《香港傭兵》: [Day 14－紅色警戒] PART 07
好似戴咗夜視鏡，俾人用射燈兜口兜面兜眼射咗鑊甘一樣...
隔咗一段時間...白茫茫一片咗幾耐先睇到...睇到有好多...好多盞大射燈...射住我？！
成個空間...上下左右...四面八方...都有大射燈射住我！
我身處嘅空間...整個空間...冇任何雜物...障外物...就連想搵幅牆擋擋都冇...
呢度唔係咩War Game場...呢個係...陷阱！
喺強光之中...我只見遠處有個身影...轉身...望向我...
呢個身影係...馬尾女！
馬尾女喺強光之中...向我揮揮手...然後就慢慢消失喺強光之中！
『可惡！』當我想衝向馬尾女消失嘅方向之時...
“吱！啪啪啪啪啪啪啪啪啪啪！”我全身上上下下左左右右前前後後不停中彈！！！
睇唔清楚！成個空間都係白茫茫一片！
“啪啪啪啪啪啪啪啪啪啪！”回音傳遍整個空間！
我唔可以靠對眼...唔可以靠對耳...去分辨子彈由邊個方向射過嚟！
我只可以靠...靠身體...
“啪啪啪啪啪啪啪啪啪啪！”四方八面...由身體中彈感覺得到...係由上方...四方八面咁打斜射落嚟！射向我身上！
雖然話唔入肉...但好痛！又密又痛！！！
痴撚線乜鳩嘢機槍呀？25mm GAU-22/A呀？！
“啪啪啪啪啪啪啪啪啪啪！”
唔得呀！雖然話唔入肉...但真係好撚痛！痛撚到手上支手槍都跌埋落地！話唔定仲俾子彈射到散晒！
“嗡！嗡嗡嗡嗡嗡！”我立即集中精神，亮出紅光刀刃！亂鳩咁Fing！
睇唔到！白茫茫一片根本就睇唔到啲子彈由邊度飛埋嚟！
“嗡嗡嗡嗡嗡！”一路鳩Fing Fing咁Fing鳩把精神刀！擋得幾多得幾多！
事實上真係擋得唔係好多...定係真係用上十幾廿把25mm GAU-22/A對住我嚟射！
我仲係感覺到全身上上下下左左右右前前後後都不停咁中槍！！！
“啪啪啪啪啪啪啪啪啪啪！”屌你老母真係好撚痛！
再咁中槍真係唔係辦法！除咗痛之外...精神能量一定會流失得好快！
再係咁落去...好快就耗盡精神能量...進入深層睡眠！
點好呢？我應該點做好呢？點解我會跌咗落呢個陷阱呢？！
由始至終...馬尾女都冇諗住要帶我搵目標人物...
由始至終...馬尾女只係想帶我嚟陷阱！
可惡呀！！！
“嗡嗡嗡嗡嗡嗡嗡嗡嗡嗡！”我奮力咁揮動精神刀！圍住自己身邊不停揮！！！
“啪啪啪啪啪啪啪啪啪啪！”究竟喺邊個方向？上邊嘅邊個方向？！
我感覺唔到...我感覺唔到確實嘅方位...距離又有幾遠...
唔得...唔可以再俾佢哋撳住嚟掃射...再係咁落去...真係好快...好快就...
就喺我仲未諗到應對方法...中槍中到我就嚟要跪低之時...
我感覺到...感覺到有股氣息...有股熟識...且霸道嘅氣息...係綽姿！綽姿嘅氣息...喺上面！
綽姿嘅氣息以極速喺上面逆時針咁圍住我轉！
射燈嘅白色強光，亦同時跟住綽姿嘅氣息圍住我咁熄滅！
子彈亦同時跟住射燈嘅熄滅而停止擊中我身！
當綽姿嘅氣息剛好逆時針圍住我轉完一圈...成個空間靜晒...回復漆黑一片...身上散發住紅色粒子嘅綽姿就跳到落嚟我身邊！
『綽姿...你...』我都未將我想講嘅說話講完...
「叫我瓦解。」綽姿捉住我衫領，拉我埋去佢面前！
『係係...瓦解...點解你...你會嚟咗？』嚟咗幫我解圍...
「你吖...」綽姿一手搭住我膊頭，大大力咁捏！「古古惑惑咁...就知你有嘢隱瞞我...所以就跟住你。」
『我我我...我都係唔想你殺咁多人姐...痛痛痛痛！』捏到我就嚟進入深層睡眠喇！
「你都仲係咁天真！」綽姿再大大力咁拍拍我膊頭！「你唔殺佢哋...佢哋想你死！喺呢個亂世，唔係你死就係我亡。唔死人係唔會有改變...你明唔明呀？」
『我...我只係覺得...有啲人係抵死...有啲人...應該繼續生存...』雖然我講完出口都覺得自己好天真...
「邊啲人抵死？邊啲人應該繼續生存？點定？邊個定？你定定我定？邊個力量大就邊個生存！邊個阻我就要死！」綽姿再用力一捏！捏住我膊頭！
又係弱肉強食...適者生存...
「而家唔得閒同你上理論課！目標人物喺邊呢？」綽姿左望望！右望望！提高警覺！
『我唔知吖...我只係知上次有個黃傘嘅馬尾女捉咗目標人物嚟呢座大廈...』本來捉到馬尾女...俾佢走甩咗...
「唔喺...已經唔喺...」綽姿提高警覺擰擰頭！
『吓？』你又知唔喺？
「有啲古怪...跟我嚟！」綽姿拉住我，衝出War Game場！
『喂喂喂...去邊吖？』我起勢咁跑！
「唔好咁多嘢問！總之跟住我！」綽姿以忍步喺走廊跑！
唔好問...唔好問...我都只好以忍步跟住綽姿身後跑！
緊隨其後！只見綽姿以忍步向住走廊盡頭嘅牆身跑過去！
“嗡！”綽姿亮出刺眼嘅紅光刀刃！向住牆身揮幾刀！
“嗡嗡嗡嗡嗡！”牆身被紅光刀氣斬開一大個缺口！
綽姿跑到缺口一跳！就跳咗出去！
又跳樓？唉...跳就跳啦！
我諗都唔諗就由缺口向外一跳！
跳咗出去...再望望樓下...先醒起呢度成廿幾層樓高！
仆街喇呢次！
由廿幾層樓飛落街！
綽姿好型咁俯衝式向下飛！我就好柒咁伸直晒手手腳腳大字形向下墮！
唔使好耐...都真係幾快...我就望住綽姿一個轉身安全落地！喺馬路中心仲要擺個有型姿勢！
而我都緊隨其後！一落地碌兩圈卸一卸力！
嘩嘩嘩嘩！廿幾層樓都跌我唔死呀！我有進步㗎！
就喺我都仲未諗點解又要玩跳樓之時...我望到前面...停泊咗幾架輕型貨車喺路邊...再前啲嘅位置...有幾個人...啱啱喺後巷衝咗出嚟！
嗰幾個人一見到綽姿，就立即遞起機槍！對住我哋！
佢哋係...係黃傘力量嘅人？
喺千鈞一髮之際...我再望清楚啲...望望嗰幾個揸實晒機槍對住我哋嘅人...後方...仲喺後巷裡面...係馬尾女...仲有目標人物！
係馬尾女...係馬尾女捉住仲著住白色病人袍嘅目標人物！
馬尾女一見到我同綽姿喺馬路上，就立即轉身！拉住目標人物向住後巷入面跑！
同時，又有幾個手持長槍嘅身影喺幾架輕型貨車裡面跳出！
原來...嗰幾架停泊喺馬路邊嘅輕型貨車...
“啪啪啪啪啪啪啪啪！”夾夾埋埋大約有十個人同時向住我哋開槍！
“嗡！嗡嗡嗡！”綽姿立即以忍步拉近距離！同時揮動手中嘅精神刀擋子彈！
迅雷不及掩耳！幾道紅光一閃！綽姿就跑到去輕型貨車前，連人帶車斬成碎件！
綽姿並冇停落嚟，繼續向住後巷方向衝過去！
“嗡嗡嗡嗡！”又揮動手中嘅精神刀幾下，就將其餘敵人分屍！
果然...殺人唔手軟...
綽姿解決晒後巷外面嘅敵人之後，就衝入後巷！
係...仲未完...仲要捉目標人物！
我都不敢怠慢！立即跟綽姿衝入後巷！
跟住綽姿身後喺後巷轉咗兩個彎，我就見到...
「唔好過嚟呀！」馬尾女用槍脅持住目標人物！
目標人物仲係神情呆滯...雙眼無神...
係俾人打咗鎮靜劑？
「唔好過嚟呀！我一槍打爆佢個頭！」馬尾女用槍隊實目標人物個頭！
『你聽我講！交佢俾我哋！你走唔甩㗎喇！』聽我講啦！唔係嘅話...綽姿一郁手，你就變散件㗎喇！
「就算係同歸於盡...我都唔會交返實驗品俾你哋！唔好過嚟呀！！！」馬尾女再用槍隊向目標人物個頭！
實驗品？
又係講“實驗品”呢三隻字？！
目標人物仲係神情呆滯！完似唔識驚咁！
『你聽我...』正當我想再踏前一步之時...
綽姿拉一拉我！
哦？做咩吖？唔係連你都俾佢拋到吖化？
定係...綽姿係想搵機會...出手？
「退後！退後呀！」馬尾女用槍隊到目標人物個頭實一實！
綽姿仲係捉實我隻手...
做咩吖？究竟綽姿想點吖？係唔係想搵機會一刀砍甩馬尾女個頭吖？
「退後呀！我叫你哋退後呀！係唔係唔信我會一槍打爆佢個頭呀？！」睇得出又聽得出馬尾女非常緊張！
喂你唔好咁啦...你再係咁...綽姿真係會一刀砍你個頭落嚟㗎！
就喺呢個時候，綽姿拉我向後：「唔對路...」
『吓？』唔對咩路吖？
只見笠起帽嘅綽姿...陰暗嘅面容之中...兩點紅光：「有啲唔對路...」
有啲唔對路？有咩唔對路先得㗎？
就喺呢個時候...
「嗚...嗚...」
我望返去馬尾女同目標人物...
「嗚...嗚...」
我見到...目標人物...抽搐...
「嗚...吖...呀...嗚...」
個頭不自覺咁...震...震...擰...擰...
「嗚...嗚...呀...嗚...」
目標人物全身上上下下都震...震...抽搐！
做咩吖？羊癇症發作吖？
馬尾女都捉唔住目標人物！鬆開手...退後兩步：「弊喇...弊喇...」
“啪！啪！”馬尾女對住目標人物後腦開咗兩槍！
之但係呢兩槍...好似乜效果都冇！
「嗚...呀...嗚...嗚！」目標人物仲係全身上上下下抽搐！
咩事吖...究竟而家發生緊...發生緊...
「弊！」綽姿立即拉我向佢身後！
突然！
「嗚...嗚！呀！呀！嗚呀！！！」目標人物一聲大嗌！雙眼發出刺眼紅光！
同時！目標人物身上爆出大量紅色粒子！
係！係爆出！因為就算有綽姿喺我面前擋住，都感覺到有極大嘅衝擊力不斷衝埋嚟！
「呀！」馬尾女亦同時被衝擊力彈飛九丈遠！
咩事吖？點解目標人物身上會有...氣息？
係...係氣息...好強大...亦好混亂嘅...氣息...
「嗄...嗄...嗄！」目標人物唔單止成對眼係紅色...全身散發住紅色粒子...就連個口都不停噴出紅色粒子！
點解會...點解會咁...
我個腦仲係一片空白之時...
「嗚呀！！！」目標人物就發晒癲咁...一邊亂爪！一邊向住我哋嘅方向衝過嚟！
目標人物嘅雙爪仲要發出紅光！閃過不停！仲爪到兩邊牆身都係爪痕！爪斷水管！
“嗡！”綽姿都亮出刺眼嘅紅光刀刃迎擊！
“吱！！！”綽姿一刀擋住目標人物嘅紅光雙爪！
「嗄！」但綽姿好似唔係好夠力擋！
唔係吖化？連綽姿都擋唔住？
我當然唔再食花生！
“嗡！”立即亮出紅光刀刃一刀砍落目標人物雙臂！
係就係兜刀砍落目標人物雙臂...應一應嗰隻...之但係...唔入肉...
紅光刀刃與雙臂之間...散發住無數咁多紅色粒子...
點會...唔理咁多！沿住目標人物手臂，橫刀斬向佢條頸！
“吱！！！”但當紅光刀刃斬到去目標人物條頸，又係斬唔入！！！
點會...點會有紅色粒子...保護住？！
「喝！」綽姿同我以精神刀用力一推！將目標人物彈開！
全身散發住紅色粒子嘅目標人物退後咗幾步，綽姿就乘勝追擊，一個忍步接近目標人物再連環斬！
“嗡！嗡！吱！嗡！吱吱！！！”就算刀刀都砍落目標人物身上，但冇一刀係入肉！
連綽姿都...砍唔入？
我都唔諗咁多，一個忍步跟上綽姿，向住目標人物施以橫斬直砍轉身半月斬！
我同綽姿一左一右，喺後巷同目標人物交戰！
雖然我哋刀刀都成功命中目標人物，但無論係中頭中頸中手中身體任何一部份都好，都係唔入肉！
就算綽姿一刀刺向目標人物胸口，都係刺唔入！
而目標人物就用發出紅光嘅雙爪，不停向我哋亂爪！
“嗡！嗡嗡！吱！嗡嗡嗡！吱！！！”雖然話目標人物係亂爪，爪到牆身都佈滿爪痕...但攻速之快，我同綽姿都避唔得幾多...擋唔到幾多！
話口未完...
“嗡！嗡！”我同綽姿各人都中咗一爪！
我同綽姿立即跳後兩步！同目標人物保持一段距離，再望望自己胸口...
我胸口就多咗四劃...噴出紅色粒子...
綽姿胸口都多咗三劃...有唔少紅色粒子飄出！
點會...點會能量可以大到...
「嗚...嗚...呀...」目標人物握實雙拳...全身抽搐！
做...做咩吖？點解總係覺得...不妙...
「呀...嗚！嗚呀！！！」話口未完，目標人物擘大個口！向天一嗌！一碌紅色巨柱直噴上天！
係...係口砲？！
“轟！”左右兩邊嘅牆身被口砲嘅砲風轟碎！
好...好大威力！
目標人物正想耷返低個頭，用口砲掃落我同綽姿身上！
“轟！”刺眼紅光巨柱正要向住我哋一掃以落！
「今次弊！」綽姿立即攬實我踎低！用背脊幫我擋！
唔得㗎...我感覺到...呢股力量太大...綽姿擋唔住㗎！
就喺刺眼紅光巨柱快要掃到綽姿背脊之時...突然有個身影喺我哋面前出現！幫我哋擋住口砲！
身影面前不停有紅色粒子飄出！擋住紅光口砲嘅掃射！
呢個身影...呢個散發住陌生氣息嘅身影...係邊個？
“轟！吱！灑...”當紅光口砲完全被抵消之後...
我望到呢個...著上行者長袍嘅身影...回頭望住我...
呢個帶住微笑望住我嘅妹妹仔係...
「妖邪？！」綽姿望住羅羅...
冇錯...呢個啱啱幫我哋擋完口砲...而家仲帶住微笑望住我嘅妹妹仔...明明就係羅羅！
點解...點解綽姿會叫佢做...妖邪？！