《純愛》平安夜的天使 (完): 第八十五章

第八十五章

「Auntie 好耐無見⋯」

我一枝箭咁衝返去Cafe。開門之後，阿倫馬上用眼神同手勢示意我攞杯Macchiato，再慢慢行去Auntie所坐嘅位置。我見到枱上已有幾個空杯，睇黎佢都黎咗一段時間⋯佢靜靜凝望住窗外嘅街景，眼神帶住落寞嘅憂傷，一頭短灰白頭髮同雙眼下面那深重嘅黑眼圈，睇得出佢對個女嘅思念之情⋯

Kelsey媽：「黎咗喇，何永遊？」佢嘅聲線中依舊帶住些許嚴厲考官嘅感覺，Kelsey話佢以前一直都好驚佢阿媽，我一直都唔明，直到我上咗佢屋企食飯⋯

=================================



Kelsey媽：「你就係佢嘅男朋友？」

我：「係呀，Auntie⋯」閂咗門之後佢就好似連珠發砲咁不斷問我問題⋯

「點解會鐘意我個女呀？」

「你哋係邊到識㗎？」

「你有冇諗住同我個女拉埋天窗㗎？」



「你將來諗住做咩呀⋯」

喺隔離嘅Kelsey爸粒聲都無出，除左我臨走同我講咗一句「88」之外，就再無同我講過嘢⋯ 不過好在Auntie對我嘅印象都唔錯，所以先俾Kelsey同我同居⋯ 不過開Cafe呢件事Kelsey並無同Auntie講，因為如果俾Auntie知道，佢肯定極力反對，不過喺想同Auntie講清楚之前，Kelsey就⋯
=========================

我：「係呀Auntie，好對唔住⋯我一直都無同妳講有關呢到嘅嘢⋯」

Kelsey媽：「我都好明白嘅⋯都過咗兩年，當年我個女同你一齊之後日日都笑住咁返屋企，我好難得見到個女會識得笑，我一直都唔明⋯直到我黎到呢到，我就明白⋯係你改變咗佢⋯」呢一刻，Auntie把聲不知不覺軟化咗好多，喺佢帶點顫抖嘅聲線入面，我感受到為人母親嘅溫柔藴藉⋯

我：「係我哋互相改變對方啫⋯呢到嘅室內設計都係佢一手一腳自己設計出黎，佢⋯」同Kelsey嘅回憶再次喺我眼前出現⋯



「喂，唔係放呢到呀！」

「衰人，專心做嘢呀！唔好眼甘甘咁望住我呀～」

「喂，我哋不如等間去文叔到食飯咯～」

回憶如重拳咁不斷痛打我嘅心臟，提醒住我Kelsey已經唔喺到嘅事實⋯

Kelsey媽：「我今日黎，係想確認一樣嘢⋯」

我：「妳講呀⋯」


「當年係咪我個女救咗你？」





「縱然我哋過去嘅過犯可以隨住時間被沖淡、被遺忘，但罪名仍然跟住我哋一世。我哋唯一可以做嘅，就係抱住贖罪嘅心好好生活落去。」