是咁的，我嘅職業係幫人瞓覺: 一百七十三、夢境相連

三個夢境係相連，係我貪得意走入夢之迷宮之後出現嘅⋯⋯心結、遺憾同願望。

「我喺你嘅夢入面見到佢。但⋯⋯我唔明⋯⋯佩芝又係邊個？」

余先生忍唔住笑，我記得幫佢瞓覺之前佢同我講過佢就係喺連登上狙擊肥婆嘅雞頭小嘴。

「余佩芝咪我筆下嘅肥婆囉！」

迷宮入面嘅余生都提過唔開心就上下連登⋯⋯





「不過其實個名都係源自我個ex嘅。佢全名叫沛芝婷，啊，唔係敬佩個佩，係充沛個沛。拎咗佢個名嚟用啫。」

佩芝、阿婷、沛芝婷⋯⋯

「係咪因為佢叫芝婷，所以英文名叫cheese呀？」

余先生開始皺眉頭，行埋嚟拎返走個至尊寶公仔。

佢實係覺得我好奇怪，瞓完一覺知咗佢咁多私人野。





我即刻喺梳化上正坐，喺迷宮太耐令我幾乎唔記得咗本身喺現實嘅記憶。

余先生坐喺我旁邊：「係。你幫我瞓覺嗰陣，見過啲乜野嚟？」