《香港傭兵》: [Day 08－破壞能源] PART 09

阿月呢個人，的確唔普通...

對我嚟講...

而最大問題都係...我根本就唔係一個行者！

聽完仁慈講佢嘅故事，我可以肯撚定自己冇資格做行者！

接受啲咁地獄嘅訓練，都要有咁嘅天資先得㗎！



我冇㗎！好明顯我就唔係骨格精奇啦！

我骨格畸形咋！

成日話香港人冇自知之明...我有㗎真係！

所以呢...而家首要嘅係...都係保住條命仔先啦～

就喺我同仁慈一齊欣賞外面嘅冬夜雪景之時...



「差唔多時候。」身後突然出現綽姿把冷淡聲！

『嘩！你幾時喺度㗎？！』突然出現...嚇死人咩？個心離一離呀！

「喺你哋講緊前期訓練嘅時候，我就已經喺嗰邊啦。」綽姿指指背後。

我望望綽姿背後...遠遠嘅梯邊...

『又唔單聲...』鬼鬼祟祟咁...好彩冇講綽姿壞話姐...



「係你自己察覺唔到咋嘛。」綽姿冷眼望住我。

『嘩？又係我問題吖？仁慈你話喇！你察唔察覺到喇？』又講到我弱咁喎！

「我吖？」仁慈咬住唇諗諗，「佢行上第三層樓梯，踩住第三級樓梯條鋼筋嗰時就發現佢行緊上嚟。」

嘩...又使唔使吖...

綽姿冷眼望住我：「好明顯係你太弱。」

『OK～OK～係我弱囉～』我有自知之明～

「唔好再浪費時間，要開始講作戰策略。」綽姿拎出手機。

我都快快手手扮晒認真咁拎部手機出嚟！



仁慈都邊拎手機邊講：「路線圖已經Upload咗上去...」

我都打開個路線圖睇睇...

嘩...應該點睇吖？

頭先睇幅地圖，已經覺得好亂...而家仲要加咗好幾條線...

啲紅橙黃綠圈圈三角正方仲要識郁...

即係點吖？

仁慈繼續講：「記好路線同途中會遇上嘅守衛同CCTV嘅位置...仲有就係巡邏嘅時間同路線，我哋都要一一避開。」



吓？我睇都未識睇喎...仲要記？！

仁慈繼續講：「當然當中可能會遇到突發事...好似話路線中遇到有人經過，我哋都要等！非必要都唔好出手，免打草驚蛇。」

綽姿望住部手機點點頭。

我又真係唔信你忍到手吖...你個殺人狂...

「萬一期間遇上逆行者...」仁慈諗咗諗，「立即逃走。」

『逃走...即係放棄委託？』我有冇理解錯？

「嗯。」仁慈點點頭，「保住條命重要...你都應該清楚以我哋三個人嘅力量...就連一個逆行者都未必打得贏。」

綽姿又點點頭。



係嘅...領教過逆行者嘅力量...再遇到都唔知有冇命走得甩...

之但係...委託失敗就試過...放棄都可以？

「炸彈方面，已經Set好時間...」仁慈將舊黑色物體交到綽姿手中，「我放A廠。瓦解放B廠。」

綽姿接過炸彈後點點頭。

正～炸彈都唔使我放～

仁慈拍拍我膊頭：「睇唔明路線圖唔緊要，跟實我哋就得喇。」

「跟實啲。」綽姿冷眼望望我。



『好！』你同我定啦～

叫我殺人就手軟姐～跟住你哋行唔會腳軟啦！

「咁好啦...準備行動。」仁慈將身上件大褸一除...同時雙眼已經發出紅光！

嘩...用精神液用得咁快手嘅？

仁慈拉高衫領，笠返頂帽之後，綽姿都已經除咗件大褸，拉高衫領笠埋帽仲用埋精神液！

嘩...又使唔使咁快吖？

好啦好啦...我都快快手手啦...

我左手插入褸袋...學仁慈咁，一邊除褸一邊用力一捏支Level 2精神液！（哎吖...卡住卡住...）

當道寒意由手背傳遍手掌…傳到手臂…全身...

「我唔想死呀...我唔想死喺呢度呀...」我又聽到喇...

「好凍...有冇人可以救我出去？」我又聽到女仔聲...

「救我...救...救我...」點解...每次用精神液...都總係會聽到...

「你呆夠未？」呢把係綽姿把冷淡聲！

『我...我等緊你哋咋嘛！我要跟實你哋㗎嘛！』你唔好當我真係發呆！

然後...我感受到仁慈嘅氣息...

仁慈嘅氣息...雖然冇綽姿咁有霸氣...但好強！

的確...我可以好清楚咁感受到仁慈嘅能量好強大...感覺上…可能比起綽姿...更強大！

「你係跟得實先好。」綽姿仲係睇死我。

點解綽姿硬係對我咁冇信心㗎呢？

話晒都已經一個禮拜，又要遇過逆行者都死唔去，算叻仔啦！

「好...行動！」仁慈背住出面向後一跳！

嘩嘩嘩！使唔使咁型吖？

綽姿又踏前一步…一跳！

嘩嘩嘩！我都要跟上先得喇！

我諗都唔諗就跳出去！

跟住一粒粒白色雪花向下降...

原來都...原來都...幾高㗎喎！！！

嘩嘩嘩！我一落到地面就一個側滾翻卸一卸力！

冇問題！安全著陸！

嗱！係唔係有進步先？

但仁慈同綽姿都差唔多跑出工地！

要跟要跟...要跟實啲！

我都不敢怠慢！立即以忍步追上！

緊貼喺仁慈同綽姿身後，跑出工地，再跑過草叢，跑過埋對面馬路就向住沙灘一跳！

我哋三個黑影就喺沙灘上以忍步向住發電廠方向跑過去！

要跟實你哋咋嘛～有幾難？

細細個成日都同賣藝去七仔斟可樂飲～

飲淨啲冰就倒落C9啲買餸籃裡面然後喪奔㗎啦～

從來都未俾C9捉過㗎！

就喺我仲沾沾自喜之時...

「放輕腳步。」綽姿一邊背住我以忍步跑，一邊講。

放輕...腳步？

我再望望...綽姿對腳...

白色嘅飄雪降在沙灘上...化成小水點...但就冇任何腳印...

仁慈同綽姿踩過嘅沙...都冇留下足印！

好輕功！

原來...原來仁慈同綽姿唔單止跑得快，仲踏雪無痕！

我...我又可唔可以做得到？

我努力嘗試放輕腳步...

但就Keep唔到速度...

當我想提升返速度追貼綽姿...

又放唔輕腳步...

真係唔好話要又放輕腳步又跟得上綽姿佢哋，就連想平衡兩者都做唔到！

好啦好啦～我都係放棄輕功，選擇跟貼綽姿佢哋算～

人生就係咁㗎啦～總有取捨吖嘛～

反正...好快就跑過沙灘...好快就跑到嚟大石堆...

我就跟住綽姿佢哋跳上大石！

我一踩上大石...

嘩！跣腳跣腳！差啲就跌落海！

望清楚啲...大石上有層薄薄嘅水氣...有啲仲要鋪咗層白色薄雪喺面！

真係要小心！真係要好小心！！！

唔係嘅話一跣腳跌落海就真係柒出國際！

我好小心咁睇清楚...但綽姿佢哋就眼明腳快咁又跳又彈！

就快跟唔上...要快啲...再快啲...嘩嘩嘩！又跣腳！！！

好小心咁喺鋪有薄薄白雪嘅大石上彈彈跳跳，好唔容易先跟住綽姿佢哋跳過大石陣，入到樹林！

入到樹林，綽姿同仁慈都喺樹上跳嚟跳去...

火影忍者？！

我就冇佢哋咁癲！都係喺地面跑好了～

我抬頭望住綽姿同仁慈嘅身影，跟住佢哋跑！

嘩嘩嘩嘩屌！差啲撞樹！

喺樹林之間本來已經夠暗...仲要被大樹遮擋，視野好差！再加上以忍步高速移動...仲要抬頭望住佢哋嘅身影...真係好易撞樹死！

好唔容易先穿過樹林，又跳到落沙灘！

綽姿同仁慈都係踏雪無痕！而我一跳落沙灘就踩咗對勁深嘅腳印！（仲仆仆哋街添...）

飄雪越落越密，但下降速度好慢...好慢...非常之慢！

就好似...定格咁...

喺沙灘上以忍步極速前進！我已經冇咗嘗試放輕腳步！

因為就快被綽姿佢哋拋甩！！！

跑咗一段路就再跳入樹林！綽姿同仁慈依舊喺樹上跳嚟跳去！我就依舊喺地上跟住佢哋嘅身影跑！（勉勉強強都叫跟到啦...）

當我哋再次穿過樹林，面前就有一座...廢棄咗嘅建築物！

仁慈同綽姿就喺牆身嘅大窿跳入去！

要...要跳入去？

好啦好啦！

我都跟住一跳！成功穿過大窿，但裡面漆黑一片！霎時乜柒都睇唔到！

當視力開始適應，我都已經差唔多落地！

『哎呀！』我嚟唔切反應，直接趴咗喺地上！

綽姿立即一手拉起我：「殊！」

『哦哦...Sorry...Sorry...』痛就要嗌㗎啦...

仁慈靠近牆邊，由裂縫之間偷偷望出去：「望唔望到對面幅牆？」

我又偷偷望出去：『嗯...』

喺雪花紛飛之間...前面有幾座倒塌咗嘅建築物...再遠啲...好似係一幅...圍牆...

仁慈指一指右邊：「圍牆嘅右邊有一條較闊嘅裂縫...我哋就由嗰邊跳入去。」

右邊？喺邊吖？唔見嘅？係唔係要兜過去右邊吖？

綽姿翹起雙手：「你Upload張地圖已經好清楚。冇必要停喺度再解釋。」

「咁佢唔識睇吖嘛～」仁慈指指我，「都要講解俾佢聽嘅。」

我？

原來...又係我...

「佢唔識睇已經係佢嘅問題。如果跟都跟唔上嘅話...」綽姿撞一撞開我，「就唔好阻住晒。」

咁㗎...

「咁又唔好～」仁慈拍拍我膊頭，「話晒佢都係你嘅隨行者。」

係咯係咯～仁慈就講返啲人話喇～

「必要時...」仁慈用力捏一捏我膊頭，「犧牲佢用嚟脫險都好。」

嘩！乜係咁㗎咩？！

乜原來仁慈都係想搵我嚟賣㗎咋？！

果然...行者都係信唔過...

「你都啱...」綽姿點點頭，「呢個可能就係佢嘅唯一用處。」

嘩我屌！連綽姿都係咁講？！

果然...冇一個行者係信得過...

仁慈再行近裂縫：「放心。我已經將吞噬出錯嘅耽誤時間都計算在內。」

嘩...使唔使咁小心謹慎吖？你唔俾我零失誤，完美演繹嘅？！

綽姿亦行到去裂縫前：「我怕你低估佢嘅無能。」

「係咁嘅話...就抵死啦。」仁慈輕輕一躍，就跳咗出去！

同時綽姿都跟隨其後！

嘩嘩嘩！又行動喇？都唔單聲？！

我都立即跳出去！望住綽姿佢哋嘅身影跑過去！

綽姿同仁慈以忍步高速咁跑向倒塌建築物遺址！

我都追貼佢哋身後，喺瓦礫碎石上以忍步極速追上！

我唔會俾你哋拋甩嘅...我唔會俾你哋睇死嘅！！！

跑過幾個建築物遺址！跑過一塊空地！向住右邊方向翹過去！

當我跟住綽姿翹到右邊圍牆，我就見到仁慈跳上右邊嗰架廢棄嘅貨櫃車，借力一跳！

反作用力之下，仁慈一個轉身就穿過圍牆嘅裂縫！入咗發電廠！

好功夫！

話口未完，綽姿都跟住仁慈嘅動作，跳上右邊嗰架廢棄嘅貨櫃車，借力一跳！

反作用力之下，綽姿同仁慈一樣，一個轉身就穿過圍牆嘅裂縫！入咗發電廠！

真係型到呢～

睇過兩個專人嘅示範，難唔到我呢個千年難得一遇嘅武術奇才嘅吓話～

我就二話不說，短距離加速，再跳上右邊嗰架廢棄嘅貨櫃車，順勢借力一跳！

反作用力之下，我一個半側身就穿過圍牆嘅裂縫！

之但係唔知係唔係我High得制用力咗，定係我反應過大，我穿過裂縫嘅速度好似比仁慈同綽姿都要快...太快...

穿過裂縫...穿過圍牆...都未有停落嚟嘅跡象...

仆街喇呢次...淨係掛住型...都冇留意到要用幾大力添...

就喺我唔知自己仲要凌空飛幾耐之時...

我感覺到隻腳俾人捉住...拉返落嚟！

我成個人就一嘢撻落地！

當我都嚟唔切“哎呀”一聲，我就被人從後撳實個嘴！

仁慈就騎住我：「放心，呢吓都係我計算之內。」

媽呀！好柒呀！！！