第一百章

「兩杯Latte,三杯Mocha order!」

「好,一共⋯」

一切塵埃落定之後,我嘅生活又再次回到忙碌嘅日常。不過唔同嘅係,我哋每個人都開始咗人生嘅新一頁。阿倫同Priscilla打算大約下年結婚,阿輝同Jody就一早幸福美滿,個仔青靚白淨。三丁友淨返我一個,不過⋯我諗我都差唔多要結喇⋯

「88~」去到六點幾,最後一個客走咗之後,成間Cafe除咗我哋就空無一人。今晚係平安夜,大部分家庭或情侶都去晒啲高級餐廳或酒店食自助餐,所以無咩客。同埋今日係⋯



Lavina:「咦?阿遊呢?同埋做咩提早閂門嘅?」

倫:「哦~咁今日呢⋯就平安夜啦~所以~」

「叮叮~」「曉桐姐~」

Lavina:「阿Mel?」

Mel:「我黎開P㗎~」



Lavina:「吓?」

「啪!」室內嘅燈光完全熄滅,我哋喺黑暗中點起一枝又一枝嘅爉燭⋯
「Happy birthday to you~ Happy birthday to you~ Happy birthday to Lavina~ Happy birthday to you~」

我慢慢咁將我偷偷地整嘅蛋糕放喺曉桐面前。個蛋糕成三層高,面層鋪滿咗果漿同各種水果同朱古力。喺鵝黃色嘅燭光下,我見到佢嘅雙眼閃動住晶亮嘅眼淚,面上泛起嘅笑容充滿住感動。

Lavina:「你⋯你整㗎?」

我:「嗱,我整得好辛苦㗎⋯妳唔好一嘢食⋯」話口未完,佢就已經衝咗上前攞起支叉開始狼吞虎嚥⋯


「晒⋯」我見住佢滿嘴忌廉同果漿,我已經覺得好心滿意足。

Lavina:「放心啦,我哋會留返啲俾你嘅喇~黎,各位,開餐~」

眾人:「好!!」

倫:「今晚開盡佢~聽日唔洗返~」

Priscilla:「發夢啦!」講完就一嘢打落阿倫個頭到

眾人:「哈哈~」

過咗一陣之後

「叮叮~」係阿輝佢哋一家



阿輝一邊指住我個頭,一邊用眼神來暗示喺另一邊嘅曉桐:「喂~阿遊,恭喜晒喎,中咗頭奬~」

我:「你咁算咩意思先🙄」

輝:「哈哈~」

另一邊廂,Jody、阿Mel、Priscilla同曉桐喺第邊繼續大聲討論有關個BB嘅嘢⋯

「BB叫咩名呀?」

「BB好得意呀!」

「生仔係咪好痛㗎⋯」唉⋯睇黎下個受難,呀唔係!係有幸可以組織家庭嘅會係阿倫~你話我?我有排啦~



阿倫黎我耳邊同我講:「喂死仔遊,帶下人哋去睇燈飾啦,人哋應該好耐無睇㗎喇~」

我:「好喎~」
「曉桐,我哋不如出去行一陣先,去睇下燈飾咁~」

Lavina:「好喔😮Let’s go~😝」我哋都去咗攞我哋喺上年著外套,我就著返見黑色外套,而佢就著返白色毛衫⋯好有當年第一次見到佢嘅感覺⋯

之後我哋一邊行到海港城到睇燈飾,嗰到嘅燈飾光芒四射,有著住鮮紅色衫聖誕老人,亦有淺褐色嘅馴鹿,各色各樣嘅聖誕燈飾都聚集晒喺呢到⋯

「個聖誕老人好似你咁肥呀!」

「妳個鼻好似隻馴鹿一樣咁紅喎~」

「喂呀!」



「哈哈~」

最後我哋行到天星碼頭,一切嘅開始⋯

我:「估唔到我會以咁嘅形式見返妳⋯」

Lavina:「我都覺得好神奇,估唔到咁都遇得返你⋯」

我:「話時話,妳當年點解會攞住枝香檳嘅?我一直都好好奇⋯」

Lavina:「嗯⋯ 捉到我咪話你知😜」講完就即刻跑開

我:「喂!唔好走呀!」

Lavina:「嘻嘻,拜拜你條尾~」



我:「啊~妳個衰婆呀~」過咗個幾月,對腳都叫適應返跑步,所以兩嘢就捉到佢⋯ 我用雙手攬住佢,全神貫注咁望住佢,呢一刻嘅世界,就好似得返我哋兩個咁⋯
「我唔會再俾妳走㗎喇,妳係我㗎。」

Lavina:「我都未⋯」我一嘢錫落去佢個嘴到,我之前一直都無鼓起勇氣咁做⋯現加嘅我,終於可以好好咁去愛一個人⋯
「不如⋯返去咯?」

「吾~」佢個肚亦都隨即發出肚餓嘅訊號

我:「仲食唔飽咩?」

Lavina:「咁鬼叫你個蛋糕咁好食咩~我唔理呀~你一個禮拜整一次俾我食呀!」

我:「吓⋯要整好耐㗎喎⋯」

Lavina:「頂多我睇住你整,再幫你食埋佢喇~😝」

我:「唉真係呀⋯」

講完佢便向前行,呢刻我望到佢嘅背影,卻再無諗起Kelsey或者Angel,而係一個會好鐘意發小朋友脾氣嘅小衰婆,一個純白色嘅天使⋯我嘅嘴角不知不覺間向上翹起一個幸福嘅弧度,呢刻嘅我⋯終於搵返自己嘅快樂⋯

我個名叫何永遊⋯

「阿遊,做咩仲企喺到呀?」

「無呀,行咯~」

我係一個⋯

「我要你孭~😊」

找回生命中最愛嘅人⋯

「好呀!😄」



「我哋每個人都經歷過迷惘嘅時候,但上天總會為你預備一個帶你走過傷痛絕望嘅天使。然後,我哋自己都要成為救贖其他人嘅天使。因為,天使亦都只係一個曾經受過傷,但係勇敢面對,企返起身嘅人。」

平安夜的天使,完?