是咁的，我嘅職業係幫人瞓覺: 一百一十三、同一首歌

係tonick喺youtube上面出新片嘅通知。

我將ipad交返畀恆仔，佢有啲難以置信咁望住螢幕上嘅通知。

「無理由架⋯⋯」

「都subscribe咗好耐吓。」

恆仔解鎖，彈入youtube畫面。





睇個款似係恆媽偷偷地subscribe咗但無話畀恆仔知。

你記唔記得你話我聽嗰隊tonick啲歌唔夠sam哥嗰啲咁高質？

恆仔皺住眉，喺恆媽個帳號入面見到佢只係subscribe咗tonick。

手指移向「播放紀錄」，㩒落去，切換出嚟嘅畫面又再令我同恆仔嚇咗一跳。

由上而下一掃，載入中⋯⋯再掃，載入中⋯⋯無論恆仔向下掃幾多次，播放紀錄都只係得同一段片。





每聽完一次就重播，每聽完一次就重播。

恆媽直到自己唔記得有部ipad之前為止，不停不停咁聽一首tonick嘅歌。