今日發生既事，改變左我一生。: 第一章第一節．黑點再現

入到球場，各自各擺低D野，換上釘鞋，攞出手套，就去跑步熱身。

慢跑左五十米左右再回程，大家一齊圍圈拉筋，都好正常，我亦冇再感到腳軟。

當我以為冇事繼續練波，意想不到既事終於發生係我身上。

「阿朗，到你打啦。」阿祺大聲咁叫我。

我企係準備打擊既位置，戴上頭盔，拎起球棒，架好姿勢準備好去打阿祺投比我既波。





「唰—」阿祺投既波係我身邊飛過。

由於佢個波比我想像中既快，我反應唔切，揮空左第一球。

「阿朗，望實個波黎打呀，你揮得太慢啦。」教練係我身後指導我。

「係!」我回應。

「下一球一定會打到架。」我心諗。





我全神貫注咁望實阿祺，準備好去打佢投出黎既第二球。

阿祺舉高雙臂，提腿，準備向前投過黎既個刻，我眼前一黑。

「啪—」

一陣強烈既痛楚傳黎，雖然戴上左頭盔，但阿祺既投球直撃我頭部，我即刻跪左係度，眼前既黑依然冇消散......

「阿朗! 阿朗! 你有冇事呀! 」阿祺講既呢句說話，係我最後聽到既句子。





我失去左意識。

「呃... 好痛好暈......」我按住我個頭。

眼前依舊係黑曬，D黑點好似唔想走咁籠罩住我視界。摸下摸下，咦，點解我個頭冇戴住頭盔既?! 點解周圍靜左咁多?

眼前既黑點開始慢慢散去，迎接我既並唔係一班隊友既關心，而係一片荒無。