是咁的，我嘅職業係幫人瞓覺: 二百三十八、毒舌

miki望一望我，話自己練緊歌。

「如果我再有機會見到金仔，我一定會唱依首歌畀佢聽。」

啲歌詞，就好似miki想同曲金鉉講嘅說話咁。

依個時候，我手機響起，係阿媽打嚟。

「喂？出咗報告未呀？好鬼耐喇喎，你唔係真係聽唔明醫生講乜下話？」





miki自動將音樂聲收細。

「媽，我⋯⋯」

「得喇，即係有事啦？情況係點？末⋯⋯末期？」

我感覺到電話另一邊嘅阿媽好緊張，佢講野向來唔會有任何停頓。

「醫生話發現得早，只要盡快做手術，基本上無事咁滯。」





呼。

阿媽鬆咗口氣：「好彩有得救。有咩返屋企再講啦。有無話畀你老豆知？」

「未呀，今晚先同佢講。」

老豆同阿媽唔同，好神經質，如果我一早同佢講，咁我個手機就會被佢狂打嚟轟炸我，一秒都唔想放過要聽到最新消息。

所以我決定返到屋企面對面先話佢知。





「好，我今晚早啲返。你返去未？」

「返緊，坐緊朋友車。」

「朋友車？你有朋友買得起車架咩？」阿媽條毒舌又痕。

「係呀，多得佢我先及時發現咗個瘤咋。」

「又有車又救你一命！叫佢今晚留低食飯，伯母請佢食雞脾，阿媽我唔介意佢係男人架，有人要你你已經執到架喇。」