是咁的，我嘅職業係幫人瞓覺: 二百五十一、問題嘅答案

我好清楚miki同金仔經歷得太多，佢咁愛一個人好難會再鍾意第二個，所以當日分開之後，我就無搵佢，佢亦無搵我。

其實就算我搵佢，都唔知可以同佢傾乜野。

所以我選擇繼續過自己嘅生活，去睇腦科同排期做手術。

我亦善用依段時間，睇返嘉儀寫嘅遺書故，盡量透過故事更加了解miki以前發生過咩事。

阿媽同老豆分別請假陪我睇醫生，每次檢查同覆診都跟到足。





佢地每晚都會將我嘅情況互相報告，確保知道我身體嘅最新狀況。

醫生話手術成功率有八成，老豆就係咁問嗰兩成失敗嘅人會點。

大腦係人體最精密又最神秘嘅地方，所以如果手術有咩差錯，我可能會死、全癱、半癱、智力受損等等。

好在我個瘤暫時增長速度非常非常慢，所以手術風險依舊比較低。

全靠我減少咗幫人瞓覺，個腫瘤先受控制。同時我亦發現就算有時用下能力，都唔會對腫瘤產生即時影響。





即係話唔會今日用完，聽日個瘤就大咗。用超能力對大腦嘅影響係累積返嚟。如果我持之以恆咁用，就會慢慢令腫瘤增生，但只要少用，其實唔會令病情短期內惡化。

老豆一直好擔心我個手術會失敗，阿媽都擔心，只係佢依舊唔會表現出嚟。

直到我入院，準備好做手術前嗰一晚，阿媽同老豆先忍唔住眼濕濕。

「每個手術都有風險架啦，放心喎，我一定會無事。」

但對兩老嚟講，心入面已經預先做好最壞嘅打算。





因為就算手術成功率幾高都好，咁啱撞正你係失敗就係失敗。

不過佢地都唔擅於表達自己嘅情感或者關心，所以除咗摟實我，就無做咩特別野。

「聽日唔使驚架⋯⋯阿媽喺度呀⋯⋯」

但正因為阿媽同老豆向來唔做依啲野，唔太表現對我嘅關心，所以今日嘅擁抱先咁特別。

我想聽多次依句說話好耐，終於都聽得到。

當日嗰本書嘅問題，我依家終於識答。

「你記得母親做過的一件令你感動的事嗎？」

記得。就係喺我做手術前一晚，摟實我，同我講唔使驚，佢喺度。