是咁的，我嘅職業係幫人瞓覺: 二百五十七、另一個miki

依啲房唔係miki嘅記憶嚟咩？

miki企起身，拎住刀，一步一步向我逼近。

全身嘅毛孔噴出冷汗，第六感同我講好危險，快啲閂門。

房內嘅miki加速衝向我，我馬上閂埋道門。

啪咔！





刀尖喺木門上穿出，好彩我避得快，唔係已經捅穿我隻右眼。

咔咔咔咔！

門內嘅miki想開門，我唯有同佢鬥力，唔畀佢出嚟。

木門啪咔啪咔咁就穿出刀尖，我個腦都已經亂哂。

「嘻嘻嘻嘻嘻嘻嘻嘻嘻！開門！開門！」房入面嘅miki發狂咁笑，血紅嘅眼珠喺木門嘅刀窿偷望我。





「你係邊個呀？點解會入到嚟嘅？我地一齊玩吖！」

miki嘅另外一個人格⋯⋯喺金仔犧牲咗之後就無誘因再出現。miki以為佢已經消失咗，但原來佢一直都仲留喺miki嘅潛意識世界入面！

本來佢已經出唔到現實世界害人，但依家係我自己走入佢地盤，送羊入虎口。

「我好耐無出過去喇，你畀我出嚟啦？畀！我！出！嚟！」刀隨住每一個重音插穿木門。

冷汗喺太陽穴滑過。





再咁僵持落去，道木門會被佢插爛，佢遲早都會出到嚟追殺我。

雖然依個係夢，我唔怕痛，但死咗就會醒返。我一日未幫miki解開心結，一日都唔可以醒住！

點算⋯⋯依家應該點做呢？

我環視四周，無任何工具幫得上手，亦無可以用嚟自保嘅武器。

眼珠急速掃過成間屋嘅每個角落，終於畀我見到一線生機！

雖然無百分百保證，但我發現大屋入面咁多道門，只有一道門嘅門罅有透出光芒。我唔知有光透出嚟係咩意思，但情況危急，只能夠賭嗰道門可以通向一個特別嘅地方。

我放開手，直線跑向正對面嘅木門。

咔嚓，後面嘅miki衝出嚟，拎刀追住我：「唔好走呀，我地一齊玩吖！嘻嘻嘻嘻嘻！」





唔好望後面，唔好望後面，唔好望後面！！

走到門前，扭動門把，竟然卡住咗！

「嘻嘻嘻嘻嘻嘻嘻嘻嘻嘻！」背後嘅笑聲急速逼近，我嘅手亦震得好厲害。

嗤！

嗤！

miki嘅刀亦無情咁插落我背脊度，佢發狂咁笑。

依個時候門把順利扭轉，終於開到門！





「嗚！」喺我開門嗰剎那，我成個人向前仆，推開道門，跌咗入去另一個住宅單位之中。