是咁的，我嘅職業係幫人瞓覺: 二百四十二、俄羅斯輪盤

佢咬一咬下唇，隔咗陣先答：「係我同金仔跳樓之前，最後聽嘅歌⋯⋯」

miki嘅手機較咗隨機播放，成千首入面咁啱就播中依首。

我見首歌都兩年前，喺播放清單中間偏低嘅位置，所以幫miki轉返做順序播放。

一首miki唔想刪除，但咁啱播到就會令佢有危險嘅歌。

「你啱啱咁樣好危險架，好彩同後面架車距離夠遠，唔係實炒車無命架。」





miki繼續揸車，依家終於回復正常。佢嘅沉默反而令我諗多咗少少野。

如果，佢就係諗住炒車呢？

「你唔會⋯⋯喺度玩俄羅斯輪盤下話？」

miki特登好集中精神咁望住前方，逃避我嘅眼神。
「如果依首歌咁特別，你無可能唔記得佢仲喺你歌單入面。你明知自己聽到首歌會有咩反應，都唔del咗佢，除咗特登唔做，我諗唔到其他原因。」

當播到《哪裡只得我共你》，miki就會失控咁煞車，咩都做唔到。





依個時候只要咁啱有架跟得貼嘅車，一相撞，miki就可以實現願望去同金仔團聚。

「我覺得⋯⋯金仔都一定唔希望你用咁嘅方法去見佢。」

因為唔可以自殺，所以miki就試圖製造一個可以殺死自己嘅意外。但講到尾，都只係一種變相嘅自殺，仲會連累撞到佢架車嘅司機。

「⋯⋯⋯⋯對唔住。」

無耐，miki就平靜細聲咁道歉。





「你知錯就得啦。」

反正無發生意外，只要之後佢唔再咁做就得，我亦無再喺依件事上同佢糾纏。