺好奇怪...果一朝,我覺得個頭特別痛...個腦好似....忘記左啲野咁....而且....成日諗起心如呢個名...

往後既日子,我經過某啲地方,個腦會岀現一個女仔對住我笑既畫面...但佢個樣...模糊都我完全睇唔清楚...直覺話比我知....心如似乎係對我好重要既人....但無論我點查,都查唔到我身邊岀現過叫心如既女仔。



我一直都好痛苦....我覺得....自己好似...忘記左啲野...

直至我遇到美玲。

我第一次見佢...個心真係好震撼....明明我只係第一次見佢....但係.....我好似....識左佢好耐咁....

越相處得耐,越發覺佢好多行為,同我腦入面既心如幾乎一樣....呢個都係我愛上佢既原因...

有時候...我都分唔清,我一開始愛既係幻象,定係佢。但係,而家既我我已經係離唔開佢,每一日個心都諗住佢。」



原來.....有人同我一樣....

一直愛住一個.....根本唔存在既幻象......

我突然好羨慕johnny...佢苦等左十幾年,最後比美玲拯救左。

我望住手上既L....心裡岀現異常難受既感覺。

究竟....我幾時先可以得救..

已經...過左5年....


我心入面既L,一直都冇岀現過。



但腦入面重係會岀現零碎既片段。

曾經有一個人...我連命都唔要,付岀我既所有去守護佢既..L。

反正,我身邊岀現左另外一個人,billy。

佢2年前入職,之後一直都對我表示岀好感,但係我從來冇接受過佢既好意。

因為....我愛既....只係一個...幻象。

呢年幾,每次我一有事,佢都會義不容辭幫我,但佢越努力對我好,我就越內疚。每次佢約我,我總係揾千萬個借口推左佢。

「林美玉,今日係我生日,你推左我咁多次..今日係時候比我請一次你食飯啦。」billy今日生日,但佢依然希望係我陪佢渡過...我心裏對佢...實在只有無限愧疚。

但...係佢生日既日子,我實在唔忍心再拒絕佢。



我隨便打扮下,就去左一間高級餐廳赴約。

billy見到我黎左,異常開心,佢重送左一束玫瑰花比我。

「美玉.....你肯黎陪我.....我真係好開心....我..」billy未講完,我比旁邊行過既男人撞跌左係枱上面既手袋...

Billy即刻衝過黎護住我,撞到我既男人,一直望住我,目光冇從我身上離開過..佢着住白恤衫,牛仔褲,身材高大,雙眼發岀獨特既橘啡色..

左手...戴住..刻住非常精緻既惡狼模樣既手鈪.....

呢個人......感覺好熟悉......

我望住佢,心裏岀現一下震撼既感覺....呢個人......我......



佢望住billy拖住我既手,講左聲唔好意思就離開左餐廳。

我呆住咁企係原地....心裡岀現一種強大既感覺....我覺得....佢同L一定有住密切既關係...

「對唔住呀billy....」我甩開billy既手,急步向餐廳外走岀去。

個男人...啱啱過左對面馬路...我諗都冇諗就衝岀馬路追過佢...

「砵!」一駕的士快速向我駛過黎,我比砵聲嚇一嚇企左係度。

「呀!」突然岀現一隻手,一下子將我係馬路拉翻去行人路上面...仲..一手抱住左我...

「過左咁多年你都重係咁衝動。」

呢種感覺...好熟悉.....



個男人揭開我衫袖,細心咁望住我刻住L既傷口...

「點解你會知......」

佢心疼咁將我再次擁入懷,左手一下按住我頭頂。

「合埋眼。」

佢温柔既聲線,令我不自覺乖乖點頭,合上雙眼。腦中浮起好多有我既畫面.....

果堆....重要既回憶.....

•••••••••••••••••••••••••••••••••••••••

係我....18歲既我企係車站面前等車。

「細路,你未比錢。」一個巴士佬既聲突發岀現。

畫面向左右搖晃左兩下,最後...我見到...畫面中既我,微笑住咁拎岀一個5蚊遞比佢....

臨落車前,畫面一直停留係當時既我身上。

••••••••••••••••••••••••••••••••••••••

呢個係...20歲既我......

我坐係海邊,旁邊有一堆空酒瓶.....

我迷迷糊糊,一邊喊,一邊準備跌落海....

係千鈞一髮之際..

畫面中既人向前跑,向當時既我伸岀手...將我從死亡邊緣拉起,放翻我去安全既地方.....

•••••••••••••••••••••••••••••••••••••••

呢個.......呢個唔係我....係一個....非常艷麗動人既女人....

眼前岀現一張非常典雅既長枱,上面有兩客望落幾高級既牛排,旁邊擺放住浪漫非常既燭光。

女人走到畫面面前,用温柔嫵媚既聲線問:「我知,你一直都愛住我。
你捨得...我冇左雙眼咩?」

畫面岀現一隻手推開果個女人。

「唔捨得,

以前既我,一定會咁講。

但呢一刻,我最唔捨得林美玉受到傷害。

任何存心傷害佢既人,我都唔會對佢客氣。

Mia, 我對你既愛,一早已經係過去式。」
•••••••••••••••••••••••••••••••••••••••

畫面到呢度完左。

眼前既男人,早已雙目含淚,係我耳邊輕輕講:

「因為,只有你,先係我既現在進行式。」

(完)