是咁的，我嘅職業係幫人瞓覺: 六十九、膠布
留意返，喺我嘅角度睇係確定阿婷出軌。
但喺阿朗嘅角度睇，佢只係覺得阿婷冷淡咗，佢知道段關係出現咗問題，但佢唔知道問題喺邊度。
做人最慘就係唔知問題出喺邊度，為咗解決問題而出盡法寶，但無辦法對症下藥，就只係浪費時間。
阿朗係一個善良嘅男仔，因為佢感知到關係有唔妥嘅時候，即使唔知問題癥結喺邊，依然第一時間認為係自己做錯。
「婷婷呀，我知我地近排少咗好多時間一齊，所以有啲疏遠咗咁。你又忙我又忙，搞到我好似冷落咗你咁。嗱，依份禮物送畀你架。」
阿朗遞份禮物畀阿婷，而阿婷留意到佢啲手指痴咗膠布，但係視而不見。
如果伴侶見到你受咗傷都無問咩事，咁你就知咩事。
紙袋入面係一個未見過嘅毛公仔，但有啲熟口熟面。