《香港傭兵》: [Day 15－短兵相接] PART 11
著住黑色毛毛大褸嘅羅羅帶住甜絲絲嘅微笑企定定，望住我同綽姿。
我行近羅羅兩步：『點解你...會喺度㗎？』
「我？」羅羅指住自己個鼻，「執行委託囉～」
『吓？你都接咗委託吖？』竟然又可以同羅羅一齊執行委託...
「係吖係吖～嘻嘻～」羅羅帶住甜絲絲嘅微笑點點頭～「我哋又可以一齊行動喇～」
太好喇～又可以同羅羅一齊執行委託...實在太好喇～
雖然話綽姿要我小心羅羅呢個小女孩（我係有好好記住綽姿嘅忠告㗎！），但羅羅咁勁揪，有佢一齊嘅話總係會放心啲～
始終有個勁啲嘅行者一齊執行委託，成功率都高啲嘛～
嗱～你又唔好真係當我係大埔LuLu吖～羅羅會利用我哋，同樣我哋都可以利用返佢㗎姐～
綽姿行近羅羅面前：「估唔到...你都會對呢啲平價委託有興趣。」
平價委託？
乜今次個委託好Cheap㗎咋咩？
係喎...頭先都唔記得睇有幾多報酬添...
「平價又好～貴價又好～咁啱見到合眼緣咪接囉～」羅羅向綽姿打咗個眼色～
「係咩...」綽姿雙眼一紅，「你最好唔係嚟搞亂。」
同時羅羅對眼都紅一紅：「乜你咁講我㗎？大家都係為咗報酬姐～」
佢哋兩個對眼都紅一紅...即係話要精神液？
要用精神液...要用精神液！
唔好俾佢哋覺得我慢幾拍！
咪住先...我身上好似...係一支Level 1嘅精神液都冇㗎喎！
『呃...唔好意思...我冇...精神液囉...』其實我都唔想打擾綽姿同羅羅嘅對望...
之但係我真係冇精神液喺身囉...
綽姿喺褸袋拎咗支精神液出嚟，遞俾我。
『唔...唔該...』我接過綽姿手上支...Level 1精神液...
「唔使唔該。」綽姿又冷冷放下一句，「我會喺你嘅報酬扣返。」
『吓...又扣吖？』喂咁扣法唔係辦法喎...
今次又分得幾多吖？又係1 Sil吖？
次次都分得嗰1 Sil真係冇肉食㗎喇喎...
「你估支Level 1精神液平㗎？」綽姿冷眼望住我，「快啲用，唔好嘥時間。」
好啦好啦～我都唔嘥時間喇～
我用力一捏手中嘅Level 1精神液，立即粉碎！分散成紅色嘅粒子！
無數發住紅光嘅紅色粒子就喺我左手手掌中飄出！飄到去手背！
手背上出現一個倒轉咗嘅五角星！發出紅光！
寒意由手背傳遍手掌…傳到手臂…全身！
當道寒意游到上頭之時…
「救命呀！」又...又係女仔聲？
「有冇人呀？放我出去呀！」我又聽到有幾把女仔聲…
「我唔想死吖...我唔想死喺呢度吖...」我又聽到另一把女仔聲喇！
點解每次...每次都...
「喂喂～做咩呆晒咁吖？」呢把係羅羅嘅嬌俏聲～
「佢每次都係咁。」呢把係綽姿把冷淡聲。
『你哋...冇...冇...』我擰擰頭。
本來打算問“你哋有冇聽到有女仔叫救命”...不過我諗只係得我自己一個有幻聽...就無謂講出嚟啦～
「係冇嘢喇嘛？」綽姿拉高衫領，長袍連埋毛毛大褸頂帽一齊笠起，「準備...」
我同羅羅都跟住綽姿拉高衫領，長袍連埋毛毛大褸頂帽一齊笠起...
「出發。」
我哋一行三人都扮晒平民咁行返上天橋...
喺人群之中掩飾行者嘅身份...
我同羅羅都跟喺綽姿身邊，向住老蘭方向行。
而家要行返去老蘭？
只見綽姿向住一個企喺電梯旁邊嘅...男人行過去。
個男人著住啡色乾濕褸...帶住頂黑色帽...
再行近啲...睇清楚啲...係一個...鬼佬？
「你就係偉先生？」綽姿行近個鬼佬面前，細細聲講。
「我係。」鬼佬帶住外國口音，「就係你哋喇？」
個鬼佬姓偉？就係我哋今次要護送嘅目標人物？
「係。」綽姿簡單咁答一隻字。
「好。我哋行。」偉先生左望右望就向住老籣方向行。
我同綽姿就一左一右咁跟住偉先生，羅羅就喺我哋身後。
偉先生雙手空空...乜都冇...
我哋今次個委託唔係要護送目標人物同件貨物㗎咩？
人物就有喇...貨物又喺邊呢？
只見我哋一直行...喺人群之中行返嚟老蘭...行到嚟頭先嗰間酒吧。
企喺門前嗰兩個蝻亞仔職員打量住我哋四個...然後幫我哋開門。
望乜撚嘢姐望？係開門就快手啲啦！
入到嚟酒吧，都坐咗唔少客人...直頭係座無虛席。
不過呢間吧都比較靜...係一間傾計嘅清吧。
喺柔和嘅燈光之間，跟住偉先生身後行...行過幾張吧檯...與幾個男男女女嘅客人擦身而過...就嚟到一張...圓形吧檯仔前...
吧檯仔坐咗一個...鬼鬼祟祟咁嘅...香港人？
個鬼鬼祟祟嘅香港人見到我哋行緊埋去佢面前，就好緊張咁攬一攬實放喺吧檯上嘅...黑色手提箱。
呢個香港人...同個手提箱...
偉先生坐喺香港人面前：「你就是鍾？」
講普通話？！
香港人點一點頭，拍拍吧檯上嘅黑色手提箱：「你要的東西...」
又係講普通話？！
咁係香港人定係蝗吖？我真係分唔到吖！！！
香港人又好蝗又好啦～總之呢條友應該係姓鍾！
正當偉先生想拎鍾先生個箱嚟睇之時...
「先給錢！」鍾先生又攬實個黑色手提箱！
「好。」偉先生拎出手提電話撳幾撳...
鍾先生又拎部電話出嚟...
佢哋兩個將自己手上部電話同對方嗰部對望一下...
“嘟叮”交易成功～
真係方便到呢～
偉先生立即拎個黑色手提箱摸一摸...望一望...
我再睇清楚啲...個黑色手提箱好似係...鐵製？
就喺鍾先生企起身，準備走人之時...
我感覺到身後嘅羅羅突然散發出強大且壓迫嘅殺氣！
當我想回頭一望之時，一道紅光一閃！就由我身邊閃過！
我再跟住紅光望返上前...就見到羅羅手持亮出刺眼紅光刀刃嘅精神刀...企喺鍾先生身旁...
然後...鍾先生頸上出現一條痕...頭顱隨即飛到空中…轉咗幾個圈…
“咚！咚…”跌到地上！
“啪！”鍾先生個身都向後一跌...跌喺地上！
「你做咩？」綽姿已經拔出精神刀柄！亮出刺眼嘅紅光刀刃！問咗我心裡嘅問題出嚟！
係...係咯...做...做咩吖？
羅羅做咩要...殺嗰個鍾先生？
羅羅背住我哋，擰轉頭...望住我哋：「執行...委託～」
執行...委託？！
偉先生而家先識得攬住個黑色手提箱，勁驚咁跑到去我身後：「What Happen？佢做乜咩？」
我都想問...
委託有話要殺人咩？
冇吖...我可以好肯定係冇叫我哋殺人吖！
委託淨係叫我哋護送目標人物同貨物去指定地方咋嘛！
「冇錯...我哋呢個係獨佔委託...」綽姿緊握精神刀，「你唔係執行我哋委託...係另一個委託。」
獨佔委託？
唔係執行我哋委託...係另一個委託？
等等先...即係話...我哋個委託...應該淨係得我同綽姿...已經冇其他人可以加入...
而羅羅所執行嘅...係另一個委託？！
「而家先諗到...」羅羅慢慢轉身，向住我哋，「會唔會遲鈍咗啲吖？瓦解～」
「咩...咩事呀？」「咩人嚟㗎？」「死人呀？」「走呀！救命呀！」酒吧裡嘅客人而家先驚覺有唔妥！爭相逃離酒吧！
我哋都冇理到酒吧嘅客人同職員逃離現場，企定定咁互相對峙...
點解會變成咁㗎...
羅羅遞起精神刀，用刺眼嘅紅光刀刃指住綽姿：「交俾我。」
交俾羅羅？係指偉先生手上個黑色手提箱？
羅羅所執行嘅委託...唔止係要殺死鍾先生...仲要得到黑色手提箱？
點會...點會咁㗎？
綽姿企喺我面前，擋住羅羅擺出防禦姿態：「快啲走。」
快...快啲走？
羅羅手中把精神刀所發出嘅紅光刀刃越嚟越光...越嚟越刺眼：「你知你唔係我對手。」
綽姿手中把精神刀所發出嘅紅光刀刃亦都越嚟越光...越嚟越刺眼：「快啲帶目標人物離開...我擋唔得幾耐...自己執生。」
自己執...執生？
綽姿一個忍步就衝向羅羅！
同時我亦都拉住偉先生：『走！』
拉住偉先生一個轉身跑向口門！
“嗡！嗡！吱！！！”我就已經聽到背後傳嚟精神刀嘅格劍聲！
唔好理喇...唔理得咁多喇...我而家要做嘅就係帶偉先生逃跑！
我一直拉住偉先生跑落斜路！
『讓開！讓開！』撥開！推開！撞開路上遇到嘅途人！
護送委託...估唔到今次護送委託所遇到嘅敵人係自己人...仲要係羅羅！
點會咁㗎？
點會有對立嘅委託㗎？
乜真係會有咁矛盾嘅情況發生㗎咩？！
『讓開！讓開呀！』拉住偉先生衝上天橋！途人見我好似隻狂牛咁狂衝向前都紛紛讓開！
執生吖...沿住呢條路帶偉先生去碼頭...應該就啱㗎喇...
「等...等...Hey！Stop...停吖！」偉先生扯晒氣咁！
『Stop乜柒嘢呀？！係唔係想冇命呀？！』屌你老母死鬼佬唔係咁唔知死呀化？！
你都見到嗰個鍾先生上一秒仲生勾勾，下一秒就身首異處㗎啦！
連綽姿都話唔擋得幾耐...我保唔到你㗎！！！
完全冇理偉先生噏乜柒，一直拉住佢狂奔！
一路上都有唔少途人...
「嘩！咩事吖？」
「拍戲呀？」
「喂屌你撞到我呀！」
唔理班途人諗乜...睇乜...我乜都唔理！完全唔理撞到幾多人咁拉住偉先生向碼頭方向拔足狂奔！
『你跑快啲得唔得呀？！讓開呀！！！』我覺得唔夠快...跑得仲未夠快！
「Hey！I...My手快...斷！」偉先生越嚟越冇力跑...
『你跑快啲咪唔斷囉！』再唔跑快啲唔係隻手斷...係條頸斷呀！
真係諗唔明...點解會咁矛盾...
照咁睇...羅羅嘅委託同我哋個委託明顯係對立！
我哋SPIRIT點會同時有對立嘅委託出現㗎？！
跑咗好似都幾耐...先拉住偉先生跑到嚟碼頭！
「嗄...嗄...」偉先生抖晒大氣咁！
『嗄...嗄...到喇...跟住...跟住呢？』我放開偉先生...喺碼頭旁邊行多幾步...睇睇跟住應該點做...
係搭船？定係搭直升機？
但我都未有方向之時...我就見到不遠處...有一...兩個身影...
我再望清楚...見到有一個黑色嘅嬌小身影...手持紅光刀刃...拉住跪喺地上...雙臂已經被斬斷！斷口位置飄出大量紅色粒子嘅身影！
唔...唔係吖化？！
此時嬌小嘅身影散發出強大且壓迫嘅氣息！
係羅羅...羅羅嘅氣息...羅羅已經搞掂綽姿！
羅羅將綽姿拋去我面前！
我立即衝上前！雙手抱實綽姿跪喺地上：『綽姿！綽姿你點吖？』
「嗄...嗄！」綽姿表現得勁痛苦咁！「叫我...叫我瓦解...嗄！」
竟然...竟然咁短時間...就將綽姿對手斬斷...
羅羅呢個人...
“咯...咯...咯...咯...”手持紅光刀刃嘅羅羅就行近我身邊...
“咯...咯...咯...咯...”喺我身邊擦身而過...
我跪喺地上攬住綽姿，背住羅羅講一句：『唔殺人得唔得？』
“咯...”羅羅企一企定：「殺死偉係我嘅委託內容之一。」
“咯...咯...”羅羅向住我嘅身後再行多兩步...
「NO！Don’t kill me！PLEASE！唔好！唔好...」
“嗡！”一聲響...
“咚！咚…啪！”
羅羅拎起埋個黑色手提箱，就行到嚟我身旁：「嚟我度吖～我呢頭都有地方落腳～」
『唔使喇...』我都搞唔清...我哋係敵人...定係伙伴...
「你帶住佢唔方便返去特殊區㗎～」羅羅行前一步，「再加上你都好似就快進入深層睡眠～」
都...係嘅...
羅羅講得啱...要帶住斷咗雙手嘅綽姿返去特殊區真係唔多方便...
就算而家綽姿進入深層睡眠，生返對手出嚟...我都捱唔到返入去特殊區...
「跟我嚟啦～」羅羅繼續向前行。
我都只好抱起綽姿...跟住羅羅身後行。
TO BE CONTINUED