昨天的我，被前女友禁錮: ＃16

 「咁我呢？咁你點解又要將我禁錮喺度？」

    「我頭先咪講咗囉，唔係我想禁錮你。係Annie想禁錮你。」

    「因為佢想將我變成Matthew？」

   「唔單單係咁樣。」

   Kate第一次在我面前露出笑容。



   「因為佢想報仇。」

   「報仇？」

   我突然記起Annie歇斯底里的喊叫。

  「但係、但係我都冇殺到Matthew⋯⋯係你！明明殺咗Matthew嗰嗰係你，你仲誤導佢，等佢以為我殺咗Matthew，等佢人間蒸發？」

   「喂喂，等陣先。我無殺過Matthew。殺死佢嘅係Vivian咋。」



   我終於明白自己的怒火從哪來。不，不是，我對Vivian的厭惡單純是生理上的，現在的我，只是找到仇恨她的入口而已。

   「不過我認，我的確有向佢暗示過殺Matthew嘅人係你，只係我諗，Annie並唔係咁鍾意Matthew。」

   「咩意思？」

   「我嘅意思係，佢一直鍾意嘅人，都係Tom你啊。」

   「冇可能。」



   我的腦還沒有意會到這句說話的真正意思，嘴上就立馬否認了。

   「如果佢真係鍾意我，咁點解佢要同Matthew一齊？點解咁耐以嚟，佢都冇搵過我、唔返去我身邊？點解要將我禁錮？點解要將我調教成Matthew？仲有，點解佢呢幾日都冇嚟？」我猛然倒抽一口氣，「你、你將Annie殺咗？」

  「我緊係唔會咁做啦，Annie仲在生，不過，佢已經唔想見到你。」Kate裝作無奈地攤攤手，「又或者，佢唔知道自己仲可以見到你。」

   難道⋯⋯我還沒有開口，Kate就已經回道：

   「我話咗俾佢知，你已經自殺死咗啦。」