是咁的，我嘅職業係幫人瞓覺: 二百二十九、收佢線

「你喺邊話？」電話入面嘅阿媽以為自己聽錯，突登問多我一次。

「我話我去咗驗腦呀。」

「你本身都腦殘架啦，唔使驗啦。」我阿媽係個毒舌婦人嚟。

「正經野呀，我有個朋友話我有啲奇怪症狀，驗嚟求個安心啫。」

「聽落似係老千想昆你水喎。」miki本身諗住幫我畀埋，邊有老千會動用自己荷包架？





「唔係呀，佢正常人嚟，唔使成日驚我被人呃喎。」

「做阿媽嘅係驚依啲架啦，驚個仔病、傷、痛、死、失蹤、辛苦、學壞、被人呃、唔開心同唔生性啫。你個腦殘仔確定唔係被人昆，我就要擔心你係咪病喇喎。」

「你又話返工好忙嘅？」

所以一開始搵阿媽都只係傳咗個訊息畀佢，因為我知佢忙到無時間講電話。

點知佢睇到個訊息竟然即刻打返過嚟。

「點忙都要問清楚你咩事先啦下話。」我好少可以喺阿媽嘅工作時段同佢有超過三分鐘嘅對話。

今次好難得，已經過咗三分鐘。

「無事嘅，真係求安心架咋。」

「你做乜咁遲先話我知要驗腦？之前都無聽你講過嘅？定其實唔係驗腦，係驗智商呀？我同你驗過架喇，係輕度弱智喎。」

「你就弱智，驗腦定測智商我會唔識分咩？」





「好難講架，你弱智架嘛。」

「唉，無你咁好氣，陣間份報告出咗再話你知點啦吓。」

「你確定你聽得明醫生講乜？」

妖！

收佢線。