是咁的，我嘅職業係幫人瞓覺: 二百三十一、救咗我一命

坐低之後，醫生單刀直入將檢查結果講畀我知。

我發現知道結果嗰一刻，反而無啱啱咁緊張，鬆咗口氣。好似細個要上台表演，永遠係表演之前最緊張，一行到台上就自然會放鬆返嘅感覺。

但取而代之嘅係一種徬徨，對未來嘅無助。

我到底應該點做好？有咩要做？會使幾多錢？有無得救？仲有幾耐命？

一大堆問題喺我腦中亂七八糟咁縱橫交錯，醫生察覺我嘅情況就叫我深呼吸。





醫生話初步估計係腦腫瘤，仲喺幅圖度指畀我睇確實嘅位置。

「個瘤嘅大細算係紮界，大約有三點六八公分大，我會建議你開刀切咗佢。」

我諗起miki帶我上嚟驗腦嘅情景。

「你好彩在個瘤嘅位置無壓住功能區，所以唔影響你日常生活之餘，亦好適合做切除手術。」

鬆咗口氣。





我依舊聽緊醫生講野，但心入面只有一個念頭不停徘徊。

miki救咗我一命。