是咁的，我嘅職業係幫人瞓覺: 一百三十、熟口熟面

恆仔打開厚重嘅病房木門，入面有一個瘦到得返皮包骨嘅禿頭女人瞓喺床度。

身邊嘅醫療器材發出有規律嘅「嗶，嗶」聲，佢手臂上連接住嘅膠管，嗎啡順住管道流入女人嘅體內。

淨係睇到佢個憔悴樣都覺得辛苦，嗎啡嘅效用有幾大真係令人懷疑。

「對唔住，我講咗個大話。」

既視感⋯⋯我好似之前已經見過依個場面，聽過同一句對白。





如果無估錯，恆仔下一句對白就係⋯⋯

「我想你幫我媽咪瞓覺。」

Bingo！

問題係恆媽就嚟死，我幫佢瞓覺嗰陣佢釘蓋，就會成個意識世界消失，我嘅意識都會一齊消失。

「錢我已經幫你準備好。」





啪咔一聲，恆仔打開有好多錢嘅皮箱。

好多情景都熟口熟面，但你問我喺邊度見過我又答唔出。