是咁的，我嘅職業係幫人瞓覺: 九十六、關於金錢

我嘅能力面對今次嘅情況會出現幾個大問題。

首先就係契約時間，一旦我喺腦入面設備好時間幾長，咁契約訂立之後我就會瞓返幾耐。

正如我啱啱所講，恆媽幾時斷氣係無得控制嘅變數嚟。佢可以遲死可以早死，亦可以啱啱喺正我入去嗰陣拉柴，完全無得預測無得控制。

然後係我雖然可以被外界叫醒，但係無方法通知外界嘅人叫醒我。

「放心！心電圖機喺媽咪心跳減弱嘅時候會響！我一聽到依個訊號就叫醒你咪得！」





又被佢諗到喎⋯⋯

唔得，投資報酬率太低，未知嘅風險太多，依單生意唔抵做。

恆仔拎起一直放喺床對面梳化嘅皮箱，打開對住我。

係咪拍緊賭神哂冷嗰啲鏡頭？依啲係⋯⋯一千蚊磚喎。

我走去揭下啲一千蚊紙，無揸流攤架喎，中間無攝白紙，真係張張都真金白銀嚟。





粗略一數，已經係百幾二百萬。

「恆仔，錢嚟講呢，我就真係唔缺嘅。」

話哂都係唯一一個幫到人瞓覺嘅超能力者，肯畀巨款我幫佢地手嘅人真係數之不盡，百幾二百萬我都唔放在眼內。

同埋最大問題係我唔知啲錢應該使喺邊度，一個人無乜慾望的話其實唔使用好多錢。

你畀十億釋迦牟尼，你覺得佢會買乜呢？





我會幫人瞓覺，其實最主要都係想深入其他人嘅潛意識世界，睇下佢地嘅故事啫。

但今次睇個故事都可能無命，咁我梗係寧願唔睇啦。