是咁的，我嘅職業係幫人瞓覺: 五十六、笑容係面具
夢係一個媒介，用扭曲嘅方式展現被壓抑嘅潛意識，但終究唔係現實。
酒精係一個工具，令人頭暈眼花，將人嘅表意識打亂，令被壓抑嘅潛意識得以擁有更多話事權，控制一個人嘅言行舉止。
點解幸福嘅人唔會沉浸喺酒精嘅泥沼，係因為佢地嘅潛意識本身就處於唔需要太壓抑嘅狀態。
當一個人酒前酒後嘅性格同行為舉止判若兩人，你就知佢將真實嘅自己收得太埋。
以真面目面對世界嘅人，根本唔需要借酒精嚟短暫咁拆低面具。
我有個朋友，同女朋友分手之後，面對我地嘅問候，佢每次都笑笑口話無事喇，有時會面色一沉，話無諗喇，算啦，放低咗喇。
直到有一次成班兄弟去飲酒。
佢醉咗，本來仲同我地有講有笑，但笑聲漸漸變成喊聲。
眼淚喺佢大笑嘅面容上滑落，笑到昂高嘅頭慢慢耷低，成班兄弟靜哂，佢好似個細路咁喊。
「我放唔低呀⋯⋯」
笑容係面具，酒係溶解面具嘅溶劑，展現笑面迎人背後嘅淚水。