今年暑假，我去咗“機場”打工: 二十八
「傻豬，瞓夠未呀？」
一打開眼，見到小嵐正喺我肩旁，倚偎住我。
啊。。。一打開眼就見到小嵐，依種感覺真係好幸福！
我搓搓眼。
「嗯，醒喇醒喇。」
跟住，冷不防咁錫咗小嵐一啖。
小嵐甜甜咁笑，再將手，放在我的胸口上。
「點算呀。。。我聽到出邊，世伯伯母都喺度。」
我張嘴，打咗個大呵欠。
「呵。。。幾點喇而家？」
「我拎手機睇下吖。」
小嵐然後坐起身，再跨過我，想去電腦枱拎手機。
個傻妹依刻，淨係著住睡褲，上身嘅睡衣，只係咁意地披在身上。
這一跨，小嵐的胸部在我眼前，一覽無遺。
我忍唔住，一下攬住佢，小嵐隨即成個人壓在我上面。
「喂呀。。。」
小嵐一邊掙脫一邊搥我。
我又施展雙龍出海。
之後再按住佢，同佢舌戰。。。
玩鬧咗一輪，小嵐總算拎到佢手機。
「9點喇。。。」
「哦，咁阿媽應該就快煮好早餐。」
「吓。。。係呀？」
「嗯，你尋晚瞓得好唔好？」
我一問完，小嵐就好似隻小貓咁打呵欠，再道。
「我好早起咗身，邊似你瞓到隻豬咁呀！」
「吓。。。咁你唔嗌醒我？」
「唔啦。。。你瞓得咁好。」
我錫咗小嵐嘴唇一下，再道。
「乖！抵錫。」
「哼！錫你個頭呀！咁。。。而家點好？出唔出去？」
唔。。。
老豆尋晚都見到小嵐，相信阿媽都已經知道小嵐嘅存在。
如果唔出去，好似顯得小嵐唔大方咁。
但出去，小嵐又可能會驚。
「Um。。。出去吖，我介紹你畀佢地識。」
「吓。。。」
小嵐在胸前弄手指，睇得出佢真係驚。
我一下將佢擁入懷。
小嵐嘅胸部好柔軟，同埋佢體溫好溫暖。
「唔駛驚吖，有我喺度！」
我覺得自己依一刻好有型。
希望小嵐佢，唔好畀我型到暈倒。
點知，小嵐佢冇啦啦，又使出七傷拳。
「最衰都係你。。。最衰都係你。。。」
啊。。。啊。。。我畀佢打到就快內傷。
我拖住小嵐，顫巍巍的走出房門。
見到阿爸喺餐枱旁睇報紙，而阿媽就喺廚房煮緊早餐。
「老豆早晨。。。」
「世伯。。。早晨。。。」
阿爸佢立即放下報紙，再托托眼鏡。
「啊。。。早晨早晨，尋晚瞓得好唔好呀？」
小嵐身軀，有點縮進到我手臂內，她答。
「嗯。。。幾好呀。。。」
我拖住小嵐嘅手，稍稍用力，給予她信心。
「哦。。。咁就好喇。。。」老豆點住頭道。
我：「哈哈，咁我同阿媽講早晨先。」
我feel到，氣氛好快會尷尬，都係走先。
由於，我嘅觀察力，強如柯南。
所以我發現到，餐桌上，有4套餐具，咁就說明，阿媽肯定知道有小嵐嘅存在喇。
我拖住小嵐，去打下一關。
「阿媽早晨。。。」
「伯母早晨。。。」
阿媽佢，正喺度煎蛋，佢見到我地後，展起笑容。
「早晨早晨，尋晚瞓得好唔好呀？」
唔。。。你兩公婆，唔夾下對白先架。。。
小嵐靦腆的再答。
「嗯。。。幾好。。。」
「哦。。。咁就好喇，出去等下先啦，好快有得食。」
「咁阿媽呀，我同小嵐刷牙先。」
「好呀。」
小嵐略略鞠躬。
然後我拖小嵐入咗去廁所。
「最衰都係你呀。。。最衰都係你呀。。。」
又係七傷拳。。。
梳洗完後，我已經被小嵐打到五勞七傷。。。
出返黎之後，我同小嵐默默地坐到飯桌來。
阿爸佢望望我地，再睇返報紙。
用報紙來間距中間嘅尷尬。
等到阿媽都拎埋早餐出黎，我地開始食野。
阿媽食食下，向我講。
「阿仔呀，你唔介紹你女朋友我識呀？」
係喎，未同阿媽介紹過。
「吖。。。係呀，佢係小嵐呀。」
小嵐乖巧的點點頭。
「哦。。。你地係返工識架？」
我：「係呀係呀。。。」
「咁。。 小嵐喺機場做咩位架？」
小嵐皺住眉望望我。
我答：「小嵐係做地勤架。」
「哦。。。」
小嵐疑惑咁望住我，要遲啲先同佢解釋返。
跟住，阿爸阿媽都冇再問太多野。
從佢地嘅表情得知，應該好滿意小嵐。
梗係啦。。。佢地實估唔到，我可以搵到個咁可愛嘅女朋友。
食完早餐之後，阿爸要出門口返工，而阿媽就執枱。
阿爸佢臨出門前，冇啦啦叫我，話一齊出去廊掉垃圾。
明明阿爸從來都唔咁做架。
出咗屋後，我疑惑的問。
「阿爸呀？做乜冇啦啦你會掉垃圾嘅？」
阿爸佢，望望同圍，然後細細聲同我講。
「阿仔呀，你而家既然有小嵐依個女朋友。咁你以後，就少啲去嗰啲地方喇。」
嗰啲地方？
哦。。。係喎，阿爸上次以為我，去幫襯機場。。。
我尷尬的笑笑。
「嗯。。。唔會再去架喇。。。哈哈。。。」
阿爸點住頭嗯。
之後，阿爸就真係返工，我都入返去屋。
阿媽仲洗緊碗，我就拖住小嵐返入房。
一入房，小嵐就問我，點解啱先會話佢做地勤。
我就向佢解釋返，我誤打誤撞入咗去機場嘅經歷。
咁當然，我冇提到，我係因為紫繞而入去。。。
小嵐佢冇咗個耳筒。
所以，我諗住返工前，同小嵐去行下，睇佢鍾意邊款，送返個畀佢。
同阿媽告別之後，我同小嵐就出門口。
小嵐個傻妹，由出門口起，就一直撓住我隻手。
落到樓下。。。
嗰個成日問我拍拖未嘅保安阿姨，一見到小嵐，就驚訝咁張口。
「咦，女朋友黎呀？」
我心諗，手都撓住啦，唔係女朋友，唔通係我個女咩。
「哈哈，係呀。。。」
「叻仔喎，個女朋友咁靚女呀。」
「哈哈，係呀係呀。」
我笑笑咁點住頭應佢。
哼，總算係吐氣揚眉喇今鋪，睇你仲寸唔寸我冇女！
跟住，我同小嵐行去商場，沿路經過一個籃球場。
迎面有班打籃球嘅中學生。
佢地好似一群狗公咁，係咁昅住小嵐，仲細細聲喺度討論。
我鼓起勇氣，睥住班撚屌，但完全冇用，因為佢地根本冇望過我。
嬲嬲地，我行喺小嵐前面，嗰班撚頭先至留意到我。
之後，佢地用又羨慕，又仇恨嘅眼光望住我。
嘻嘻。。。依一刻，係我成世仔，最有自信嘅一刻。
行行下，我發覺到，經過嘅男人，十居其九，都會將目光投放到我。。。身旁嘅小嵐。
有幾個，會望完小嵐之後，向我拋下不友善嘅眼神。
一開頭我都感覺好有自信。
但後尾，我覺受到有小小無形嘅壓逼感。
沿路，有幾個男人，個樣生得唔錯，佢地都係咁望住小嵐，渴求得到小嵐目光嘅回應。
而我亦緊張咁望住小嵐，渴望住小嵐唔好望返佢地。
雖然小嵐佢，大部分都冇乜注意到，好專心咁同我傾計。
但我驚我成日咁樣疑心症，會好快痴線。
唔怪得之，啲人話揀女朋友同老婆，唔好揀太靚嘅。
因為會成日擔心被人搶走。
唉，估唔到，我咁快已經體驗到依種壓力。
行行下商場，去到戲院門口。
小嵐興奮咁拉住我手臂。
「阿邦呀，不如我地睇戲吖。」
「哦，是但啦。。。」
我嘅語氣幾差，原因係。。。
小嵐啱先，同隔離nike嘅高大男sales對望咗一眼！
冇錯！只係一眼，我就已經嬲！！！
我都估唔到，自己會咁小器，一眼啫。。。
但我內心，真係忍唔住咁，呷醋呷到仆街。
「阿邦呀。。。你咩事呀？。。。你好似唔開心咁。。。」
我耳邊。。。
天使：阿邦，你唔好咁啦，小嵐係真心愛你架，可能啱先至係咁啱望到啫！
魔鬼：屌你唔撚係呀？佢啱先同人對望呀，係對望呀！望望下，就好易有感情，有感情就好快帽事架喇！
天使：一眼啫，你自己出街都望唔少女仔啦。
魔鬼：點同呀！女人就應該安守婦道！望一眼，即係覺得人地吸引啦，咁仲唔係想出軌？
天使：邊有咁易呀？
魔鬼：女人真係養唔熟架！
你地都收聲！
我緩緩呼出一口氣，向小嵐道。
「睇戲好呀！睇戲唔駛畀人望到呀！」
「吓？」
小嵐皺眉側頭咁望住我，唔知我講乜。
唔好話佢吖，我都唔知自己做乜！
唉，唔好理喇，睇場戲，冷靜下都好。
聽人講，第一次同女仔睇戲，一定要揀恐怖片！
因為個女仔驚嘅時候，就可以攬住你，自然會令感情飛快增長。
但其實，我自己好驚睇鬼片。
我連睇星爺套回魂夜，都要快1.25速，飛住咁睇。
咁點好呢？。。。
我同小嵐，企喺一張張電影海報前，小嵐倚偎住我。
「阿邦呀。。。你想睇邊套呀？」
我心入面諗，不如睇Lego大電影吖。。。
但係，我卻懶勁咁答。
「睇依套吖，奪命凶靈。」
小嵐望住張海報，皺皺眉。
「吓。。。好似好得人驚咁。。。」
「唔怕啦，有我喺度！」
我自信的，拍一拍心口。
小嵐露出勉強嘅表情。
「唔好啦。。。」
嘻嘻，佢愈驚，就愈顯得我大膽！
「唔驚喎！睇啦。。。」
「吓。。。阿邦你咁想睇，咁。。。好啦。。。」
「好嘅！」
入到場之後，套戲都未開始，小嵐已經撓住我實一實。
而我就摸摸小嵐個頭，安慰佢。
「唔駛驚，有咩事攬住我啦。」
「嗯。。。」
小嵐點點頭。
嘻嘻嘻嘻。。。。
點解我咁有自信？
因為我諗到一個方法，套戲實嚇我唔到。
就係，當有恐怖場面嘅時候，我就合埋對眼！！！
咁彈咩出黎，都唔關我事啦！
而且小嵐佢自己都咁驚，實唔會望到我合埋咗眼。
哈哈哈哈。。。太易玩了！！！
套戲果然好多驚嚇位。
搞到我，合埋咗眼，半套戲有多。
而小嵐佢，一直都緊緊地攬住我。
到驚嚇位時，佢就用力捉住我，有幾下嗌埋出黎。
而我，就一直坐得好直，一啲事都冇咁，係有幾下，畀啲音效響到震。
結果，順利渡過。
但係依個方法，都有個壞處。
就係會睇漏咗好多位，skip咗啲劇情。
離場時，小嵐仲緊緊撓住我手臂。
「阿邦呀。。。套戲好得人驚呀。。。」
我揚起自信嘅笑容。
「哈哈，係咩，唔係吖，冇乜野呀。」
「吓。。。阿邦你好大膽呀。。。」
「不嬲架啦！」
小嵐：「但係呢，點都估唔到，啱先個阿爸竟然係鬼。。。」
我：「吓？乜佢係鬼黎咩？」
「係呀。。。仲嚇到我成個人彈起，你唔記得咩？」
「哈哈，記得記得，係呀係呀，佢係鬼黎呀。。。」
小嵐不解咁望住我，再道。
「仲有呢，個驅魔人呢，佢嗰招。。。」
「吖。。。小嵐呀。」
再傾落去，恐防會穿煲。。。
小嵐：「嗯？咩事呀？」
「冇。。。不如，我地去睇耳筒囉！」
小嵐喜出望外的笑笑。
「嗯。好呀！」
我倆走上電梯。。。
呼。。。終於過到關。
然後，我拖住小嵐，入去豐澤。
但小嵐佢，行咗陣，一直都睇唔啱。
「小嵐呀，你唔鍾意啲耳筒？」
「嗯。依度好似好貴咁。」
「吓，唔緊要啦，我買畀你吖。」
「嘻嘻，咁好？不過。。。我唔想喺度睇，我地落返去睇吖。」
「哦。。。好呀。」
小嵐拉住我，落咗下一層。
我以為會有其他影音鋪。
點知，小嵐帶我入咗一間格仔鋪入面。
我地走到其中一格前面，小嵐指指入面。
「我要返依隻吖，依隻幾好。」
我望望個款式，睇落音質應該麻麻地，但價錢就幾實惠，60蚊。
我望住小嵐的一雙大眼睛。
「小嵐呀，你可以買好少少架。」
「唔駛啦，依隻夠架喇。嘻嘻。。。」
小嵐展起一個，好似小朋友有糖食嘅笑容。
「uｍ。。。咁好啦。」
買完耳筒之後，我地行多下。
我感覺到有點肚餓，我問小嵐食唔食野。
點知小嵐話行多一陣先，因為兩點鐘就有下午茶食。
嘻嘻，我發覺，小嵐原來係個慳妹。
而且，佢唔淨只慳自己，仲慳埋我嗰份。
就算今日係我埋單，小嵐佢都唔會要我駛好多錢。
小嵐佢，真係愈睇愈gfable。
話咁快，就到搭車返工嘅時間。
我同小嵐喺巴士上，試下個新耳筒。
果然，耳筒嘅音質唔太好。
但係，小嵐個傻妹，聽起上來都好開心。
「婆哥Shit DA。。。婆哥Shit DA。。。」
我聽住，耳筒放出嘅天國的階梯。
望住身旁，滿臉笑容的小嵐。
依一刻，真係好幸福。
好想時間就咁停下來。。。。
「我再沒勇氣向你。。。」
我手機響起，係表哥打黎。
我同佢講，我同小嵐一齊返緊去。
而表哥，就同我講，今日我地返更衣室。
唉，即係今晚冇得係咁見到小嵐。
但都好。。。
因為今晚可以r貼士！！！
為咗早日令小嵐離開機場，我一定要加油！！！！！
「先生，等我幫你吖！」
「咦，靚仔，你套衫好好睇喎，邊度買架？」
「唉，你邊會老啫，你睇落最多咪４０歲，金城武都係差唔多年紀啦。。。」
為咗小嵐，我對住客人，講盡了所有嘅好話。
儘管好冇面，但我都要堅持！
因為我唔想再要小嵐留喺依度！！！
終於，有少少空檔。。。
發仔走來，搭住我膊頭。
「今晚好博命喎。」
我點點頭，道。
「嗯。係呀！我想搵多啲，等小嵐可以早啲離開依度。」
「好！有志氣！叻仔！」
表哥都走過來。
「但你都唔駛咁掩住個良心呀嘛，啱先你講咩金城武，但個男人，睇落成個何俊仁咁款。」
我：「唉。。。唔緊要啦，佢啱先畀咗５０蚊貼士，算幾好。」
發仔：「咁。。。賺下人係金城武，有５０蚊，都算抵講架喇。嗱！我唔收你肖像權嘅錢，係咪好唔話得呢。」
我同表哥，沒好氣咁望住發仔。
此時，入口有個身影走進來，我正諗住上前迎接時。
睇真啲，係陳sir。。。。
好彩我來得及反應，喺佢望過黎之前。
我先黎個反智轉身，再縮到去沐浴間嗰邊。
屌！條撚樣真係一條淫蟲，又黎依度！
佢咁樣黎法，總有可能會撞到小嵐。。。
我即刻拎出手機，打畀小嵐。。。
但響咗好耐，小嵐都冇聽到電話，可能做緊野。
發仔同表哥，明明就喺前面，但我驚行過去，會被陳Sir見到。
於是，我喺wtsapp group到講野，睇下Jessie佢地可唔可以幫我搵到小嵐。
「Hello，有冇人見到小嵐呀？」
我望望前面，陳Sir已經除晒衫，行緊黎我依邊。
我即刻再閃後啲，去到出口隔離，客人換休閒裝嘅位置。
睇返手機，見到有人輸入中。。。
係Jessie。
Jessie：「小嵐佢做緊野，咩事呀？」
我：「係呀？咁我而家上黎，我有啲緊要野搵佢！」