《香港傭兵》: [Day 14－紅色警戒] PART 10
我仲記得嗰個喺會展開嘅會議...
有解放軍總司令...有國安局局長...仲有片翼...
佢哋仲好似講咗啲乜合作...又好似唔係好傾得埋...
其實...同今次目標人物...有冇關係㗎呢？
「好啦～都冇乜頭緒～食唔食啲嘢先吖？」羅羅起身落床。
綽姿擰擰頭：「唔餓。唔使喇。」
『呃...我都唔餓...』用完精神液...真係感覺唔到有餓嘅感覺...
「唔餓都要食啲嘢㗎～」羅羅就邊行出房，「都夜㗎喇～」
都夜？
我左望望，右望望，喺充滿少女Feel嘅房間望望有冇鐘...先發現原來而家都成十點幾！
嘩！究竟我深層睡眠咗幾耐？！
「真係唔使。」綽姿著返件毛毛大褸。
我都望望...我件放咗喺凳上...爛晒嘅毛毛大褸...
穿晒窿...爛晒...已經唔著得...
唉...同綽姿嘅情侶褸吖...著唔夠一日就收咗皮喇...
「唔緊要啦～」羅羅喺出面嗌入嚟，「出嚟食啲嘢啦～唔收錢～」
「你會咁好死？」綽姿就行出房。
我就睇睇有冇嘢漏低先...
電話...鎖匙...銀包...好好好～袋返好～
我再望望...羅羅間房...真係好少女Feel...
真係估唔到...一個咁少女Feel嘅羅羅...竟然係SPIRIT嘅行者...
我到而家都仲係未接受到囉...
「飛揚～」羅羅又喺出面嗌入嚟，「仲喺我間房裡面做咩吖？係唔係搵緊我啲內衣褲收咗喺邊吖？」
『唔係吖唔係吖！我袋返好電話鎖匙銀包而家出嚟喇！！！』我都係立即跑返出去！
唔好俾羅羅誤會...唔好俾羅羅誤會我係死變態！
一出到廳，其實都係好少女Feel...
都係以Pink Pink為主...
綽姿牛油搽麵包：「係你話唔使錢㗎。」
羅羅都拎起塊麵包：「係吖～飛揚～過嚟坐吖～」
『哦哦...好...』我就坐喺羅羅身邊...
「又唔知你有乜陰謀...」綽姿咬啖牛油麵包，冷眼打量住羅羅。
「我會有乜陰謀吖～愛屋及烏咋嘛～呵～飛揚～」羅羅幫塊麵包搽好牛油，就餵到我嘴邊～
『吓...吓...』我咬住塊麵包...唔知俾咩反應好...
「嘻嘻～你呢個呆呆樣真係好可愛～」羅羅同我一齊咬塊麵包～
望住近在咫尺...帶住甜絲絲嘅微笑...可愛嘅臉蛋...
我感覺到自己塊面有啲熱...應該紅緊...
『哈哈...係咩係咩...哈哈...』唔得唔得...唔可以亂諗嘢...唔可以亂諗嘢！
「嗯嗯～」羅羅專登食我食過嗰邊，再將佢食過嗰邊餵埋我嘴邊，「吖～吖～」
『吖...吖...嗯...』好...好甜喔...
係...係羅羅嘅口水尾...帶住陣陣嘅...士多啤梨味？
點解呢？點解少女嘅口水總係帶住士多啤梨嘅甜味㗎呢？
嘩...唔得吖...唔得吖...食過羅羅嘅口水...好想錫佢個嘴嘴...
羅羅仲要用條脷仔舐舐佢個嘴仔...咬咬唇...
嘩...好挑逗吖...
此時，綽姿拎起把刀！搽啲牛油落麵包！
唔好諗唔好諗！
唔好亂諗咁多！綽姿喺度㗎！！！
咁如果...綽姿唔喺度呢？
都唔可以諗唔可以諗！我有月月㗎嘛！！！
唔可以衰喺啲小妹妹手上㗎...
我一直都好驚自己會把持不住...衰喺啲小妹妹手上！！！
只係一直都好好彩（定係唔好彩？），一直都冇咁嘅機會...
但而家...好似有機會...
「嚟吖嚟吖～食多塊吖～」羅羅又搽咗啲牛油落塊麵包度，餵到我嘴邊～
『得得得...自己嚟...自己嚟...』我接過羅羅手上塊牛油麵包...
都係自己嚟喇...都係自己嚟喇...唔係好易出事！！！
「嘻嘻～我都明嘅～有外人喺度係怕羞啲～」羅羅甜絲絲咁望實我～
「你話邊個外人？」綽姿冷眼望實羅羅，「佢係我嘅隨行者。」
「咁又點？」羅羅仲係甜絲絲咁望實我，「梁綽姿死咗嘅話，你就跟我啦～」
綽姿死咗嘅話...跟羅羅？！
「你死我都未死。」綽姿咬住塊麵包，冷眼望實羅羅。
「係咩係咩～睇吓點～」羅羅帶住陰險嘅微笑...打量住綽姿...
點吖...而家算唔算係有兩個小妹妹為我呢個大哥哥爭風呷醋吖？
不過而家先唔好理呢個問題...
綽姿死咗嘅話...跟羅羅...
係喎...我從來都冇諗過萬一綽姿死咗嘅話...點算...
仁慈都講過，萬一跟緊嘅執行者死咗，而自己又未有能力成為執行者嘅話，係要跟隨另一個執行者...
如果跟羅羅嘅話...
如咩果呀？綽姿咁勁～
真係唔使諗咁多～諗點保住自己條命仔好過～
『究竟點先可以...再強啲...』我望住兩個小妹妹...
兩個都強到一個點嘅小妹妹...
「算罷啦你。」綽姿擰擰頭，冇我咁好氣咁繼續食牛油麵包。
做咩姐...又睇我唔起...
「其實都唔係吖～」羅羅托住個頭，打量住我，「我總係覺得...覺得喺你身上...有啲特別...」
喺我身上...有啲...特別？
「特別弱。」綽姿咬住麵包點點頭。
做咩姐...又話我弱...
「除咗特別弱...仲有啲啲...特別...」就喺羅羅眼甘甘咁打量住我之時...
我感覺到...電話震？
好似唔止我...綽姿同羅羅都好似感覺到電話震...
我哋三個都同一時間拎部電話出嚟睇睇...
然後就睇到電話個Mon裡面...正正就顯示緊一條訊息...
訊息寫住...
『緊急...』委託？！
我哋三個都望實部電話...
係緊急委託？！
點解又會有緊急委託㗎？！
羅羅同綽姿互相對望...大家都唔出聲...
『呃...羅羅...你都收到緊急委託？』既然你兩個都唔出聲，只好我出啦...
「嗯～」羅羅帶住微笑點點頭～
『點解啲緊急委託咁密㗎？！』究竟係點安排㗎？！
「嗯？」羅羅一頭問號咁望實我，「你哋近期有收到強迫委託咩？」
『有吖...呢一兩個禮拜都收過兩次喇...』真係平均每個禮拜都有一次...
「嘩！已經收過兩次㗎喇？！」羅羅睜大佢對大眼仔！「要做啲乜㗎？」
『要做...』我都仲未講完...
「喂！」綽姿就喝停我！
『唔！』我就雙手撳住自己個嘴，望住羅羅擰擰頭！
我係跟綽姿㗎...我係要聽綽姿話㗎...
「使唔使咁小心吖～」羅羅帶住陰險嘅微笑打量住綽姿，「不過一個星期一次強迫委託又真係幾密喎～唔係唔係...而家直頭係兩個星期三次添～」
『你都話密呢！正常應該係幾耐一次㗎？』我又想問問喇！
「正常吖...」羅羅眼仔碌碌咁諗諗，「通常都係一個月兩次...有時突發嘅可能一個月三次囉～」
『突發？！』點為之突發吖？
我次次都覺得好突發㗎喎！
「就好似今次咁～」羅羅拎住部電話Fing兩Fing～
好似今次咁？
我再睇返自己部電話....委託嘅內容...
就只有...盡快到集合地點集合...
『都係乜都冇喎...』咁又點知今次係突發呢？
定係又係得我一個睇唔到內容咋？
「“盡快到集合地點集合”～」羅羅強調呢個唯一指示～
『咁...即係？』盡快集合囉...
「只有突發事先會用“盡快集合”～」羅羅帶住微笑點點頭，「如果唔係嘅話...都一定會有集合時間～」
『集合時間...』又...又好似係喎！
「如果預先安排好嘅...」羅羅又眼仔碌碌咁諗一諗，「就算要去到目的地先知道要做乜，但集合時間就一定會預定好俾大家集合～就只有突發嘅先會用盡快～」
冇錯喇冇錯喇！羅羅解釋得好詳盡吖！我又脹知識了！！！
綽姿冷眼望住我：「所以我就話佢弱。」
喂...唔好喺羅羅面前落我面得唔得姐...
有啲嘢唔使成日掛喺嘴邊嘅...
「唔係吖唔係吖～」羅羅甜絲絲咁望實我～「咁咪幾可愛～」
羅羅真係好～經常幫我講好說話～
綽姿冇我咁好氣，再望住部電話：「集合地點係...沙田...」
係沙田...
羅羅又望住部電話諗一諗：「距離我哋呢度...唔算好近...亦唔算遠...點解會搵埋我哋？」
點解會搵埋我哋？
雖然唔知點解羅羅會咁問...之但係我都想問呢個問題...
綽姿又諗一諗：「或者係因為...需要好多人...」
「需要好多人？」羅羅又望住部電話，「係喎...好多成員...」
好多成員？
我又睇睇部電話...成員...加埋我哋三個...而家都有十幾人...仲陸續有人加入...
十幾廿人算多？
或者...或者喺咁突發嘅情況之下...算多掛...
綽姿一直望住部電話：「可能嗰邊都唔夠人...要喺我哋呢邊搵...」
羅羅又望住部電話點點頭：「呢個可能性好大...要搵到過嚟呢邊...咁啱我哋就喺呢邊...」
『需要好多人...嗰邊都唔夠人...咁即係...唔可以唔去啦...』我仲諗住...拒絕...
其實一見到有緊急委託嘅一剎那，腦海中就閃出今次可唔可以拒絕...
我記得綽姿講過㗎嘛...每個月至少要執行一次...可以有一次拒絕㗎嘛...
我哋都執行咗兩次啦...
之但係講到咁缺人...
「算你今次有用腦。」綽姿冷眼望一望我。
讚我可唔可以讚得動聽啲？
「睇嚟都應該要準備～」羅羅就起身行返入房～
準備？長袍又著咗上身...精神刀柄都插咗喺腰間啦...仲要...準備...
羅羅好快就著咗件黑色毛毛大褸，手上仲拎住件黑色毛毛大褸行到我身邊：「著住佢啦～」
『哦？』我接過羅羅手上件黑色毛毛大褸...
係...男裝褸？
羅羅帶住微笑打量住我：「著住佢出去冇咁礙眼～」
『哦哦...唔該...』我就著起件大褸，『又...又幾啱身喎...估唔到你又會有男裝褸喎...』
真係唔大唔細啱啱好～
「我之前個隨行者留低嘅～」羅羅又踎喺個矮櫃前摷幾摷～
『哦？你都有隨行者㗎？咁佢而家呢？』又唔見有人跟住羅羅嘅？
「死咗Luu～」羅羅拎咗三支精神液出嚟，輕輕鬆鬆咁答～
『死...』死咗？！
咁呢件褸咪...遺物？！
著人遺物...唔多吉利喎...
「係吖～死咗吖～喺我遇到你之前...應該係上個月嘅事喇～之前喺街上見佢毒毒地咁幾可愛，咪帶佢返嚟做隨行者囉～之但係玩唔夠兩個星期就玩厭咗～咪點佢深入敵陣囉～點知一去就不返喇～」羅羅遞支精神液俾綽姿，「睇你哋都冇精神液用㗎啦～」
吓？毒毒地咁幾可愛...
我都毒毒地㗎喎...
你仲開口埋開話我可愛...
咁我又會唔會俾你玩唔夠兩個星期就玩厭...推我去死㗎？
咁講法...都係跟綽姿穩陣...
「多謝喎。」正當綽姿想拎走羅羅手上支精神液...
「多咩謝吖？」羅羅立即縮開！「要俾錢㗎～」
「知你冇咁好死...幾錢？」綽姿冷眼望住羅羅。
「兩支Level 3...」羅羅諗一諗，「加埋200 Sil啦～」
嘩...200 Sil...好貴喎...
「食水唔使咁深吖嘛？」綽姿冷眼望住羅羅雙手中，兩支Level 3精神液。
「數還數～路還路～而家你哋冇精神液喺手～況且...」羅羅帶住陰險嘅微笑諗一諗，「聽講而家精神液好缺...嚟緊想喺出面搵都唔係咁容易...」
嘩...啲口吻咁奸商嘅？果然SPIRIT裡面冇個係好人...