當晚我地好和諧咁四個人食咗一餐住家飯,有蒸魚、白切雞配自家製薑蓉、午餐肉、鮑魚菇炒生菜、茄汁大蝦同粉絲扮翅嘅碗仔翅。

我一早同miki夾定口供,今晚扮住係情侶先,費事兩老問太多問題。miki都好配合,結果算係有驚無險咁食完一餐飯。

食完飯,miki主動話幫手洗碗,我見阿媽笑到啲眼紋出哂嚟就知佢已經認定咗miki係佢新抱咁滯。

我同miki洗碗嘅時候,阿媽久唔久就伸個頭入嚟裝我地兩個,我最後閂咗道門。

「你媽咪好搞笑呀。」





「佢心心你嗰陣咪搞笑,唔心心你嗰陣就係毒舌架喇。」

miki專心洗碗,面上係一個窩心嘅笑容。

「幾好吖,原來有屋企係咁。」聽miki講,今日係第一次有外人當佢係女咁對待。

「雖然我有社工姐姐同超人哥哥,但佢地係當我妹妹,唔係當我係女。所以呢,伯母叫我叫佢做媽咪,其實我好開心架。」

雖然個意思有少少唔同,但依個美麗誤會既然令miki開心,咁我都費事解釋咁多。





miki稍為解釋咗社工姐姐、超人哥哥同佢嘅關係。兩位都係好照顧miki嘅朋友嚟。

我將碟上嘅污積擦淨。

「係喎,估唔到你都鍾意食午餐肉喎。」

「午餐肉又有特別意思?」

「金仔都鍾意食吖嘛。」





我都估到架喇,對miki嚟講有特別意義嘅事物通常都同以前個金仔有關。

一樣叫做金仔、住上環、鍾意食午餐肉⋯⋯我唔係突登模仿佢,偏偏我同佢機緣巧合之下,有啲特質好相似。

我將佈滿番梘泡嘅碟交畀miki過水。

「其實鍾意食午餐肉好平常架啫,招牌跌落嚟都有機會砸中幾個架啦。」

miki手上仲沾有番梘泡,但拍我膊頭:「我今日先救返你咋,唔好被招牌砸死呀。」

我梗係整返佢轉頭:「我今日都救咗你喎!」

「唓,係我好彩啫,後面架車你都控制唔到架啦,你幫我轉咗首歌之嘛。」

一時之間,地板又濕,我地身上又多咗好多白色嘅番梘泡。我見情況就嚟失控,即刻捉實咗miki對手。




「你呀,記得以後都唔可以再咁做。」

miki見我咁認真警告佢,個樣有啲慚愧,但都點頭應承咗我。

「我無del你首歌,但播放模式就改咗,以後聽完《無可避免》之後嗰首就係《哪裡只得我共你》,你自己飛去下一首啦。」

「我知錯架喇,真架。以後唔會架喇。我承認我無好好諗過後果就咁做⋯⋯所以⋯⋯對唔住呀。」

miki好似個做錯事嘅小朋友咁低頭認錯,但無幾耐見我態度軟化,又將番梘泡點喺我鼻頭,我繼續反擊,笑聲同番梘泡一齊喺廚房入面飄嚟飄去。
已有 0 人追稿