今年暑假，我去咗“機場”打工: 二十一
陽光從窗外透射進來。
睡眼惺忪嘅我，第一時間，感到的是。
好痺呀。。。。。
原來我抱住小嵐，瞓咗整整一晚。
換言之，小嵐枕住我隻手成晚。
我feel到，我再唔拎開隻手，我應該可以變楊過。
但係，望住眼前熟睡中嘅小嵐。
我又唔忍心叫醒佢。
佢睡得正香，而且個樣嘴嘟嘟咁。
睇落傻傻地，好鬼可愛。
不禁令人會心微笑。
雖則係咁，但我隻右手氣若浮絲咁向我求救，佢應該就快唔掂。
我用左手，好小心，好輕力咁托住小嵐個頭，騰出少少空位，縮返隻右手出黎，之後再好小心放低佢個頭。
我fine fing隻右手，希望仲用得啦。
我又望望小嵐，然後我忍不住，湊近她。
個傻妹唔知發緊咩夢，冇啦啦喺度傻笑。
我偷偷地，哄到最近，用嘴唇碰一碰她的嘴。
之後，佢笑得仲甜。
嘻嘻。。。
我慢慢地咁，坐返直個人，再簡單伸展一下。
依個時候，房外傳來鐵閘聲，我諗應該係伯母出門口返工。
我個人好醒瞓，一定瞓唔返，唯有拎起手機睇下。
一打開手機，發現Jessie尋晚wtsapp過我。
Jessie佢，只係打咗一句。
「哈哈，尋晚飲大咗，你唔好理我呀。（一個笑漂淚的emoji）。」
「。。。。。」
我對住個wtsapp視窗，諗咗好耐，都唔知打乜好。。。
最後，只係打咗一句。
「係咩？哈哈。又是一個漂淚emoji。」
我嘆一口氣，然後再碌下手機。
有好多條新聞通知，我不停咁望下掃下。。
點知，其中一條，令我好似中咗石破天驚拳咁。。。
【牛頭角街頭，昨晚發生黑幫廝殺，6男被斬至重傷】
6男？明明得2個，計埋被我踢到嘅，最多3個。點解，新聞會寫6男嘅？？！！！
我即刻緊張地㩒入去睇。
單野無論係地點，同人物都同我尋晚發生嘅好吻合。。。
究竟咩事呢。。。？
唔通。。。同尋晚臨走時，撞到嘅嗰班黑衣人有關。。。？
唉，算啦，唔諗喇。
就算我點諗，都只係猜度，冇真實答案。
此時，旁邊嘅小嵐，有些動靜。
只見佢搖搖晃晃咁坐咗起身，眼睛仲濛濛下，頭髮又亂糟糟咁，形象好搞笑。
小嵐望住我，發咗陣呆。
我對住佢笑一笑。
之後，佢先好似真係醒返，仲即刻記得而家嘅儀容。
小嵐佢啊的一聲，拎起枕頭，遮住自己塊面，道。。。
「早。。晨呀，阿邦。。。」
「嘻嘻，早晨呀，傻妹。」
「唔準叫我傻妹呀！我邊度傻喎。」
「唔傻唔傻。。。」
「哼！你另轉面先啦！我而家好樣衰呀。」
「唔係吖，幾得意呀。」
「唔得意呀！」
跟住小嵐用腳踢我。
嘩，我當堂嚇咗跳。佢踢出嘅力度，差啲令我成個人碌咗落床。
趁我被踢到失神之際，小嵐用手遮住塊面，衝咗去房門邊，再靜靜打開門察看。
知道伯母不在家後，佢再狼狽咁跑出房。
哈哈，小嵐嘅動作好鬼搞笑。
我同小嵐輪流用完廁所之後，開始諗下而家點好。
我拎起尋晚套衫，左望右望，真係唔著得出街。。。
小嵐佢若有所思，然後啊的一聲，食指向天指。
「我有件風褸，買大咗，你應該啱著。不如你笠住先，陣間食完野，再去買衫。」
「係咩？咁你。。。尋晚又唔講嘅？」
只見小嵐聽完，望望天花，心不在焉的說。
「咁。。。我尋晚唔記得咋嘛。。。」
「哦～～～」
聽完我嘅哦，小嵐佢瞬間嬲爆。
「哼！快啲換衫啦！」
「哈哈。。。係～」
小嵐隨後關上房門，畀我在房獨自換衫。
我覺得，以前嘅小嵐，總係同人刻意保持距離，以保護自己。
但經歷咗尋晚之後，我覺得小嵐佢好似個人放開咗，唔再咁拘謹。
我估小嵐佢而家，已經畀我進入咗佢嘅。。。安全範圍。
出返黎之後，我問小嵐。
「搞掂晒！我地去食早餐喇，你想食乜？」
「um。。。食奶皇包吖！」
「吓。。。又係奶皇包？」
「係呀係呀，食吖食吖。。。」
小嵐佢眉飛色舞，捉住我隻手臂係咁chok。
唉，咁樣唔食都唔得啦。。。
我地落樓。
今日小嵐著咗一件，白色有帽嘅短袖衛衣，下身係一條淺牛短褲，加埋對白波鞋。
很青春活潑。
行下酒樓嘅途中，我又陷入咗煩惱。
究竟。。。拖唔拖佢隻手好呢？
小嵐佢時不時望望我，而我就逃避著佢眼光。
唉呀，手汗又好似漏水咁。
我同小嵐入到商場，走上扶手電梯。
前面有一對好甜蜜嘅情侶，攬到實一實，跟住仲打埋車輪。
喺我前面嘅小嵐，望到情侶後，回過頭來，望一望我。
跟住佢冇講野，只係側住身對住我，微微咁笑。。。
到咗酒樓嗰層，我同小嵐朝住酒樓行去。
點知，身後有一道男人聲。
「小嵐。。。小嵐。」
我同小嵐另過頭來，見到一個中年男人，笑住咁走過黎。
個男人，面型四四方方，著衫輕便得黎好斯文整齊，而且佢笑容幾有親和力。
「小嵐，咁啱嘅。」
「早晨呀，陳Sir。。。」
哦，原來係老師，氣質都幾似。
「早晨早晨，同哥哥黎飲茶呀？」
「um。。。」
小嵐尷尬地望一望我。
我只好答：「係呀係呀，陳Sir你好。」
陳Sir向我點點頭微笑。
之後，陳Sir對住小嵐續道。
「小嵐。。。畢咗業之後，搵到野做未呀？」
小嵐佢，支吾以對地答。
「um。。。搵到喇。。。」
唔知點解，小嵐睇落唔係好自在咁。
陳Sir又道。
「小嵐呀，如果你，想搵工嘅，可以打畀我，我幫你介紹啲工你做吖。。。」
「um。。。好啦。。。」
「哈哈，一於咁話喇。好啦，唔阻你地一家人飲茶喇。拜拜。」
陳Sir活潑的，向我們揮揮手。
而小嵐，就恭敬地點頭道別。
同陳Sir告別之後，我同小嵐拎咗飛等位。
我留意到，小嵐個樣，總係心不在焉咁。。。
我忍唔住出聲。
「小嵐呀。」
「嗯？」
小嵐側過頭來，望住我。
「點解呢。。。你見完陳Sir之後，好似冇乜心機咁嘅？」
「哦。。。你睇得出呀？」
依刻我心入面諗。。。
仆街喇！唔通個陳Sir係夏樹嘅契爺？！！
又或者小嵐佢以前玩過田徑？
兩種情況我都不能接受呀。。。。。（思覺象mode）
小嵐支吾以對。
「冇。。。我都係聽講架咋。」
「聽講？？」
「嗯。。。我聽人講，個陳Sir外表好老實，但內裡好咸濕，成日會咸豬手啲女同學。」
「吓？！咁你又冇畀佢摸過？？！！！」
「咁又冇。。。我有盡量避開佢，唔同佢接觸咁多。」
「哦。。。咁都好啲，但係個陳Sir佢。。。真係睇唔出喎。」
「係呀。。。」
我忽發奇想，打趣講。
「咩叫人面獸心？就係佢依種喇。哈哈哈哈。」
「嗯。。。」
小嵐佢點點頭，再冇反應。
睇黎佢Get唔到個笑點。
哈。哈。。我靜靜地咁收皮。。。
當張飛一到，小嵐即刻拉住我，走上前，將張飛遞給部長。
小嵐雀躍的道。
「好耶，有得食奶皇包！」
我搖搖頭，心中佩服個傻妹，對奶皇包嘅鍾愛。
甫坐底，小嵐即刻拎起點心紙，然後好似考古學家咁專心。
「小嵐呀。。。兩個人，唔駛嗌咁多架。」
小嵐仍是專心一致，點點頭，再道。
「嗯，我知呀，所以先要更加小心，更加準確咁揀點心。」
「哈哈，傻傻地。。。」
結果，我地揀咗5籠點心，有燒賣、鳳爪、腐皮卷、奶皇包，同埋奶皇包。。。。。
我瞇住眼望小嵐。
小嵐虛心的道：「咁我鍾意食吖嘛。。。最多，我食晒喇！」
「哎，算啦。。。好彩我都幾鍾意食嘅。」
小嵐顯得驚喜的道：「係咩？？」
我：「嗯！」
小嵐續問：「咁你鍾意食流沙，定係唔流沙架？」
「um。。。我比較鍾意食以前，唔流沙嗰隻。」
「哈哈，我都係呀！但好耐冇食過喇。。。」
「係囉，好似好耐冇食過。」
小嵐然後托住頭，道。
「我記得呢，以前細個，第一次食流沙，我冇預到入面會咁熱，結果我一啖咬落去，就辣親個嘴。」
「咁咪好痛？」
「嗯。係呀。跟住之後。。。我爸爸每一次，都會搣開一半畀我，等我揸住，慢慢食。」
小嵐愈說，眼神愈有點失去光彩。
我即刻道。
「啊！好似黎喇。」
小嵐對我笑笑，再望去後方。
我：「講笑咋，為食貓。」
「哼！乜你咁架。。。」
冇幾耐，阿姐真係遞咗點心黎。
小嵐同我，可能都肚餓，好快食晒點咸嘅點心。
之後剩返兩籠，6隻奶皇包喺枱面。
小嵐對住啲奶皇包，搓著手掌。
我首先起動，拎起一個奶皇包。
然後，我搣開咗一半，遞向小嵐。
「嗱！唔好再辣親喇，傻妹。」
小嵐佢，眼定定咁望住我，佢話。
「哈哈。。。我爸爸，都成日咁講。」
「哦。。。咁啱嘅咩。」
「嗯。我爸爸仲講過，會一直搣包畀我。直到，有第二個男仔幫我搣為止。。。」
然後，小嵐，眼泛著淚光。
我不想再看到你委屈的樣子，我道。
「我。。。我咪係嗰個男人囉！快啲食啦！唔係嘅話，我食晒佢架喇！」
小嵐抹一抹淚水，再笑著道。
「我先唔畀你食晒呀！我要。。。依邊！」
食完包飲完茶之後，小嵐話要幫我買返件衫，所以我地去咗uniqlo。
一入到去。
小嵐拎咗件黑色tee，口袋位有隻米奇老鼠，喺度扮陶大宇掩面。
「試下依件吖。」
件Tee望落都幾得意，於是我拎去試身室試下。
點知，入咗試身室之後，我發覺件tee係細碼，著唔落，要搵人幫我換。
我一打開簾，小嵐企喺度等緊我。
我呆咗呆，心裡泛出一絲驚喜和甜蜜。
「咦？咁快試完嘅？得唔得呀？」
「哈哈。。。件衫太細，我想要中碼。」
「好吖，攞黎吖，我幫你換。」
小嵐語畢，向我笑笑，再拎走件細碼tee，行咗出去。
我望住小嵐活潑的背影。
突然有一種，平淡而幸福的感覺。。。
小嵐換咗件中碼畀我。
我入去著上身，再行出黎畀小嵐睇。
小嵐見到後，滿意地笑笑，再道。
「嗯，幾好睇呀，幾啱身，你覺得呢？」
「um。。。都係黑色tee咁啦。」
「唔係呀，我覺得依隻米奇好得意。」
小嵐說完，用手指篤一篤隻米奇。
但係，佢唔知。。。米奇下面係我粒lin。
我即刻敏感地，用手遮一遮米奇。
小嵐眼睜得大大的，然後掩住口笑。
「哈哈，唔好意思呀。」
「嗯。。。哈哈。。。」
小嵐仍未笑完。
我尷尬地望住佢。
小嵐本來想忍笑，但失敗咗。
佢單手掩住面大笑。
叫佢咁樣，我笑住講。
「你扮緊隻米奇呀？好似呀。」
小嵐聽完，即刻放下手。
「似你個頭呀！哼！」
再搥咗我幾下。。。
喺uniqlo出黎之後，我同小嵐行多咗陣，眨下眼就差唔多時間搭車返工。
我地出咗商場，沿著條馬路旁行。
沿途，我一直有瞄下小嵐，只見佢隻右手，唔自然咁fingfing下。
真係好想。。。一野拖住小嵐呀！
但係，我又好淆。
如果我出完手，而小嵐縮手嘅話。。。。
我會即刻衝出馬路，斬掉重練。。。
唉呀，但望望小嵐，佢一身咁Gfable嘅打扮。
如果拖得到，一定會好幸福。。。
點好呀而家？？？！！！。。。。
啊！！！我諗到！
表哥講過，拖女仔隻手，最好係借啲意，例如行好斜嘅樓梯，又或者係過馬路嘅時候。
咁樣，就算個女仔真係縮返隻手，都可以話係幫佢，冇咁柒。
好！一於咁話！
我左望右望，附近冇樓梯可以行。
而馬路。。。。
隔多幾個街口之後就有一個！！！！！
但係好地地過馬路，好難拖住佢。除非。。。
係綠燈閃緊，要衝嗰陣！
之後，我即刻開始計步速，務求一去到，就閃緊綠燈！
唔。。。如果以而家嘅速度，到咗應該會係紅燈噃。
我漸漸。。。放慢腳步。
小嵐傻傻下咁，行咗喺我前面，見我唔喺隔離，就另轉頭問我。
「咦？阿邦？做乜行得咁慢嘅？你唔舒服呀？」
「哈哈。。。少少啦，隻腳抽抽地筋。」
「吓？？點解嘅？」
「唔。。。唔知呢。哈哈，要行慢啲先得。」
「咁我扶你吖。。。」
「唔駛喇，我慢啲行就得喇。」
「哦，咁好啦，我陪你行慢啲。」
「嗯。」
行行下，我見到小嵐個傻妹，踩甩咗自己嘅鞋帶。。。
但係，唔可以提佢住，因為一定要夾啱返個時間呀！！！！
仲有三十步距離。。。閃綠燈。
仲有廿步距離。。。。 。紅燈。
仲有十步距離。。。。。。。綠燈。
行到馬路，就應該閃綠燈喇！！！！
差唔多喇！！！成功在望喇！！！！！
點知。。。。
「阿邦呀。等等我吖。」
小嵐突然咁講。
「等乜野啊？？！！！」
我語氣有啲激動。
小嵐畀我嚇一嚇，眼光帶些無辜的道。
「我甩咗鞋帶，想綁返。。。」
「哦。。。唔好意思。你綁啦。。。」
小嵐隨後彎低腰綁鞋帶。
我望望交通燈，已經開始閃綠燈。。。
盞燈，不停登登聲的催促我。
但都冇計架。。。
一陣之後，交通燈已經變做紅燈。
唉，今次衰咗，又唔知要等幾耐。
我顯得垂頭喪氣。。。
但係，小嵐佢綁完鞋帶之後，仲踎咗係度，未起身。
我黑人問號。
此時，小嵐佢心不在焉地，向我伸出隻右手，問。
「阿邦呀，你。。。可唔可以拖我起身呀。。。」
原來，個傻妹同我一樣，都製造緊時機。。。。。