是咁的，我嘅職業係幫人瞓覺: 二百五十三、祝你手術成功

「點解？」

「因為我唔想見到你繼續因為過去而痛苦。我知道自己嘅能力有機會幫到你，所以我先咁樣講。」

miki轉身：「你幫我唔到架。」

做手術之後只會有三種情況。

其一係手術成功，我仲留有超能力。





其二係手術成功，我無咗超能力。

其三係手術失敗，咁有無超能力都無關係。

亦即係我做完手術之後仲可以幫到miki嘅機會只有百分之三十三。

手術之後嘅情況係點，全部都係未知之數，所以唔可以等到手術後先做。

唯有依家嘅情況，係我可以掌握得到。





要用超能力幫miki解開心結，只能夠係依家做。

我輕輕拉住miki嘅衫角：「手術之後無論成功定失敗，我都好大機會幫唔到你。所以依家，趁我仲有能力，你畀我試下，好無？」

進入心之迷宮有幾危險，我自己最清楚。用超能力會對大腦有影響，我都好明白。

但我唔想見到miki繼續徘徊喺痛苦之中，所以我想幫佢瞓覺。

我唔知最後係咪幫得到佢，但既然我嘅超能力有咁嘅可能性，我就願意嘗試。





miki話哂都係我救命恩人吖嘛。

「你⋯⋯係咪鍾意咗我？」

miki無轉身，低聲咁問。

我都唔知咁樣係咪鍾意，我地兩個只係第二次見面，對佢嘅了解又唔多，我會鍾意佢係一件好唔合理嘅事。

不過又成日聽人講愛情就係咁唔合理。

其實，我由本來抗拒幫miki，到依家叫miki畀我幫佢瞓覺，如果話我唔係因為鍾意咗佢，反而更加唔合理。

講到尾，如果我唔係鍾意miki，佢痛唔痛苦又關我咩事？

但係我唔可以畀佢知道我嘅心意，因為佢一定會拒絕我，我根本無得同金仔鬥。





「我淨係知道，我唔想見到你一直被過去嘅事折磨。一諗到你每次講以前嘅事個樣，我個心就會那住那住。」

我望住miki嘅背影繼續講：「無論我做完手術之後點都好，我都希望你可以好似嗰日食完飯之後咁，由心而發笑出嚟。」

miki微微轉身：「我無理由要你用超能力幫我架，即使依個係你嘅願望。」

我放開佢嘅衫角。

我想幫佢，但我嘅能力一定要對方同意先可以發動。如果無辦法令miki同意，咁我就咩都做唔到。
我嘆咗口氣。

「祝你手術成功。」miki背住我，邁出腳步要離開。