《聽說過日本的恐怖樂園嗎》
04 失蹤




奇怪的旅行社安排、荒涼廢墟裡憑空出現的人影、陰森玩具店裡突如其來響起變調的音樂……種種詭異使我整個人被嚇得呆若木雞。

***
警告:
本小說含血腥、暴力、色情描述,未滿十八歲請勿閱讀。




本小說不鼓吹任何暴力/虐待行為,切勿模仿。

***

里奈先反應過來,大膽地走入玩具店更裡面尋找音樂來源。

為免顯得太不濟,我硬著頭皮跟上。

隨著愈來愈接近音樂來源,音樂愈見大聲。

「哈!哈!哈!」里奈驀地止步、捧腹大笑。「嚇得我吖!以為咩嘢嚟!」





在店裡幽暗的角落處,竟然有一個小火車湯瑪士玩具被擱在地上,發出奇怪的聲音。

大概因為想起惡搞小火車的照片,我也跟著抿嘴笑。

「——但、但係……」我的嘴唇有點發抖。「呢件玩具咁新淨,點睇都唔似擺咗喺度好耐喎……」

她緊張問:「你意思係有人嚟過擺低佢喺度!?」

「而且無啦啦件玩具點會自己識響呀……」





彷彿要回應我的話一樣,音樂毫無先兆地遏止,不再響起。這說明了玩具並不是因為零件壞掉而間歇響起,是要手動按鍵才會響音樂。

換言之,有人來過。但玩具店只有一個出入口——剛剛正被我們堵住,如果有人離開一定要經過我們……

「吓……?!」她一愕。「呀,差唔多夠鐘喇,我哋早小小番去集合地點先啦。」

她道出我的計劃:既然解釋不了這帶點滑稽的詭異湯瑪士,我們只好逃之夭夭。

「你哋無事嘛?面色咁差嘅。」回到集合地點,彩香探頭問我和里奈。

「頭先——」我想說出剛剛的事。

為了不要影響其他人的心情,里奈打斷我並轉移話題:「——無咩事,咦,呢度邊度嚟㗎?」





純子手機好像拍了泳池,明明剛才沒看見。

「好喇,」領隊開心地帶我們移動。「齊人咁我哋可以去下一區喇,水上樂園。」

「喔,」純子吐吐舌答里奈。「頭先行吓行吓,行咗去水上樂園果度咪順手影吓。」

其實夢幻樂園面積不大,看起來跟香港的迪迪尼差不多,我們走了幾步就到水上樂園,純粹是地板和裝潢不同風格,才讓人有來到另一區的感覺。

區內遊玩設施相當多元化,三條超長滑水梯、游泳池、類似燈光秀的水池等等,可以幻想當時穿著泳衣的大小朋友,雀躍地跑來跑去那熱鬧光景。

可惜人們有了其他主題樂園,早已把這裡忘得乾乾淨淨。風光過後遺下來的只剩下頹垣敗瓦。

「仲以為會乾晒塘,點解個個池都咁滿水嘅?」Octivia自言自語。

「可能呢度夜晚仲有人會嚟玩呢……」翔再次惡作劇地說。





經過詭異湯瑪士事件,里奈像是自我安慰地試圖解釋:「又亂講!你望吓池水先啦,咁混濁又生晒雜草咁,應該係落大雨果陣儲起啲水啫!」

「呀!」久美子突然一叫,令所有人都看到。

手拿斧頭的面具人站在遠處的人工湖旁、面朝我們這邊——那種笑得嘴巴扭曲的小丑面具,倒跟我們的團章有點相似。

「喂!嗨!」Octivia大叫並向他邁步。鬼妹仔果然不同凡響。

領隊出手拉住Octivia:「唔好騷擾人哋啦。」

小丑男無視我們,轉身往反方向跑走。

「呢度好多呢啲類遊客。」領隊解釋。





「都唔會拎斧頭又戴啲咁嘅面具掛!」純子說。

我壓低聲音問:「頭先你見到係咪呢個人?」

里奈答:「戴嘅面具唔同,唔肯定係咪同一個人。」

「唔通頭先個詭異湯瑪士係佢擺低嘅?」

里奈聳聳肩:「鬼知咩。」

「可能想影啲特別效果相啫,」久美子答純子。「唔好諗咁多啦。」

小背心領隊簡單講解一下後,自由活動時間再次開始,可是十分鐘回到集合地點時,我們當中有兩個人失蹤了。

——小背心領隊和日本妹三人組的純子。





要知道守時恍如日本人與生俱來的天性一樣,我們足足多等了十幾分鐘還不見人,久美子和彩香開始由不好意思變為擔憂了。

彩香幾乎要哭地說:「頭先我哋仲話要上去滑水梯度影相,轉個頭就唔見咗佢喇。」

久美子附和:「以為佢番嚟呢度先,你哋真係見唔到佢?」

Octivia提議:「不如開手機打俾佢啦?」

「但領隊又話唔可以開手機嘅。」里奈說。

「依家緊急關頭,而且連領隊都唔知行咗去邊……」我率先掏出手機。

只不過,全部人的手機均沒有訊號。

===待續===