《香港傭兵》: [Day 11－不入虎穴] PART 04
我再左望望！右望望！再望遠啲！
人又唔見...紅Van又唔見...
死喇死喇...唔係真係遲嚟一步...被西貢獻命班仆街捉走咗嘛？！
就喺我心亂如麻...唔知點做之時...
「飛揚哥哥？」背後就傳嚟一把可愛嬌俏嘅女仔聲！
我回頭一望...正正就望到不遠處...有個細細粒粒...著住黑色毛毛大褸...雙手插褸袋...留有黑長髮...平陰...帶住甜美笑容嘅女仔企咗喺度！
係朱海羅...係朱海羅！
我立即跑去朱海羅面前！攬實佢：『太好喇！太好喇！！！』
太好喇！你冇事就好喇！！！
我真係好擔心...好擔心你會被西貢獻命班仆街捉咗去！
而家冇事我就放心喇！
之但係呢...我...我攬住咗...朱海羅...
『嘩嘩嘩！』我立即鬆返開雙手！彈後兩步！
我做乜呀？！做乜咁猴擒呀？！
我同朱海羅...又唔係真係咁熟...
應該話...我哋只係見過一面...又只係Message咗幾句...
咁快就走去攬住人...太猖狂了吧！
只見朱海羅塊面紅卜卜，甜絲絲，又眼甘甘咁望住我：「原來你...你係咁掛住我㗎？」
『我...我我我...』死喇...係唔係有啲誤會呢...『我只係太過擔心你嘅安全...』
事實都係講清楚好啲...
無謂俾自己有不必要嘅妄想吖嘛...
「哦？擔心我嘅安全？」朱海羅一頭問號咁。
『嗯嗯...呢區呢...真係好危險㗎...』我都望左望右望清楚四周...
望望街上有冇光頭佬...望望路上有冇白色輕型貨車...
「好危險？我又唔係好覺咋喎...頭先有啲急急地，去咗個洗手間，都唔覺有咩咁危險～」朱海羅仲要咬住唇，一面天真咁。
嘩...真係死囉...成副入世未深嘅天真爛漫小妹妹咁嘅樣...
唔好話西貢獻命班仆街，我都想拐你返屋企調教啦...
『呃...呃...我哋都係唔好企喺路邊...跟我嚟...』我就拖實朱海羅行入三聖先...
始終...喺路邊都比較危險...
拖實朱海羅一直行，望左望右望清楚周圍嘅情況...
附近都唔算有太多人，就算有人都係得啲公公婆婆伯伯嬸嬸。
老弱殘兵咁...都應該唔成威脅嘅...
『係呢朱海羅...你...唔使返學咩？』我一邊提高警覺，一邊問問。
「我？本來要嘅～不過唔想返...仲有吖～叫我羅羅啦～」朱海羅又甜絲絲咁講。
『哦哦...羅羅...』好似怪怪地咁...叫朱海會唔會好啲？再唔係叫朱朱？又或者海羅都唔錯...『點解唔想返學吖？』
「因為吖...返學好悶㗎...」羅羅扁住嘴仔...
『返學悶都要返㗎...』嗱嗱嗱！又係咁喇！
前日又係話悶就唔返～
又係正正常常有學俾你返就話唔想返～
係唔係要好似呢邊七國咁亂，你先會鍾意返學呢～
呢個世界真係...痴Q線～
「讀萬卷書不如行萬里路吖嘛～所以我就唔返學，走入嚟特殊區睇睇～」羅羅甜絲絲咁望我打咗個眼色～
呃...又講得好似...好有道理...
之但係呢...
『呢區真係好危險㗎！唔好話冇咩事...有咩事都唔好入嚟喇！』如果唔係迫不得已，我直頭想逃離香港添呀！
「唔怕唔怕～有你喺我身邊嘛～」羅羅仲要甜絲絲咁咬住唇...望實我...
『呃...』有我喺你身邊...
你話我有帶精神液喺身就話姐...
冇精神液嘅話...我只係一個普通香港人...
咩係普通香港人？廢人囉...
拖住羅羅行去啲唔算太多人，又唔算太空曠，但要走又有好多路俾我哋逃走嘅地方。
「呢邊真係好唔同吖～只係啱啱入到嚟，就咁大分別～司機哥哥真係講得啱～喺呢度開始遊覽係最適合～」羅羅八八卦卦咁望望四周。
『係吖係吖...再入啲仲更荒涼添吖...』司機哥哥...都話係叔叔咯...
「係吖係吖？帶我去帶我去～帶我去睇多啲～」羅羅雙手捉實我隻手，Fing吓Fing吓～
『呃...我都係...送你返出去啦...呢度真係唔適合遊覽㗎...』小白兔真係唔識死...
「唔制唔制...」羅羅谷起塊面豬登，「如果你唔帶我行...我自己一個行啦...」
『唔好唔好！你一個人嘅話實在太危險喇！』傻嘅咩？！我仲點放心俾你一個人行呀？！
頭先見唔到你，都擔心死我啦！
「咁...」羅羅眼仔碌碌，「不如上你屋企吖～」
『上我屋企...唔得唔得！』嘩你睇吓佢幾咁冇危機意識！
點可以咁隨便就話上個陌生男子屋企㗎！
你咁樣同自動送上門叫隻狼“食我啦～食我啦～我好嫩口㗎～”有乜分別？！
「點解唔得姐...點解唔得姐...」羅羅又扁扁地嘴咁Fing吓Fing吓我隻手。
老老柒柒...我都想帶你上屋企...之但係...真係唔係咁方便嘅...
『女仔係唔可以隨便上男仔屋企㗎～知唔知道？』我嘅自控能力就好高嘅！一定唔會對羅羅呢個小妹妹做啲乜！
不過始終係同綽姿一齊住...仲有啲有關SPIRIT嘅嘢...俾羅羅知咁多都唔係咁好...
「嘻嘻～你咁老套嘅～哦！定係你諗埋啲...」羅羅面紅紅咁咬住唇...
『諗埋啲...唔係吖唔係吖！我冇吖我冇吖！我乜都冇諗㗎！我純粹係覺得男女有別咋！』仆街喇！又俾人誤會添！
點解...點解我總係咁容易令女仔誤會㗎呢？
「哦～男女有別～」羅羅又古古惑惑咁打量住我。
『係吖係吖...』點解我硬係覺得佢唔多信我...不過都係唔好糾纏喺呢個話題上，『咁...咁你想去邊呢？』
都係轉個話題...
「我？唔...」羅羅咬住唇咁左望望，右望望。
『呃...不如去坐輕鐵？』我諗...遊輕鐵河都算安全掛...
「坐輕鐵？好吖好吖～」羅羅好興奮又勁雀躍！「輕鐵係屯門嘅特色之一～由輕鐵開始遊覽係最好㗎喇～」
『呃...係...好...』吓...輕鐵都係特色嘢？
是旦啦...乜都好...最重要都係安全第一...
同羅羅向住輕鐵站行過去，佢都好主動咁翹實我隻手臂。
點解會咁㗎呢？
其實我哋真係唔係咁熟㗎咋喎...點解咁快就咁親密呢？
即係...雖然話我同羅羅件褸都有啲厚...Feel唔到啲唔應該Feel到嘅彈性...
之但係...翹住手都好親密㗎喇！！！
定係...呢個年代嘅小妹妹比較Open呢？
呃...我都唔知...
我淨係知...自己顯得有啲尷尬囉...
同羅羅行到過嚟輕鐵月台，仲未有車...
羅羅就充滿好奇心咁左望望，右望望：「原來輕鐵月台係咁㗎？」
『嗯嗯...』我都提高警覺，橫視四周。
「原來唔使俾錢搭車㗎？」
『嗯嗯...呃...以前要...』身處呢個月台...只有兩個阿伯...
「以前？即係幾時吖？」
『呃...我諗應該係喺未變成特殊區之前...』兩個阿伯嘅威脅應該唔大...
「係㗎？點解你會知嘅？你係土生土長嘅屯門人？」
『呃...都...都算係...』對面月台就有兩個婆婆...
「係㗎係㗎？咁啲路軌呢？一直都係露出嚟㗎？」
『呃...係吖...大部份都係露晒出嚟...』再前多幾個月台...就有兩男三女等緊車...
「唔怕出軌咩？」
『呃...唔露都有機會出軌...』四周嘅威脅都唔算大...希望上到車都係一樣...
「吖～有車喇有車喇～」羅羅好興奮咁指住架正要埋站嘅輕鐵～
我哋兩個乖乖咁等到輕鐵埋站，車廂裡面就只有一兩個仲瞓緊嘅流浪者。
「嘩～好有古典味吖～」羅羅一入到車廂，就自轉一圈。
『嗯...』羅羅呢個小妹妹...真係一定危機意識都冇...
「隻窗爛咗㗎喎～」羅羅挨近已經冇玻璃嘅窗框。
『係吖...好多車廂都係咁...』你睇你睇...明顯就係好唔安全...但羅羅仲覺得好有趣...
「好特別吖～」羅羅仲要一面天真～
你話死唔死...
「係呢係呢～幾時開車㗎？」羅羅探頭望出去。
『呃...呢個係總站，要等多陣先會開車。』等幾耐我就真係唔知喇...
「嗯嗯～」羅羅就成個乖乖小妹妹咁，耐心等待。
『呃...係呢...你一個女仔行入嚟，屋企人會唔會擔心㗎？』呢個時候，都係了解多啲羅羅嘅背景。
「我冇屋企人㗎～」羅羅帶住微笑擰擰頭。
『吓？』冇...冇屋企人？
「我係一個孤兒嚟㗎～細細個就喺孤兒院長大～」羅羅帶住微笑點點頭。
原...原來係...孤兒...
「到五六歲要返小學，返學時間就返學～放學就要返孤兒院～」
放學要返孤兒院...
「到上中學都係一樣...」
到上中學都...
「不過返學真係好悶呢～」
返學好悶...
『之但係...你唔返學咁樣走咗過嚟...佢哋會擔心你㗎喎...』始終都係一個小妹妹...
「冇㗎～」羅羅帶住微笑擰擰頭，「孤兒係冇人會擔心㗎～」
孤兒係...冇人擔心...
「學校唔會～孤兒院更加唔會～」羅羅繼續帶住微笑擰擰頭。
『點會唔...』我都未將個“會”字講埋出口...
「佢哋覺得少一個就更加好～」就俾羅羅打斷咗。
或...或者真係...
或者咁諗好冷血...但係事實...
事實往往就係咁冷血...
呢個社會...呢個世界...每個地方都係...講利益...
冇利益嘅嘢唔會做...
有利益嘅都要攞到盡...攞埋你個袋嗰份...
最重要都係自己富有！你死你事...
之但係...
『唔緊要...有我擔心你...有我關心你。』我唔會做一個唯利是圖嘅仆街！
雖然我唔信人間有暖，但對住需要幫助嘅人，我做唔到冷血！
冷血...係要對住啲仆街！
「多謝你呢～飛揚哥哥～」羅羅甜甜絲咁望實我。
『唔...唔多謝...』望住羅羅呢個甜樣...我就心都軟埋...
我哋互相對望咗一陣...
“叮 叮”兩聲...
「開車喇開車喇～」羅羅又好雀躍咁挨喺窗框～
『嗯～小心吖～』我都企喺羅羅身邊。
「嗯嗯～有你喺我身邊就乜都唔怕～」同羅羅一齊睇車外嘅風景。
輕鐵一直以慢速行駛。
「嘩嘩～街上好有古典味吖～嘩嘩～個月台好多塗鴉吖～」羅羅對街外嘅事物都好有興趣。
『係吖係吖～好多地方都係咁㗎～』對我嚟講並唔吸引...之但係我都盡量配合羅羅～
因為...我都係想佢開心啲～
而一路上，我都有Keep住提高警覺！
留意住路上有冇白色輕型貨車駛過！
埋站又會格外留意有冇西貢獻命嘅光頭佬上車！
不過總算好彩...一路上都唔見西貢獻命嘅蹤影。
而羅羅都係一面天真咁～
「係呢係呢～聽講屯門有牛牛㗎喎～但點解過咗咁耐都唔見嘅？」
『哦～屯門冇牛㗎～有牛係元朗～』
「真係㗎？真係㗎？咁係唔係會有牛牛喺馬路上行㗎？」
『哦～其實元朗喺好耐之前已經冇牛㗎喇～你咩年代嘅人嚟㗎？』