是咁的，我嘅職業係幫人瞓覺: 二百五十九、布甸仔

啊，我記得喇，我約咗梁小姐幫佢瞓覺。

梁小姐今年廿八歲，係記者嚟。佢因為趕住出一份號外而通咗幾晚頂，今晚一定頂唔順，所以先叫我幫佢瞓覺。

「梁小姐？」我大叫咗幾聲都無人應我，於是就喺屋入面行下。

其中一個房門掛咗「夢之迷宮」嘅牌⋯⋯咁好明顯，依間屋就係梁小姐嘅心房。我已經幫梁小姐瞓咗覺？點解完全唔記得嘅？

我都唔知幫佢瞓咗幾耐，所以唔知自己幾時會醒。





見無聊無野做，唯有睇下梁小姐潛意識嘅世界啦。

除咗迷宮嘅大門之外，其他門都開得，有啲係過去嘅回憶，有啲係未來嘅願望。

我選擇咗睇回憶。

金色短髮嘅梁小姐同一個好似米芝連咁肥仔打緊機。

「喂呀，再係咁我死喇！布甸仔！救我呀布甸仔！」





梁小姐表情誇張咁向隔離個肥仔求救，個肥仔笑得好開心。

無耐，工人叫佢地食飯，廚師話今晚準備咗安格斯牛排，熱辣辣冒住蒸氣咁，睇到我都流哂口水。

「我唔客氣喇！」梁小姐大飽口福，反觀布甸仔望住塊牛排反而悶悶不樂。

「我⋯⋯我唔係想食依啲⋯⋯」

我無辦法理解梁小姐同個肥仔係咩關係。母子？無可能啦。姐弟？睇佢地嘅交流又唔似喎。





「咁你最想食嘅係咩呀？」

「反正都食唔到嘅⋯⋯唔講喇⋯⋯」

學校打鐘嘅聲音響入耳中，轉眼間梁小姐已經喺私家車上。

「你始終唔係佢父母，你無辦法畀到父愛同母愛佢。」

梁小姐聽完依句說話，眼淚終於忍唔住流落嚟，但淚水停咗喺佢面頰上，時間好似霎時靜止咗。

一隻好似羽毛咁輕嘅手，放咗喺我膊頭。我身旁出現咗一個二十幾歲嘅男仔。

平凡嘅髮型、平凡嘅輪廓、平凡嘅五官、平凡嘅衣著⋯⋯

除咗平凡之外，我講唔出另一個形容詞。





但佢個樣唔算醜，平凡得嚟偏靚仔，唔係男神嗰隻，而有比較有親和力嗰種。

「輪到你上台喇。」

「呃⋯⋯上台？你係邊位請問？」我好肯定自己無見過依個男仔。

佢笑一笑：「我係邊個唔重要，重要嘅係你依家應該做乜野。去啦，上車，坐去佢隔離啦。」

我本身唔想聽佢命令，但個男仔嘅態度好友善之餘，每句說話都好似有股魔力咁。

我覺得自己有啲好緊要嘅事要做，但唔記得咗，而個男仔叫我做嘅事，好似正正係我本來就要做嗰件事一樣。

我打開車門，坐上車。





咪住先⋯⋯一般喺心房睇客人嘅記憶，我無可能干預得到回憶嘅內容架喎⋯⋯

除非我喺⋯⋯迷⋯⋯⋯⋯迷⋯⋯

「我知⋯⋯我真係知架⋯⋯」

當我上車之後，本來靜止嘅時間繼續流逝，梁小姐嘅眼淚滑落。

我覺得自己應該安慰下佢，但完全唔知講咩好。

見旁邊有部手機，停留喺同「布甸仔」嘅對話上，我心血來潮隨手播放咗佢段錄音出嚟。