《香港傭兵》: [Day 13－愛港愛國] PART 02
片翼嘅最後一擊...係散發出...綠光...逆行者嘅綠色光芒！
「其實一直都有傳聞...」綽姿邊食塊火腿邊諗諗，「喺戰鬥期間，片翼身上散發出綠光...不過一直都只係傳聞，並冇真係有人見過。」
『但我哋真係見到㗎喎！」最後一擊...片翼嘅最後一擊...背後仲閃出咗隻...散發住綠光嘅天使翼！
「係...」綽姿點點頭，「我哋的確親眼見到...之但係...我到而家都仲係唔係好相信...」
『點解唔相信呢？』我又好奇喇！明明都親眼見到！仲有假㗎咩？！
「太唔合邏輯。」綽姿含住隻叉擰擰頭。
『有乜咁唔合邏輯姐？你唔俾...唔俾佢有逆行者嘅...綠色精神液㗎？』既然呢個世上有，自然就有方法得到！
「你又知逆行者係用綠色精神液？」綽姿含住隻叉打量住我。
『唔...唔係㗎咩？』我哋都係用精神液㗎啦！咁逆行者都係用精神液呢個推測都好正常吖！
「冇人見過逆行者使用精神液。更冇人見過綠色嘅精神液。」綽姿又食住腸仔擰擰頭。
『咁冇人見過唔代表冇吖！你頭先夠話冇人見過片翼身上散發綠光啦！但我哋尋晚真係見到喎！』見唔到唔代表冇，只可以話冇人見到！
「推測係要有事實根據。冇事實根據嘅推測叫估。」綽姿又含住隻叉擰擰頭。
『咁...咁你話喇！你有乜事實根據去解釋片翼嘅情況喇？』等我反問返你喇！
「本來片翼身上，一直都係散發住紅色光芒，係我哋SPIRIT嘅精神能量。但係突然...突然一下閃出綠光...曇花一現...」綽姿又諗咗一諗...
『咁都可以因為佢覺得唔夠打，立即用上逆行者嘅精神液姐！』雖然冇乜事實根據，但我真係覺得我嘅推測好合乎邏輯囉！
「你真係覺得...世上有綠色嘅精神液？」綽姿含住隻叉打量住我。
『我...係吖...』我真係覺得...咁樣係最合理...
逆行者本來都係行者...
本來係用唔知點樣得嚟嘅紅色精神液...
然後唔知點樣又喺邊度搵到更強大嘅綠色能量...
然後就用呢種強大嘅綠色能量製造綠色精神液對付我哋SPIRIT...
你話係唔係成件事出晒嚟先？
「都係嗰句，你呢啲只係估。」綽姿完全無視我嘅推測，繼續食早餐。
『係唔係估都唔重要！最重要都係放呢啲情報上情報庫賣～』講到會散發綠光嘅片翼係傳聞咁神秘...而家係我親眼見到喎！仲唔值錢吖？
當我正想搵返部電話...
「我勸你就唔好。」綽姿飲啖清水，擰擰頭。
『吓？點解吖？』你唔係想截我胡咁仆街吖化？！
「先唔好講SPAI俾唔俾你過...有關行者嘅情報都好敏感...仲要係先行者...仲要係片翼。」綽姿打量住我。
『咁...越敏感咪...越值錢囉...』唔係㗎咩？
「係值錢...之但係...」綽姿望住碟早餐諗一諗，「無謂引嚟不必要嘅麻煩。」
不必要嘅麻煩？
「SPIRIT嘅網絡好大...一陣引到啲麻煩嘅人視線就真係麻煩...」綽姿又諗咗一諗，「唔好話...今次俾片翼親自委派委託...已經好麻煩...」
『吓？』我又唔係好理解綽姿講乜...
「唔好吓喇。總之就盡量唔好再理有關片翼嘅事...我哋都最好盡量避開...無謂惹麻煩上身。」綽姿繼續慢慢食早餐。
唔好再理片翼嘅事...盡量避開...
好啦好啦～綽姿話乜就乜啦～
都係嗰句～佢係大佬我唔係～
『咁...點解唔抖抖呢？話晒尋晚先死裡逃生。』我都食住早餐。
「嗯？」綽姿唔係好Get到我想講乜。
『仲返學？』我用隻叉指指綽姿身上套校服。
「有邊日唔係死裡逃生。仲有...茵婷一早已經Send Message嚟問長問短咁。再唔返佢走上黎睇我就仲麻煩。」綽姿皺晒眉咁。
『原來係因為...茵婷～咁你都幾有人情味～』尋晚...都係...
綽姿立即目露凶光！用刀指住我：「唔好諗咁多！」
『係係係...』我立即舉起雙手！『唔諗唔諗...』
綽姿就冇我咁好氣，繼續食早餐。
其實...綽姿都真係幾有人情味...
好似尋晚咁...為咗保住我...
點解呢？點解綽姿總係要搞到自己咁冷血咁㗎呢？
如果真係咁冷血嘅話...我真係過唔到尋晚...
唔係唔係...喺發電廠嗰晚...再早啲...
青衣橋上嗰晚...再早啲...應該喺我嚟到未來唔夠三日...我就化為紅色粒子...喺空氣中飄散...消失...
「我頭先接咗個委託，你今日去準備。」綽姿食埋最後一啖腸仔。
『吓...又要搵命博...』你話要返學都算...仲要接委託？
我真係想抖抖囉...
「再唔做好啲表現就好快無命。」綽姿拎齊啲刀叉同隻碟就行去洗。
『做咁好表現，一陣咪又引起片翼注意...』我呢個推測冇錯喇掛？
「做應做嘅事。揀應接嘅委託接。」綽姿一邊洗餐具。
『咩係應做應接吖？』
「你唔使理。我會有分數。」
又係我唔使理...
好啦好啦～有綽姿安排...我係可以放心～
我...要理嘅就只有...唔可以成為綽姿嘅負累！
就算幫唔到手...都要照顧好自己！做好自己嗰份！
「去準備委託之前，先拎啲衫去洗。」綽姿洗完餐具，就行去梳妝檯照照鏡，梳梳頭。
『哦...』又要拎衫去洗...
唔...計一計...對上嗰次洗衫...都好似差唔多有一個禮拜...
「記得多啲留意個App。」綽姿著返件大褸，孭好個袋仔，「出去自己小心。」
『嗯...你返學都小心喇...』望住綽姿著埋對婆仔鞋...
「嗯。拜。」
『拜...』
目送住綽姿出門之後，又得返我一個...
唉...尋日雖然驚險，但有綽姿喺身邊...
今日又得返我自己一個...
又唔知個委託要我做啲乜...
唉...都係開個App睇睇個委託先啦～
我含住條腸仔望一望，部電話又係放咗喺茶几。
我就咬住腸仔行去拎返部電話睇睇...
一解鎖之後，第一樣留意到嘅唔係SPIRIT App...而係...
『有...Message...』仲要顯示有十幾個新信息。
咁早邊個Send嘢過嚟？
我就隨手撳開個Message睇...
『係...羅羅！』終於俾我等到羅羅Send Message俾我喇！！！
唔知點解...我真係好興奮！
就好似忍尿忍咗成朝，終於可以一砲過屙晒出嚟！（我咁形容好似有啲奇怪...）
唔好理咁多！開嚟睇睇羅羅Send咩過嚟先！
我一打開羅羅嘅對話...就見到...
『學生妹Look？！』係相！好幾張羅羅著住校服對住塊全身鏡影嘅自拍相！！！
羅羅身上著緊嗰種校服係...白色恤衫...灰色校裙...灰色學生襪...同綽姿一樣嗰種傳統校服！
好多張...唔同Pose...條校裙有啲短...短到上大髀...成套校服都好貼身...羅羅已經夠細粒...仲要咁貼身咁細件...小學校服嚟㗎？
仲要著學生妹利器...婆仔鞋！
成個綽姿咁...都係一樣咁吸引...
唔得唔得！唔可以諗衰嘢㗎...唔可以諗衰嘢㗎！
我已經冇對綽姿有乜FF㗎喇...對羅羅都唔可以㗎！
之但係...真係好吸引...越睇越吸引...有幾張仲...拉高咗少少...條校裙...對大髀好白...好滑...好幼嫩...差啲就露...露...
嗚呀！！！唔好有反應呀！！！
讓理智在叫著冷靜冷靜！！！
快啲碌...碌到最後...見到羅羅Send咗句...“我可唔可愛～”...
再睇睇個時間...都係啱啱冇幾耐...五六分鐘之前Send過嚟...
唔...試吓回覆...
『好...可...愛...』我就咁Send呢三隻字過去...
好快...羅羅就上線喇！
然後又好快...輸入中！
“噹” “多謝～咁你鍾唔鍾意吖？”
我...鍾唔鍾意？
嘩...呢個問題你叫我點答吖？
點都唔會係答唔鍾意啦！
之但係如果我答鍾意...又會唔會嚇親人呢？
嚇親人就一定唔會...只係...怪怪地囉...
老老柒柒女仔Send完啲可愛相仲要問你鍾唔鍾意，明顯就係有所暗示啦！
你答得鍾意嘅話，就踏入Flirt嚟Flirt去嘅一頁...
之但係我唔想囉...我有月月㗎喇嘛！點可以背住月月同其他女仔Flirt嚟Flirt去？！
咁樣嘅話...只可以答得...
『我...一...向...都...好...鍾...意...學...生...妹...㗎...嘻...嘻...』等我答得變態啲！
超越羅羅嘅可接受範圍！
咁羅羅應該就冇性趣Flirt落去！
句嘢Send咗過去一陣，好快...羅羅就輸入中！
“噹” “E～好變態呀～”
嗱～係唔係Work呢～
然後就要...
『係...吖...係...吖...我...好...變...態...㗎...～...點...吖...？...返...緊...學...？』拉返開個話題～
就算羅羅唔係太反感，都冇機會再Flirt落去～
呢一刻...突然覺得自己係專家～
句嘢Send咗過去一陣，好快...羅羅又輸入中！
“噹” “係吖係吖～而家搭緊車返學～係唔係好乖乖呢？”
總算肯聽話返學...
『真...係...好...乖...乖...喎...』對住小妹妹係要開口讚～
句嘢Send咗過去一陣，好快...羅羅又輸入中！
“噹” “多謝～我差唔多返到去喇～遲啲再傾過～”
『嗯...好...啦...小...心...啲...喇...』
句嘢Send咗過去一陣，好快...羅羅又輸入中！
“噹” “嗯～^3<”
都好啦～知道羅羅平平安安咁返學校～總算安慰～
可能...出面都係比呢度安全嘅...
好啦～知道羅羅平安就要做返自己要做嘅事！
我就打開個SPIRIT App，睇睇現有委託...
『獨佔委託...捉拿目標人物？』又係捉人？！
上次捉人嘅委託...就係捉宋伯伯...
今次又會係...捉咩人？
當然要捉咩人我又係睇唔到...
我仲可以睇到嘅係...報酬...
『30 Sil？！』有冇差唔遠呀？！
我記得上次捉宋伯伯有...10,000 Sil...
今次得30 Sil...係唔係即係話簡單好多？冇咁危險？
或者啦～邊知咁多～
不過我諗點都應該容易過尋晚啦...
尋晚真係...強迫委託真係唔講得笑...
唉...
我再睇睇右上角個Balance...
『789 Sil？！』點解好似...冇多過嘅？
尋晚個強迫委託冇報酬㗎？！
定係又俾綽姿食咗吖？
我再撳個委託記錄睇睇...
『冇...』冇記錄到...尋晚嘅委託...
最新嘅記錄...都係前日...西貢獻命...因為遇到必然而失敗咗嘅護送委託...
點解會咁㗎呢？
點解尋晚個強迫委託冇記錄到㗎呢？
唔通...強迫委託唔會留記錄？