是咁的，我嘅職業係幫人瞓覺: 二百三十四、救命恩人

姑娘好快叫咗清潔嬸嬸嚟抹地，期間我同miki喺咁同嬸嬸講唔該同道歉。

「做咩你啱啱咁激動嘅？」

清潔完之後我地兩個先走，miki喺𨋢入面咁問。

「因為多得你，我先執返條命仔。」

我將醫生同我講過嘅情況轉述畀miki聽。





「咁你真係好好彩喎。」

我搖搖頭。

「唔係咩好彩，係因為你。如果唔係有你，我唔會今日就發現到自己腦入面有個瘤。雖然你係因為我叫金仔所以幫我，但我的而且確因為你而得救。我啱啱真係忍唔住⋯⋯唔好意思，多謝你。」

「客咩氣吖。我都多謝你架，聽咗我講咁多野。多得你咁直接話我知我有咩問題，我先可以更加了解自己。」

𨋢門打開，到地下，我地兩個行出電梯大堂。





「你記得話我知之後去邊間醫院同幾時做手術喎，我會嚟探你架喇。」

miki露出笑容，好似春天盛放嘅花，令我心頭一緊。

「希望你會無事啦。」

我點點頭。

「你塊面紅咗喎，怕醜呀？鍾意咗救命恩人？」





miki毫無顧忌咁拎我嚟講笑。

「如果係分做鍾意同討厭的話，點都唔係討厭咯，話哂你真係幫咗我吖嘛。」

miki大大力拍我膊頭一下：「有吉士喎兄弟，夠膽間接表白！但我淨係鍾意金仔一個架咋，你死一條心啦哈哈！」