今年暑假，我去咗“機場”打工: 三十
「Jessie，咁今晚我地約好食宵夜架喇！」
小嵐fing住Jessie隻手講。
睇黎小嵐多咗個，可以黏住嘅對象。
Jessie溫柔咁摸摸小嵐個頭，動作好似家姐咁。
「得喇得喇。。。傻妹。」
小嵐笑笑。
「嘻嘻，你地個個都話我傻架。」
「唔係傻，係可愛喇。」
「咁就差唔多。」
望住兩個氣質不同的美女，著住撩人嘅水手服喺度打趣，真係好令人精神為之一振。
小嵐：「好喇，唔傾喇，我要去做野喇。。。」
語畢，小嵐望住我。
「阿邦呀，咁陣間見啦。拜拜。」
小嵐揮揮手。
「嗯。陣間見。」
小嵐與Jessie都道別後，轉身走去。
剩下我跟Jessie。
我怕氣氛會變得尷尬，道。
「um。。。咁我都落返去先喇。」
「阿邦呀。」
「嗯？」
Jessie有點支吾以對。
「um。。。都係冇野喇。」
「吓？哦，咁。。。我走先喇。」
「嗯。」
Jessie佢雙手疊於胸前，看上去有野想同我講，但又唔敢講。
咁都冇法啦，我轉身走去。
走咗幾步之後，我聽到急速的高跟鞋聲。
我另轉望，Jessie已走到我旁邊，捉住我手臂。
「阿邦呀，我有野想同你講。」
「吓？咩呀？」
「入黎先吖。」
「吓？！入。。。邊度呀？？」
「哎，入房囉，傻仔！」
Jessie推開了旁邊嘅房門，拉咗我入去。
一入到房。
我貼住牆邊，Jessie傾過身來。
與我貼得好近。
「你想。。。點。。。？」
「想點？我想。。。開燈呀，傻仔！」
Jessie佢啪開我隔離嘅燈掣。
房間明亮之後。
我忍唔住，將目光投放到，Jessie傾前的胸口。
Jessie企返直。
用期盼嘅眼神望住我。
「你啱啱。。。咁緊張衝上黎，係因為我？。。。」
我諗返起，啱先以為Jessie真係出咗事，狼狽咁衝上樓梯嘅畫面。
我嗰陣腦海一片空白，只係希望衝上去之後，Jessie會一切安好。
「吓？？？我。。。係，啊唔係。。。我唔係。。。」
我變返一個語癌患者。。。
Jessie望住我不知所措嘅樣，噗哧一笑。
「嘻嘻，阿邦。唔駛咁緊張，我想多謝你啫，多謝你咁緊張我。」
「吓？嗯。。。」
Jessie佢撓撓耳邊的髮絲，然後窩心一笑。
望住佢笑容，我。。。
始終習慣望到佢笑，希望Jessie以後都會幸福同快樂。
「阿邦呀。」
「係。」
「你咁緊張我，即係證明，我對你係重要架啦。。。」
「吓。。。？」
咁樣發動攻擊？我講咩好？
Jessie一雙修長的腿，交疊的站，道。
「我可以為小嵐做任何野，但係我，都好尊重自己感受，唔想咁易認輸同放棄。我。。。」
「um。。。Jessie。」
「雖然好衰！但係我都想同你一齊！」
「Jessie。。。」
Jessie用堅定的眼神望住我。
「我知你都對我有感覺架！」
其實，我自己都唔知。
無可否認，Jessie真係好吸引到我。
但係，我而家，已經同小嵐一齊咗。。。
「Jessie呀，我。。。」
「阿邦，你唔駛逼自己架，我想你，跟隨自己嘅感覺，順其自然咁走落去。」
「嗯。」
Jessie笑笑。
順其自然走落去。
冇錯，或者唔好諗咁多，跟住感覺走，遲啲就會有答案。
我順其自然咁。。。
望落去，Jessie水手服中間嘅乳溝。
「喂，咸濕仔，又偷睇我。。。」
屌，被佢捉到添！
「um。。。哈哈。。。」
我尷尬咁摸摸頭。
我倆相視而笑。
「哈，傻仔。咁晏啲見啦。。。」
Jessie向我揮揮手。
「拜拜。。。」
「嗯。。。晏啲見，拜拜。」
Jessie低頭笑咗下，之後走過我。
打開門走出去。
我望住佢背影。
Jessie雙手握在腰後，走著輕快的腳步。
修長的腿在活潑的搖曳。
我心底內的陰霾，好似終於透出一點陽光。
我哼著歌行樓梯，落返更衣室。
一落黎就見到表哥同發仔。
佢地著緊咁走過來，問。
「點呀點呀？冇事吖嘛。」
我笑笑。
「冇事喇，Jessie輕鬆搞掂咗。」
佢兩個鬆一口氣，道。
「咁咪好囉。。。」
我：「係呀。」
發仔：「佢點搞掂架？」
「小嵐話佢。。。」
「咳咳咳咳！！！」
突然而來嘅咳嗽聲，打斷咗我地嘅談話。
望過去，咳嗽係由一個身型偏瘦，著住mk西裝嘅青年所發出。
佢企係儲物櫃前，明顯係想用咳嗽聲來呼喚我地。
我向表哥發仔講。
「等我黎吖，我成晚都唔喺度。」
「哦。好啦。」
我走過去，禮貌咁向青年講。
「唔好意思呀先生，要你等咁耐，我幫你掛衫吖。」
青年佢不屑咁望咗我一眼，然後冇理會我，開始除衫。
我喺旁邊，耐心咁等侯。
而青年，就全程掛住不爽嘅臉容。
青年除低外套同恤衫，輕佻咁遞畀我。
我接過來後，分開咁掛起。
點知，當我將衣服放入櫃嘅時候。
青年無啦啦爆seed。
「屌你，睇撚住啦，掛到皺撚晒呀仆街！」
我即刻拎返啲衫出黎。
望兩望，明明掛得好好，冇摺痕。
「um。。。先生，你睇下。。。」
青年望望我手上嘅衫，之後再罵。
「點呀，想駁嘴呀？」
「吓。唔係呀先生，我明明。。。」
「你收聲啦！你有資格講野咩？我有冇話畀你講野呀？」
我愣一愣，估唔到佢會咁樣，好似呼喝奴才咁話我。
好明顯佢好唔識尊重人。
而且，我明明冇做錯到。
點解要畀佢咁樣鬧？！
我想據理力爭！
「唔係喎，先生你睇下啦！我明明。。。」
「明乜撚野啫？你係咪第一日出黎撈呀？」
我開始有火滾。。。
表哥見到情況後，急急腳行埋黎。
表哥：「咦？咩事呀？」
青年撓起雙手，然後用狗眼看人低嘅眼神，望住我地。
「哈，啱先就唔撚見晒人，而家就衝撚晒出黎。點呀？想要貼士呀？吓？」
表哥仍是態度良好。
「先生，你可能誤會咗。。。」
「得喇得喇。。。唔撚駛講喇。」
青年從銀包拎出張廿蚊，掉到銀盤上。
「嗱，畀你地呀！唔撚駛找喇！死開啲啦，我自己搞掂呀！」
然後青年一手搶返我手上嘅衣服，掛到櫃中。
「行撚開啦，仲企喺度！」
表哥行前，似想還佢拖。
發仔及時攔住咗，佢再對青年講。
「好。。。你慢慢呀。」
然後，發仔搭住我同表哥行開。
表哥：「屌，條友m到呀？正仆街！」
我望望青年，佢冇聽到。
發仔：「唉，算啦，咩人都有架啦，你地同佢嘈唔著數，咪撚理佢。」
表哥聽咗之後，仍不甘心。
「屌，依啲撚樣，一睇就知係呃阿婆嘅仆街啦，佢憑乜睇唔起我地！」
「唉，算啦，唔好同依啲人計較。」
其實我本身都火滾，但係我知，總會有依種無理取鬧嘅客人。
如果一遇到依種客，就同佢開拖嘅話，咁好難做得長，只好忍受下。
受人氣，係做服務業，薪金包括的一部分工作。
之後，青年自己搞掂晒所有野，由始至終，冇望過我地一眼。
目送完青年走後，我地收拾心情，繼續工作。
其間，有個中年男人畀咗張一百蚊我！我興奮到差啲叫出黎！
睇黎我r貼嘅技巧，愈黎愈好喇！！！
喺我拎住張一百蚊，想除褲打丁嘅時候。
掛牆電話響起。
「鈴。。。」
表哥：「等我聽吖。」
表哥走去接聽，簡單應咗幾下，就收咗線。
表哥走來，同我講。
「喂，John哥叫我上去傾下計，你都一齊黎吖。」
「吓，咁依度，咪得返發仔一個？」
我同表哥望住發仔，發仔都望住我地。
發仔佢展起一邊手臂，鼓起佢所剩無幾嘅老鼠仔。
「放心交畀我啦依度！」
我同表哥尷尬咁笑笑。
我：「哈哈。。。咁唔該晒喇。」
表哥：「咁走喇我地，發仔好叻仔嘅，衰就衰在奀啲啫。。。」
發仔聽完後，展埋另一邊手臂。
「唔係呀，依排我操過下，大隻咗好多。唔係咩？」
發仔自戀咁欣賞自己嘅老鼠仔，我同表哥都唔想睇落去。
表哥調侃發仔。
「得喇得喇，中上男神，知你打撚死人喇！收返埋佢啦。」
發仔怒睥表哥，摩拳擦掌的走過來。
表哥同我一邊恥笑，一邊逃離現場。
出咗更衣室，走上樓梯時。
我爭取時間諗下點同John哥講。
表哥留意到我，道。
「唔駛咁咩喎，John哥實睇住我地架。」
「嗯！咁又係，我都信得過John哥！」
「咪係囉。嗱！陣間我地，一於數臭條臭閪！！！」
「嗯！好！！！」
「你兩個，話邊個臭閪呀？吓？」
高八度嘅聲音傳來，抬頭一望。
唉，怨家路窄，又係條臭閪風姐。
成撚日撞到佢，都唔知佢係咪睇cctv，再突登撞我地。
表哥不屑的對佢道。
「冇呀。。。講緊一個好賤嘅女人啫。」
風姐撓起手，雙手托高起乳房。
「邊個黎架？講黎聽下吖。」風姐一路面閪。
「哈哈哈哈。。。唔講喇，唔想講喇，我驚一講就覺得臭呀。」
表哥語畢，用手掩住鼻，再問我。
「咦，你聞唔聞到呀？」
我都掩住鼻。
「聞到喎，臭臭地嘅？」
「係囉。。。」
我地瞄瞄風姐。
風姐個樣，怒氣值一直提升。
表哥笑笑口道。
「風姐，我地走先喇，拜拜。。。」
表哥揚揚手，裝作撥開氣味。
我倆走過風姐。
風姐又用細細聲，但實令你聽到嘅聲線講。
「睇你兩條仆街仔，幾時死！」
表哥大聲的還擊。
「嘩。真係好臭呀，我地行快啲喇。」
「嗯，好呀。。。」
我同表哥快步走上樓梯。
我瞄瞄風姐。
可能佢畀我地篤中佢臭嘅死穴。
佢嬲到，好似希臘啲怒火女神咁樣。
行到上大堂，我見到不遠處嘅吧台內，紫繞正熟練地搖拭銀杯，但我費時打擾佢。
我同表哥直接走去，我第一次見John哥嗰間房。
「叩叩叩。。。」
「入黎啦。」John哥沉厚的聲音。
行入去後，John正坐喺辦公椅。
「John哥你好。。。」我同表哥一齊講。
「唔駛咁客氣喇。你地，係咪有野想同我講？」
「嗯。。。」
要開始講，但又唔知從何說起好。
John見我地都未出聲，佢就先發言。
「係關於風姐？」
表哥大力點點頭。
「係呀。條八婆真係愈黎愈玩野！」
John哥撓起雙手。
「佢做咩黎？」
我知道，係時候到我講。
「今日小嵐嘅中學老師黎咗，風姐佢突登安排小嵐服侍佢，擺到明要小嵐難做。」
John哥撫著下巴。
「係呀？咁真係幾過份。。。」
表哥：「係呀John哥，你有冇計，整走條八婆呀？！」
「依層。。。我都話唔到事，我同佢職位一樣，我最多，勸佢唔好太過份。」
「嗯。。。」
John哥同風姐都係經理，確實冇能力整得走風姐。
但我上次見到，John哥出黎調停時，風姐都會畀面John哥。
如果John哥叫風姐收手，我估風姐以後會收儉啲。
John哥望住我，道。
「咦，係喇。邦仔呀，你點解會咁著緊小嵐嘅？」
估唔到John哥仲未收到風。
「um。。。因為，我同小嵐佢拍緊拖。。。」
John展露歡顏。
「係？？？哈哈，咁好嘅，你放心，我以後會睇實啲風姐，唔會畀佢咁放肆。放心！」
John哥拍拍我膊頭。
「嗯。多謝你呀John哥。」
「冇事，小事黎啫。」
我地同John哥，傾多幾句。
John哥祝我同小嵐白頭到老，永結同心。
聽落好似就快結婚咁，哈哈。。。
但我睇得出，John哥真係戥我同小嵐高興，而衷心咁祝福我地。
我同表哥出返黎之後，表哥問我。
「點呀？駛唔駛乘機，會下情人先？」
「um。。。」
「唔駛um喇，行啦，不過唔好咁耐呀。」
「好呀！如果小嵐唔得閒，我就即刻落返黎啦。」
「得喇，行啦。」
「拜。」
依排我成日都掛住小嵐，想無時無刻都見到佢。
我帶住興奮心情，走上樓梯。
走上2樓後，我第一眼就見到小嵐。
但係。。。
小嵐佢正撓住，啱先辱罵我個青年。
佢地一邊笑，一邊傾計。
好明顯，啱啱小嵐係服務佢。。。
唔知佢地傾緊乜。
然後，佢地行過黎我依個方向。
我即刻轉身，走落樓梯。
我唔知點解，好驚畀佢地見到。
可能我怕，青年佢，會喺小嵐面前，再一次奚落我。
又或者，我係怕小嵐唔想畀我見到，佢撓住第二個男仔。
我唔知我驚邊樣。
我只係一直走，一直走。
直到走到更衣室，我先緩過氣來。
但係，小嵐撓住青年嘅畫面，仍在我腦海中停留。