是咁的，我嘅職業係幫人瞓覺: 六十三、成長

房內繼續播放舊日嘅影像。

婷婷索乾鼻水，拎起枝波板糖舐舐，又冷靜翻落嚟。

我好奇心又發作，枝波板糖點解會咁神奇架呢？

「你確定要陪我繼續睇？」

佢點點頭，用力到個眼鏡都差啲跌。





我幫佢托返好，佢就拖住我隻手，陪我直視眼前嘅過去。

我感覺到，佢依家嘅手，更加有力。

人喺孤獨嘅時候無辦法唔堅強，因為就算軟弱都無人可以依靠，只可以靠自己。

但依種只係被逼出嚟嘅堅強，唔多唔少帶住無奈。

而婷婷拖住我嘅手，隱隱傳嚟一種堅定嘅力量。





之後無論再睇見咩影像，婷婷都無再流過眼淚。

佢同房內嘅喊哂口嘅婷婷形成對比，一個喊一個唔喊，或者依啲就係叫做成長。