是咁的，我嘅職業係幫人瞓覺: 二百二十七、我未至於咁衰格嘅

我起身行去檢查。

醫生話我知要點做，我跟住做。

瞓喺嗰部大機器入面，吽咗一輪就出返嚟，叫我等報告。

到出返去大堂嘅時候，miki同坐喺旁邊嘅細路女玩緊拇指摔角，兩個笑得好開心，為一片死寂嘅大堂帶嚟少少生氣。

我見佢地玩得興起，就自己行咗去櫃臺，同姑娘講畀錢。





miki好似察覺到，唔同個妹妹玩住，走咗埋嚟：「哦！你又話無錢嘅？」

「本身唔想嚟，求其搵個藉口呃你啫。」

假假地都係個超能力者，接接埋埋嘅生意同委託賺到嘅錢，雖然唔夠我成世唔使做，但區區一個腦檢查嘅費用又點會畀唔起？

「你都可以繼續呃我，由得我幫你畀錢架喎？唔係咩？陌生金？」

miki好得戚咁一路講一路撞我膊頭，好似好熟咁。





「我未至於咁衰格嘅。」

「你之前先講到無理由幫陌生人架喎，即係無理由幫我護住個荷包啦？但你自己畀錢喎？點解嘅點解嘅？」

miki好似個贏咗比賽嘅小朋友咁，實係覺得自己贏咗我⋯⋯好啦，佢係嘅。