《香港傭兵》: [Day 16－秘密情報] PART 02
我同綽姿都靜靜咁等羅羅繼續講...
「唔...」羅羅諗咗一諗，「喺我見到你哋接咗個委託之後，就去查查有冇對頭委託...」
「係追蹤偷窺...」綽姿冷眼望住羅羅。
「是旦啦～」羅羅笑笑口～伸伸脷～「我睇到有一個對頭委託係要殺一個中國賣家、一個外國買家同搶走佢件貨。」
『鍾先生係中國賣家...偉先生係外國買家...』原來係中外買賣交易...
「嗯～」羅羅點點頭，「代號“鍾”嘅男人就係中國賣家～而代號“偉”嘅就係外國買家～」
『咁佢哋係咩人？』講到好似有啲神秘...
「詳細嘅就唔清楚～」羅羅擰擰頭，「委託內容冇講佢哋係咩人～我都有多手去查查嘅～偉就好似係幫英國政府做嘢嘅～之但係鍾呢...就冇相關資料喇～」
『冇相關資料？』即係點吖？
「係吖～」羅羅點點頭，「我只係喺情報庫隨便查一查～見冇資料就冇深究Luu～」
情報庫冇鍾先生嘅資料...
羅羅打量住綽姿：「咁你呢？你又有冇鍾嘅資料？」
綽姿擰擰頭：「冇。」
羅羅又冷眼打量住綽姿：「你接委託唔查吓先㗎咩？」
綽姿又冷眼打量住羅羅：「有乜好查？個委託嘅報酬已經唔係多...仲要嘥Sil去查？」
羅羅繼續冷眼打量住綽姿：「唔查清楚咪好似而家咁委託失敗囉～」
綽姿怒視住羅羅：「唔係好似有你呢啲鍾意接對頭委託嘅無聊人，會委託失敗咩？」
羅羅鄙視咁眼尾望住綽姿：「鬼叫個報酬吸引咁多～而且明知對手比自己弱～一定完成到委託都唔接咩～我哋係SPIRIT嚟㗎～」
綽姿冇羅羅咁好氣。
『咁...要搶嗰件貨...又係咩嚟？』嗰個...黑色嘅手提箱...
「想知？」羅羅古古惑惑咁打量住我，「打開嚟睇吓囉～」
『得...得㗎咩？』打開...睇...
「得～梗係得啦～」羅羅陰陰嘴笑笑口，打量住綽姿，「有好多情報都係咁得返嚟㗎啦～呵～」
綽姿唔出聲。
好多情報...都係咁得返嚟？
綽姿都好似有...咁做過...
之前喺西鐵搶返嚟嘅公文袋...綽姿都喺兆康西鐵站打開過...睇過裡面張紙...
「好～等我拎佢出嚟先～」羅羅就跳落床～喺張茶几底拎咗個...黑色手提箱出嚟！放上茶几面！
係呢個喇...
呢個黑色手提箱...就係尋晚...偉先生同鍾先生交易嗰個...
「喺打開之前...」羅羅拎起咗部電話，「要做啲事前準備先...」
『事前準備？』有乜要準備？
「嗯...」羅羅拎住部電話撳撳撳撳撳，「我睇個手提箱應該有阻礙電波嘅功能...」
『阻礙電波功能？』咩電波？
綽姿都落床，行到茶几旁邊：「即係話裡面應該有發射同接收裝置。」
『咁即係...有追蹤功能？』我諗呢個推斷算有水準掛？
「嗯～」羅羅點點頭，繼續撳部電話，「似係怕俾人追蹤到，所以先用呢個箱...好～開咗電波干擾系統～」
『吓？』開咗咩話？
羅羅放低部電話，對住個黑色手提箱摩拳擦掌：「我呢間房嘅電波干擾系統已經啟動～就連SPIRIT嘅訊號都入唔到嚟～」
吓？有乜分別？我唔覺而家間房同頭先有乜分別喎...
「嘿嘿嘿...就等我睇吓你有乜秘密喺入面啦...」正當羅羅想伸手去打開黑色手提箱之時...
「你唔怕會有陷阱咩？」綽姿冷冷放下一句。
「係喎～」羅羅好似一言驚醒夢中人咁，「咁你開吖～」
「我問得出就唔會自己開啦。」綽姿冷眼望住我，「你嚟開。」
『我？！』我指住自己個鼻！
喂你當我聾㗎？
我聽到㗎喎！
聽到你咁問得出...我仲會走去開？！
「係你㗎喇。」綽姿點點頭，「你係隨行者吖嘛。」
『我係隨行者又點吖？』就要搵我笨㗎喇？
「係你㗎喇～」羅羅都招魂手咁招我埋去，「放心啦～冇事㗎～」
嘩...真係講大話唔口震㗎喎...
「過嚟啦。」
「快啲啦～」
「係唔係要我請吖？」
「乖啦～快啲過嚟打開佢啦～」
綽姿同羅羅就你一言我一語咁...
『唉嚟喇嚟喇嚟喇！』死就死啦！
我行到埋茶几旁邊...向黑色手提箱伸出雙手...
綽姿同羅羅就立即彈後兩步！
『喂你兩個使唔使咁呀？！』好似推我去死咁！
「你開就開啦！」
屌...仲要叫我開...
唉...冇計啦...鬼叫我做細咩...
我雙手摸住個黑色手提箱...個質感有啲似...鐵...又有啲似...木...
咁熟悉嘅？
好似...成日都有機會掂到...
而個手提箱...冇鎖匙窿又冇密碼...
就咁撳住兩粒黑色掣...就打得開？
咁唔安全...裡面唔係真係有陷阱㗎嘛？
「喂你快手啲得唔得㗎？我哋等緊你㗎...」綽姿同羅羅再退後多兩步...
『知喇知喇！』而家啲大粒嘅淨係識叫啲細去做嘢！
你估我哋做細嘅唔驚死㗎咩？！
唉...好啦好啦...死就死啦！！！
我合埋對眼撳落兩粒黑色掣！
“咔！”一聲！手提箱隨即打開！
冇...冇事...
好似乜事都冇喎...
我再驚驚青青咁睜開左眼...再睜開埋右眼...睇睇個手提箱裡面...
黑色嘅內槓...中間放咗個...黑色嘅...圓球體...
個黑色嘅圓球體...有啲似...水晶球？
係咩嚟㗎？！
羅羅就細細步...細細步咁行到嚟我背後...探頭偷偷望：「係...立體投射器...」
立體...投射器？！
綽姿都行到嚟我身邊，打量住個黑色圓球體：「真係立體投射器...」
『喂唔係吖嘛？就係立體投射器咋？』使唔使搞到咁大鑊呀？呢個年代啲立體投射器好值錢㗎？
「當然就唔係淨係立體投射器啦...」羅羅又拎起部電話睇睇...
當然唔係淨係立體投射器？
咁即係點吖？
羅羅撳兩撳部電話：「一直有訊號發出...」
一直有訊號發出？
綽姿諗一諗：「睇嚟係要連接主機。」
『喂喂...即係點吖？可唔可以講得清楚啲吖？』講到1999咁好難理解㗎嘛...
羅羅點點頭：「即係話我哋面前呢個立體投射器一直都向外發出訊號...除咗係指明位置之外，仲應該要連接主機讀取數據...」
嘩...越講越複雜喎...
綽姿點一點頭：「即係話呢個係遠端連接投射系統。」
嘩...咁專嘅名詞我實聽得明啦～
不過聽唔聽得明都冇所謂啦～最重要都係睇羅羅同綽姿點做姐～
羅羅都打量住個黑色圓球：「喺電波干擾系統範圍裡面，遠端連接投射系統連接唔到主機...冇嘢睇...」
『哦...』咁點吖？
綽姿都打量住個黑色圓球：「唔喺電波干擾系統範圍裡面嘅話...主機嗰邊就會追蹤到我哋嘅位置...」
『哦...』所以呢？
羅羅點點頭：「咁就要...用個Spy App去過一過濾喇～」
『Spy App？』間諜App？
綽姿都點點頭：「嗯...用我哋SPIRIT裡面嘅Spy App的確可以好輕易隱藏定位訊號同時連接對方主機...」
羅羅接住講：「但Spy App都幾貴～而且仲係要以數據數量收費～」
綽姿又點點頭：「唔知個數據量有幾多...唔知值唔值...」
「所以都係由你出啦～」羅羅搭一搭綽姿膊頭～
「點解要我出吖？」綽姿冷眼望住羅羅。
「因為呢個委託係由我一個完成～你哋冇份～」羅羅帶住微笑點點頭～
「關咩事？明明就係你想喺件貨得到情報。」
「你唔想知嘅？」
「想知都唔應該由我出。」
「嘩～想知又唔使付出邊有咁著數㗎？」
「咁大家都唔好知。」
綽姿同羅羅都互不相讓...
『呃...不如由我出啦...』話晒我都係行者...我都有份參與...付出返啲都好合邏輯嘅...
綽姿同羅羅都望住我...望咗一陣...
「唉...」羅羅無奈咁擰擰頭，「知你都唔係多Sil得去邊...都係等我出啦～」
睇嚟...都係羅羅善解人意啲～
「好啦～」羅羅拎起部電話撳撳撳撳撳～
然後過咗唔係好耐...
箱裡面個黑色圓球開始有啲...一點點光...越嚟越光...
越嚟越光...越嚟越多顏色...然後強光一閃！
突然有好多好多嘢由圓球射出！投射到整間房之中！
好多...好多...整個空間...都有好多...好多英文字母...數字飄吓飄吓...
『呢啲...呢啲係...』咩嚟？
充滿整個空間...房間...喺我哋之間...飄浮...飄浮...
綽姿抬頭望住啲英文字母...數字：「係立體計算法...」
『立體計算法？』計陰影面積吖？！
羅羅都橫視四周嘅英文字母...數字：「係一種方程計算方法...近呢幾年發現。由一個天文學家意外咁收集到喺宇宙傳嚟一啲強烈嘅電波...電波裡包含住一堆方程式...但一直都解唔開方程式嘅秘密。於是佢將呢堆方程式公開...有一個數學天才發現通過立體視圖成功解密，並借助方程式製造咗件巨型裝置出嚟。雖然呢件巨型裝置到最後係完全冇用處～之但係...呢個立體計算法成為數學界一大突破...」
『嘩...好深喎...』我連中學嘅數都計唔掂...仲要同天文學有關？！
羅羅擰擰頭：「係好深...我都唔係知好多...」
『你都唔係知好多...咁綽姿呢？』我望望綽姿。
綽姿好似喺堆英文字母同數字之間搵緊嘢咁：「我都唔係好知...只係知...要有連接位...但邊個係連接位？」
『連接位？係點㗎？』我又搵搵...
綽姿都擰擰頭：「我都唔知。」
『喂乜都唔知咁點搵吖？』成堆嘢都奇奇怪怪咁...冇樣嘢識㗎喎...
我而家終於知咩叫書到用時方恨少...
羅羅雙手叉住條小蠻腰，擰擰頭：「太多喇...又太複雜喇...根本就唔知要由邊度入手...」
綽姿點點頭：「冇錯...真係好多又好複雜...究竟係要計啲乜？」
羅羅再細心觀察：「唔...我睇就好似同...物理有關...」
『物理？』喂點睇㗎？
羅羅指住其中一Part：「嗱...呢Part就應該係同物理有關嘅...」
『嘩！咁複雜你都識吖？又話你唔鍾意返學嘅？』我望住一大堆英文字母加數字再加唔知乜嘢鬼畫符咁嘅方程符號！
而家啲中學教呢啲㗎？！
羅羅帶住微笑擰擰頭：「梗係唔係返學學到㗎啦～係我之前有見過類似啲咁嘅嘢囉～」
『吓？』見過就知乜㗎喇？天才喎...
綽姿又細心觀察，指一指另一Part：「但呢Part似係同生物有關...呢Part係唔係化學呢？」
『嘩！咁複雜你又識吖？又係之前見過吖？』唔係又咁天才吖化？！
綽姿點點頭：「嗯。」
我屌係唔撚係㗎？
總係覺得佢哋兩個妹妹仔喺度Hea鳩我咁囉...
羅羅又點點頭：「都似...雖然唔知係計乜...但就咁睇...應該都係同物理...生物仲有化學有關...」
物理...生物仲有化學有關？
咁即係咩吖？Free Cam By吖？
我都跟住綽姿同羅羅睇睇啲方程...
好多都唔識...全部都唔識...
而喺陌生嘅方程當中...終於俾我發現一啲熟識嘅文字！
呢五隻字係...
『魂導兵計劃？！』