是咁的，我嘅職業係幫人瞓覺: 一百八十七、被打與打人

「喺你偷睇我電話嗰日，我就知咩叫死心。」

阿婷因為咁而同余生分手。

「我地今日嚟，係想話你知，我地準備緊結婚。」

心跳好似停頓咗一秒，抖唔到氣。

「點⋯⋯點解？」最唔想聽到嘅說話，被最熟悉嘅聲音講出嚟。





阿邦同阿婷同一時間伸手向對方嘅手上，緊握。

依種默契，余生從來未體驗過。眼前依兩個人嘅一舉手一投足，都令余生感覺到成個身體被人慢慢撕成兩半嘅痛楚。

「我⋯⋯我要對阿婷負責任。」

責⋯⋯咩任呀⋯⋯負咩責任呀⋯⋯

無可能⋯⋯阿邦唔係嗰種會講咩負責任嘅男人，佢從來都唔係⋯⋯





「我地飲醉酒⋯⋯上咗床。」阿婷話。

余生嘅體內好似被人用重錘敲咗一下咁。

碰！

「你係我⋯⋯最好最好嘅朋友！」

阿邦倒地，余生扯起佢嘅衫領，又一拳，鼻血飛濺。





餐廳內一陣騷動，阿婷大叫停手，但余生依然繼續打阿邦出氣。

「但係點解！點解你要搞我最愛最愛嘅女人！」

血花、水滴。

一拳，阿邦嘅面容受到衝擊，血花同水滴一齊飛出。

被打嘅人流血。

打人嗰個流淚。

「停手呀阿朗！」