第六十四章

「你返到去瞓返陣先喇~今晚我不如上你屋企煮飯呀?」

「哦⋯好呀⋯」

「ok,今晚見~」

「88⋯」



食完早餐之後,我同曉桐分道揚鑣,各自各返到屋企⋯ 我返到屋企之後就馬上入去沖涼瞓覺⋯ 但由於現加已經中午十二點幾,所以⋯

「咁猛陽光⋯我點瞓呀⋯」所以我起返身,行咗去書枱到發佝瞀,我攞住張班相一邊望,一邊諗緊嗰個夢嘅Angel⋯ 「曉桐會唔會係Angel,如果唔係我應該點⋯」呢個問題一直喺我個腦海到揮之不去⋯ 正當我諗到就黎瞓著嘅時候⋯
「啪!」我一時鬆開咗手,跌咗幅班相落地,玻璃碎鋪滿哂喺地板上,除咗張相跌咗出黎之外,仲有返封信⋯

「嗯?有封信嘅?」我攞起封信,反一反個信封面寫住「給最愛的人」,係Kelsey嘅字跡⋯我懷著疑問嘅心情打開咗佢⋯
(作者提示:請一邊聽住《綿綿》呢首歌,一邊感受同細讀呢封信)
—————————————————————-

致我最愛的人:



Hi阿遊。如果你睇到呢封信嘅話,我諗⋯我已經唔喺到⋯你之前成日話我無plan B,咁我嘅plan B就係呢個⋯ 我見你時不時都會望住呢張相,面上嘅表情充滿住遺憾,就知佢係有幾重要⋯ 所以我將呢封信放喺張相後面,我既希望你唔好搵到,但又唔想你因為我孤獨終老⋯ 我希望可以一直喺你身邊,咁你就一世都唔會搵到⋯

估唔到我哋咁快就一齊咗兩年,好似好耐咁但我就只覺得係過咗幾日。摩天輪嘅開始到現加嘅每一分每一秒我都會永遠記住,你個傻仔樣、瞓到死豬咁嘅樣、你呷醋時嘅樣、同埋向我求婚時嘅樣⋯我一生都會記住⋯ 第一眼見到你嗰陣,我就知我終於遇到我嘅真命天子,你當時唔似啲兵咁日日跟住哂,仲肯幫我避開啲狗仔,好多謝你⋯ 同你一齊咗之後,發現你嘅過去同我嘅好相似,呢個特質吸引我去幫你,去愛護、呵護你,因為就好似見到另一個自己咁⋯但你又成日喺到懶無嘢咁,仲幫返我、呵返我轉頭⋯以後唔準再咁喇下!仲有呀!成日喺人哋後面望住哂,搞到我好難專心沖嘢㗎!我嬲㗎下030!

聽日終於去睇婚紗啦!我由細到大就好想喺教堂到著住純白色嘅婚紗,同自己最愛嘅人結婚。感覺好浪漫呀~好多謝你幫我實現到。我好愛好愛你~我仲已經諗好咗我哋個仔女叫咩㗎喇!但諗起個個都話生仔好痛,都係遲啲先⋯

睇到呢到,我諗你一定會好自責,因為如果你發生咗啲咩事,我都會咁諗⋯ 就如我之前所講,just forget me⋯ 我當然好想好想同你一齊,走到最後⋯ 但如果個天唔俾嘅話⋯我都無辦法⋯ 如果走嗰個係我嘅話⋯我希望你唔好再為我而傷心,去搵一個比我更好嘅人陪住你,唔好再已經唔喺到嘅我而去束縛自己,封閉自己⋯ 因為喺我心裏面,最深刻嘅愛並唔一定要愛到死來活去,而係互相成全,就好似你以前同我講嗰個Angel咁⋯ 好!你記住聽朝早準時出門返cafe呀!Priscilla成日話我哋遲到呀!希望我唔喺到嘅時候你會準時啲啦~




你的愛人
梁敏晴
——————————————————

============================

喺意外前嗰晚,我太興奮,所以瞓唔著,所以我行咗出廳攞水,但見到Kelsey間房著咗燈,所以我入咗去⋯

我:「做咩咁夜仲唔瞓呀?聽日睇婚紗喇喎~」但佢卻依然專心咁對住張書枱,好似寫緊啲嘢,我偷偷哋咁行到佢隔離
「喂~做咩唔瞓呀?」聽到我講嘢嘅佢即刻收埋張嘢

Kelsey:「你⋯你幾時喺到㗎?」佢雙眼喊到腫哂,睇到佢咁樣我好心痛

我:「sorry...係咪嚇親妳⋯」見到佢雙眼望實喺枱上面嗰封信
「咪黎㗎?邊個俾㗎?」正當我想攞嘅時候,Kelsey一嘢推開我



Kelsey:「無⋯無嘢呀!諗返聽日有得著婚紗,好感動啫...」講完便一邊推我出房,一邊講:「唔好理喇!去瞓覺瞓覺!」

我:「我就係瞓唔到吖嘛⋯」

Kelsey:「咁我同你瞓喇~」

我:「好喎~咁就⋯」

Kelsey:「唔準諗衰嘢啊!」

我:「無~邊有啫~」

=================================



「點解要寫呢封信呀⋯」我眼淚好似瀑布咁不斷湧流,一發不可收拾
「我叫妳有plan B,唔係叫妳寫遺書呀⋯」我終於知道佢最後同我講咗啲咩⋯

「對唔住⋯再見⋯我愛嘅人」



「如果我有得揀嘅話,我希望自己從未識過妳,因為咁⋯我就唔洗失去妳⋯」