第七十五章(曉桐章九)

「係呢⋯」

「做咩呀?」

食完飯之後,如常咁行去巴士站,同第一次同佢行嘅時候一樣。隔咗一陣之後,佢主動鼓起勇氣開口去講俾我聽。但唔同嘅係,係曉桐講自己嘅過去⋯

Lavina:「其實,我之所以會去問鄧sir關於呢個病嘅事係因為⋯呢個病同我爸爸有關⋯」佢講到呢到,我見到佢雙眼眼眶開始有眼淚湧出,但都強顏歡笑咁忍住,繼續講落去⋯
「我爸爸佢以前係一個商人,一個好成功嘅商人。但直到佢被合夥人喺背後偷用資金,導致差咗人一大筆債,最後仲破埋產⋯我爸爸亦因此患咗躁鬱症⋯ 最後⋯最後跳樓自殺⋯」


—————————————————————
=================================

「See you tomorrow~」

「See’ya」

嗰日我係喺紐西蘭最後一日返工,原本後日就會返香港⋯我行緊返屋企嘅途中,收到媽媽嘅電話⋯

我:「喂?媽?做咩呀?」喺電話另一面嘅媽媽卻咩都無講,只係聽到佢細細碎碎聲嘅嗚咽聲⋯



媽:「妳爸爸⋯爸爸佢就唔得喇⋯快啲過黎」

我:「發⋯發生⋯」話口未完,佢就cut咗線⋯當我仲一頭霧水嘅時候,我平時睇中文新聞嘅app彈出一個訊息:
「一名48歲中國籍姓周男子從一座大廈六樓墮下,沒有留下遺書,情況危殆。現時在城市醫生接受搶救⋯」我媽媽之前話住唔慣啲矮屋,所以搬咗去啲類似喺香港嘅高樓⋯而我哋就係住六樓⋯

嗰刻我腦海一片空白。我失去咗理性。過咗咁多年,我爸爸啱啱先開始好返,我仲以為我哋終於可以一齊返香港,喺到渡過難關,一家團聚咁安安穩穩咁繼續生活落去。我唔敢相信爸爸佢竟然會咁做⋯

我馬上跑去巴士站上咗架巴士去嗰間醫院,我忍唔住雙眼嘅眼淚,由佢流吧⋯我已經做定心理準備,因為喺咁高嘅位置跳落下,救得返嘅機會就係微乎其微⋯



到咗醫院之後,我已經做定最壞打算⋯ 現實亦如我預計嘅一樣⋯ 而我就只可以死忍住我自己嘅嗰股無盡嘅痛,將所有情感都收埋喺眼底,心底裏面。我唔想媽媽擔心同埋⋯我想話埋俾自己聽:無論我點講、點喊都好,佢走咗就係走咗,都係唔會返黎⋯


「每個人笑嘅原因都唔同,既可以為開心。同時,亦可以為咗掩蓋在心中數不清嘅傷口。」