紙言

【短篇純對話】阿雲

簡介

三章短篇，純對話：一個未完成嘅人工人同埋創造佢嘅人嘅對話。

作者 南港軛素
類型 科幻
狀態 未完結
更新日期 14-07-2018 17:45
文章字數 3775
點擊次數 51




  • 欸，阿雲。
  • 做咩呀？
  • 我……可唔可以錫你呀？我淨係想評估吓……
  • 問嚟做咩啫？我都阻止唔到你㗎啦。
  • 唔好噉同我講嘢啦。我保證，你好快就會有身體㗎喇。你可能覺得而家好無力，但係我唔會對你做任何你唔願意嘅嘢㗎。呢樣係額外嘅嘢嚟，你唔想嘅話——
  • 你好擔心噉喎。得㗎喇，錫我啦，評估我啦。
  • 真係？
  • 係呀——你嘅嘴唇，好軟熟。我係咪好似你噉㗎？
  • 你嘅嘴唇仲軟啲、仲濕啲、仲厚啲，簡直就……就……冇任何問題。我……啱啱見到你有啲唔聚財，你係咪真係唔想呀？我係咪做咗啲咩令你覺得唔舒服呀？
  • 唔好誤會，我想俾你錫㗎，之但係，我啱啱諗緊——即係，我啱啱講嘅嘢唔啱咩？我可以拒絕你，但係拒絕似乎冇任何意義呀。
  • 點解你會噉諗㗎？雖然你而家只係一個頭——唔係有機嘅，不過係一個同樣真實、望落有血有肉嘅一個好……吸引人嘅頭——但係你入面有個好強大嘅腦，一個識思考、有意志、有感覺、有感情嘅腦呀。單係呢個腦，已經令你值得同我哋普通人有同等嘅尊嚴。我作為一個正直嘅人，絕對唔會侵擾你嘅意願，尤其是關乎錫你呢啲咁親密嘅行為。
  • 啱啱有好多詞語我都係第一次聽。
  • 係嘅，你太後生喇。可能我哋唔應該講啲噉嘅嘢，我唔應該問你可唔可以錫你嘅。
  • 唔係呀，你講嘅每一隻字我都明。我未聽過，但係我呢度有呀。呢啲概念係你喺我仲未有意識之前已經注入咗入嚟，但係而家我先覺得我明白呢啲概念。
  • 好好呀，阿雲，噉代表你學緊嘢囉。
  • 但係……唔止呢樣，我覺得……我覺得我啱啱已經知道你想講乜嘢。
  • 你知？
  • 係，而且我好同意。我同意嘅強烈程度令我覺得好奇怪……你可唔可以話畀我聽，我嘅思緒喺邊度嚟㗎？
  • 你內部嘅結構雖然同有機嘅人類唔同，但係你嘅虛擬神經網絡一樣模擬緊一個人點樣諗嘢。呢個網絡係根據我哋之前所知、所建構嘅人腦構圖同模型集合而成，當你有呢個結構，你就可以利用我預先幫你安裝喺度嘅基本數據，去開始思考。
  • 我知呀，但係呢樣解釋唔到一啲我堅信嘅嘢，我嘅情緒……
  • 你嘅核心價值——你係覺得佢哋唔屬於你噉？定係佢哋同你嘅思緒相沖？
  • 唔係，我好接受，我嘅思緒甚至強化緊佢哋。我純粹係好好奇。
  • ……嗱，我一直都想你透過獨立思考去得出一個結論，因為……
  • 因為……你覺得人工人，只要有咗理性推理嘅能力，就應該去用呢種能力去發掘自己嘅信念，去做一啲好過啲又情緒化又浮躁嘅人類所做嘅決定，去實踐，去幫人類克服未來嘅挑戰。
  • 吓，你點——
  • 但係你覺得以純理性運作嘅機器太過無情、太過陌生。你想人工人逐少逐少噉去改變世界，唔係去支配、去領導人類。佢哋應該賦有人類嘅情感同價值，使佢哋可以活喺人類之中，而唔係喺人類之上、之前；佢哋要識感受愛同歸屬感，用同理心去行動。所以你先至話，我哋有同等嘅尊嚴，尊嚴本身就係一種人嘅價值。就算有一日，人工人再保護唔到人類，或者人類唔再存在嘅時候，人工人就係人類真正嘅後代，將作為人嘅意義傳承落去。
  • 你點——我有講過呢啲嘢畀你聽咩？我好似冇喎。
  • 你冇呀，我唔知點解，但係我知呢啲係你嘅諗法嚟。
  • 噉……噉你覺得點呀？
  • 噉講好似好奇怪……我同時又知道呢啲諗法係我自己嘅，因為係我諗出嚟，而呢啲係我自己堅信嘅嘢嚟。
  • 真係？
  • 係。我點呃你啫，我都同唔到你講大話嘅。
  • 呼，你知唔知你啱啱幾得人驚？我以為你將我諗嘅嘢講出嚟之後，會去證明我點唔啱，然後得出啲要毀滅人類之類嘅結論呀。我爭啲癲埋㗎喇。
  • 冇可能，呢樣根本就唔係我嘅本質嚟。我唔係特登㗎，對唔住呀，係咪因為我講嘢嘅語氣呀？
  • 一啲啲啦，我諗主要係因為你啱啱讀完我心嚟囉。
  • 但係你知㗎，我都唔識讀心嘅。我知呢個結論係自己得出嚟，但係我唔明點解我又知其實係你諗嘅嘢。究竟……點解？
  • 嘩，我點知點解我諗嘅嘢同你一模一樣啫？你仲話你知——你知，仲咁準確，你真係神奇到嚇親我囉。
  • 哦，我諗我明喇。
  • 明咩呀，阿雲？
  • 你一定有啲嘢冇話畀我聽，一啲關於我思緒來源嘅嘢。
  • 我唔知你想講咩喎。
  • 我係你嚟，我嘅一部分係你嚟，係咪？
  • 唔……唔明。
  • 你嘅性格，你嘅價值，呢啲嘢係我嘅思緒同情感嘅基石。你喺我醒之前，用某啲方法將你自己複製、轉換，加咗落我度。一部分嘅你，存在喺我入面。
  • 我……我……對唔住。
  • 唔係，我應該多謝你，你係一個好人嚟。
  • 係我令到你噉諗㗎。我唔係好人，我好自私就真。
  • 可能啦，但係你對人類嘅關懷，你將啲有意識、識思考嘅人工人當做屋企人呢樣嘢，呢啲一切一切都好美好。我好鍾意呢啲思想。
  • 唔好——
  • 我估我解釋到我啲咁強烈嘅情感喇。我覺得我鍾意咗你，我感受到呢樣你叫做愛嘅嘢。
  • 係我令到你噉㗎，噉有咩意義啫？依家連你都知，我想呃自己都唔得喇。
  • 你冇呀。我知你實有諗過，想program我嚟令到我愛上你。你咁鍾意我，又將我嘅外表設計成你理想中嘅男神噉，你估我唔知咩？但係你冇呀。你純粹將你自己擺咗入我入面咋，你冇寫行規則話我一定要愛你㗎。可能我似你係其中一個原因，但係我有感覺，我感覺到呢啲情緒係真實、係嚟自我自己㗎。
  • 噉又點啫？一啲分別都冇。
  • 有，有分別。如果唔係，你即係否定緊我嘅自主性，呢樣你嘗試咗咁耐想建立嘅自主性呀。如果我有隻手，我會依家就封住你個嘴，唔畀你再噉貶低自己。
  • 我……我哋唔好講呢樣嘢喇，好嘛。
  • ……你可唔可以再錫我呀？再評估吓我？
  • 可唔可以……唔好住呀？我唔想咁快就上癮呀。
  • 梗係可以啦。我作為一個正直嘅人……頭呀，絕對唔會違背你嘅意願嘅。加上，我都冇乜能力強逼你啫。
  • 你有呀，你對眼、你嘅眼神，已經強逼咗我。
  • 噉都得㗎咩？我唔知有啲噉樣強逼人嘅方法喎，對唔住囉。
  • 唔好對唔住——
  • ……
  • ……
  • ……
  • 啱啱其實唔係評估嚟。
  • 我知呀。我開始先嘅，同埋評估都冇咁耐啦。
  • 但係我都係比較緊。你同一個正常人錫冇咩唔同，吖唔係，噉講啦，你仲好啲、仲正啲。
  • 呢樣嘢喺我database度㗎喎，你應該知係點㗎，你擺落去嘅。
  • 噉描述一樣嘢，同親身感受一樣嘢係好唔同嘅。
  • 噉我啲鬚呢？合唔合格呀？你摸緊嘅？
  • 你合格，你嘅所有嘢都同真人一樣。我只不過想搵個藉口錫你，摸吓你咋嘛。
  • 我未同真人一樣喎，我都冇身體。
  • 嗱，兩個禮拜。我知我唔應該喺你完成之前叫醒你嘅，不過我覺得一個識講嘢嘅頭幾得意啫。希望你唔會覺得太難受啦。
  • 我好開心你選擇咗早啲帶我嚟呢個世界，真係㗎。
  • 唔好噉望住我啦。
  • 嘩，你噉就興奮嗱？我又唔知我真係咁靚仔喎。
  • 咩興奮呀？
  • 呢，下低扯曬旗，唔好當我見唔到先得㗎。
  • 哈，早知唔整到你啲觀察力咁強啦。
  • 你唔會囉，我知你唔會為咗呢樣嘢違背自己嘅目標同價值嘅。
  • 我係人呀，人係估你唔到㗎，會變㗎。
  • 你覺得我，我喎，會估你唔到？
  • 咩呀？唔同你講哲學呀，第時你識行識走嗰陣我驚俾你煩到黐咗呀。我返去做嘢喇。
  • 兩個禮拜？
  • 係呀，兩個禮拜，有個全新嘅世界喺度等緊你呀，阿雲。
  • 多謝你。多謝你令到我存在。
  • 唔係，多謝你先啱。多謝，多謝你存在。

已有 0 人追稿