《純愛》平安夜的天使 (完): 第七十章

第七十章

「嗯～好好食呀～」

「點解妳可以食個西多都咁開心嘅⋯」

我拉咗曉桐出去之後，佢就拉返我轉頭，拉咗我返去文叔間茶餐廳食飯

文：「喂！阿遊你哋黎食飯呀？」



我：「係呀，難得今日唔洗返足全日，咪諗住過黎食個下午茶囉～」

文：「哦～收到收到～」佢呢句嘢話中有話，大概意思係「哦，見有時間同女女食埋嘢先返去，明白明白～」，唉⋯
「隨便坐呀，反正現加無人⋯」上次我哋四個人係大約八點半到先黎茶餐廳，裏面坐滿哂各式各樣嘅人，而現加卻空無一人，真係天淵之別⋯
「想食咩呀你哋？今餐我請呀！」

我：「唔洗啦，下次先⋯」其實我何嘗唔想俾人請食飯呀⋯ 但係如果要一個五十幾歲，仲要日日成身大汗先搵到食嘅大叔出錢黎請嘅話，我都唔好意思啦⋯

文：「好呀，下次先！咁⋯你哋食咩呀？」



我/Lavina：「西多呀。」

文：「哦～咁識食呀～咁你哋飲咩呀？」

我/Lavina：「奶⋯」連個「茶」字都未講，我就望住佢
「喂🤨我食乜，妳又食乜⋯有無咁啱得咁橋呀？」

曉桐佢先同文叔order咗杯奶茶之後，就同我講：「咁我係鐘意飲奶茶吖嘛～同埋喺茶餐廳，唔飲奶茶飲咩呀？」

我：「有檸茶呀⋯」



Lavina:「飲檸茶就去七仔買喇～」

我：「又點⋯」我睇黎明佢想講咩啦⋯佢想飲嘅原因唔係因為好飲而飲，而係杯嘢帶黎嘅感覺同回憶⋯

Lavina：「明啦嘛？哼～」

我：「知喇知喇⋯」如果之後有日妳唔再喺我身邊吵吵鬧鬧，我都唔知點算好⋯我已經習慣咗妳喺我嘅身邊啦⋯


「妳嘅美，就如紅玫瑰般吸引奪目。但我怕觸碰到妳之後，會令自己傷痕累累⋯」