二部曲《你聽說過嗎？奈良夢幻樂園》實體書已上架: 入園者後果自負
《聽說過日本的恐怖樂園嗎》
02 入園者後果自負
奈良夢幻樂園不止充滿廢墟獨有的神秘感，我和里奈在拍照期間更發生了一件令人心寒的事。
話說過了大概四十五分鐘後，接駁小巴轉入小道，把我們一行八人丟到荒山野嶺的車路旁。
舉目所見盡是樹林，既沒建築物也沒路牌，路上不要說行人，連車都沒有。
「呢度邊度嚟㗎？」里奈開始霸氣外露，半帶逼問小背心領隊：「起碼講個大概位置啦？」
領隊擠出活潑的笑容，實情拒答：「咪目的地附近囉，行幾步就到喇。」
說罷她率先鑽入樹林裡面。
「都唔知點解旅行社會搵個女人嚟帶隊。」日本型男抱怨。
鬼妹聳聳肩、邀請大家一起跟住行：「上網見人講個廢墟確係遠離市區、俾一大片森林包圍住，所以要行一陣山路先到。」
眾人只好紛紛舉步。
久美子說：「可能因為咁，好少人知道Dreamland喺邊。」
「要行幾耐㗎？好多蚊呀！」里奈瞪我。「加你錢㗎，工傷呀。」
被蚊叮哪算是工傷呀？我不禁覺得好笑。
鬼妹見狀說：「大約十分鐘啦。你哋係情侶？」
「唔係啦。」我答。「我叫Cole，佢係里奈。你呢，自已一個嚟？」
「Octavia。」她說，應該是她的名字。「說來話長啦，呢一刻我係一個人。」
「咮！嘈少陣啦！」我們整隊人閒談了幾分鐘，日本型男翔唐突地打斷我們，示意我們跟著小背心領隊一起蹲下來。
終於走到森林的盡頭，草叢外面是一片空曠的水泥石平地，奈良夢幻樂園的正門入口正在前方。
有輛黑色私家車駛過。
「果架係巡邏隊，如果俾佢哋發現就大獲喇。」領隊壓低聲音說。「架車走之後我哋有十分鐘左右拍攝時間，之後要一齊入去樂園，因為下一架巡邏車會喺十五分鐘後再嚟，明唔明白？」
意思是每十五分鐘駛來一次吧，現在十點鐘，下一更是十點十五分。以提防違法入園者的措施來說，十五分鐘一更未免太密了吧？
我問：「你頭先就咁停架車喺路邊，唔驚啲巡邏隊發現咩？」
「佢哋唔去果度啦。」
「好刺激呀！」日本妹三人組的彩香興奮道。
「記住呀，」小背心領隊語重深長地叮囑。「一聽到我指示，大家唔准留低，要準時入去，如果唔係我救你哋唔到㗎！」
Octavia笑著問：「最多咪俾警察拉走，罰小小錢就無事啦？」
小背心卻無視她，對我們說：「依家！過去喇！」
果然參考美國廸士尼為藍圖，夢幻樂園正門是一座小古堡設計，中間掛有寫上“Dreamland” 的大招牌。從剝落褪色的油漆裡，可以幻想當時那色彩斑斕的歡樂氣氛。
只見現在雜草叢生、地上豎有「立入禁止」的牌子、牆上柱子上留有塗鴉沒人洗刷，一片充滿神秘感的肅殺冷清。或許這正是我鍾情廢墟拍攝的原因吧。
除了我、里奈、Octavia和翔，另外三個日本妹三人組根本不是為了拍攝而來，她們頂多用手機來自拍一下，看來是為了好玩的心態來。
期間翔不斷吹噓自己得過無數攝影獎，又暗示日本妹三人組柒廢。
這到底是日本大男人主義，還是翔本身乞人憎呢？
大約十分鐘過後，小背心領隊指示大家往圍在正門前的木板移動，她摸索了一番，推開了其中一塊木板的下半截，洞口很細小，只夠一個人半蹲身子越過。
「一個一個捐過去啦，唔好再留喺度。」她緊張道。
大家聽話續一爬過。
但不曉得是否知道巡邏隊未夠鐘過來，日本妹三人組的純子仍陶醉於自拍世界裡，忘我地與「立入禁止」的牌子合照，連領隊與友人焦急地催促也渾然不知。
「喂呀，成村人等佢一個呀大佬。」里奈氣鼓鼓的樣子倒是蠻有趣。
「唔好意思呀咁多位，純子成日都係咁㗎，失禮晒。」彩香臉紅地替純子向我們道歉。
擾攘一輪，全部人終於順利在巡邏隊發現前入園，小背心領隊把木板重新蓋好的一剎，車子的引擎聲自外面傳來。
好險！
首先映入眼簾的是貼在木板背後大大張紅字的警告告示。
「大概係警告我哋，」Octavia問里奈上面的意思，里奈翻譯說。「呢度係私人地方，入園者犯咗重罪，一律受到嚴重懲罰、後果自負。依家係我哋最後機會離開，請好好三思。」
三人組的久美子擔憂說：「寫到好嚴重咁，不如我哋出番去啦，反正都影咗門口，用嚟打卡夠晒啦。」
「吓，嚟之前都預咗係咁神神秘秘㗎啦。」里奈直率道。
翔喃喃：「通常啲恐佈片開頭都係咁，啲人唔會理然後會陸續死晒……」
＝＝＝待續＝＝＝
睇番對上寫果個工廠故原來連登有3百幾個正評，
希望呢次可以突破上次嘅數字啦
大家幫幫手俾吓Like/正評/留言吧，
對我呢啲唔出名嘅寫故人，已經係最大嘅支持！
請Follow：
連登
http://lih.kg/bmNPQS
fb: 橘子綠茶
https://www.facebook.com/greenizmstory/
ig: greenizmstory
https://www.instagram.com/greenizmstory/
最快知道有故事更新，記得follow同「搶先看」 fb
另外，fb裡面嘅相薄有齊晒我嘅其他故