是咁的，我嘅職業係幫人瞓覺: 一百八十九、最後祝福

「既然你話我心入面嘅答案唔啱，咁你又覺得邊個先係事實？」

「我淨係提出疑問咋。依個世界本來就有好多問題係無答案。」

「咁你提出咁嘅疑問，到底有咩意義？」

「亦都無意義。」

余生有啲不解，皺起眉頭望住我。





「你放棄咗做老師，女朋友唔再愛你，好兄弟同你前度結婚。你絕對有權憎佢兩個，但既然我嘅疑問毫無意義，即係答案都根本唔重要。」

「咁咩先重要？」

最後一個迷宮嘅猶豫，余生因為搞清楚自己其實想去婚禮祝福阿婷，所以我先出返去心房。

即使過咗咁耐，心中滿懷憎恨同怒火，但喺火場最中心嘅願望，仍然留有愛。

或者有人會話，傻架咩，條女走咗仲返轉頭去祝福佢？不了不了。





但余俊朗就正如啲飛蛾咁，明知道會受傷都會撲埋去啲火度。

飛蛾就係咁傻架喇。

「你對阿婷，最後嘅祝福啊。」

唯獨依個喺迷宮深處嘅願望，係最重要。