《香港傭兵》: [Day 19－神秘工廠] PART 08
“吱...”日倫揸返架車遠離神秘工廠...
出返去工業區較外嘅範圍...
“依...”然後將架車隨便咁泊喺路邊。
落咗車之後，我哋都行返上行人路。
『共享車呢樣嘢真係方便～隨便咁泊喺路邊都冇人理～』我就跟住喺日倫身邊行。
「話晒都係國企公司吖～」日倫雙手插住褸袋咁行。
『唔怪得係用殘體字啦～』我都估到㗎喇～
「係吖～好多國企都落嚟香港洗黑錢㗎啦...唔係新聞嚟㗎喇喎～」日倫疑惑咁打量住我。
『我...都知～嚟啲嘢一般市民都知㗎啦～』唔好話廿年後嘅呢度，我嗰個年代已經係咁㗎啦～
投資嘅又好～基建發展嘅公司就更誇張～
「哈～」日倫冷冷一笑～「係啲人唔去正視姐～你永遠冇辦法叫醒扮瞓嘅人～」
『啱吖啱吖～』Sad But True～
「咁咪幾好～」日倫點一點頭～
『吓？』有乜咁好？
「唔係佢哋一直都扮瞓，又點可以令到暴政咁穩固？我哋邊會有咁多機會...」日倫帶住微笑打量住我...
機...機會...
「你真係唔似一個行者...」日倫帶住微笑擰擰頭...
『我...我知我係廢柴...』就連日倫都覺得我唔稱職...
啱嘅啱嘅...日倫係調查型行者...係人係鬼一眼就睇得出啦...
「我唔係咁嘅意思～」日倫又帶住微笑擰擰頭，諗一諗...
『吓？』講到咁明都話唔係咁嘅意思？
「總之就...唔係啦～」日倫繼續帶住微笑擰擰頭～
知喇知喇...明喇明喇...我都有自知之明嘅...唔使唔好意思㗎喎...
繼續跟住日倫身邊行，行上天橋...
然後又喺長長嘅天橋上行...行去一個商場...又行上連接商場嘅天橋...
留意天橋上嘅途人...都係啲大大隻隻嘅工人...
有唔少都係挨喺欄邊食緊煙...吹緊水...
又有啲鋼條身材嘅女工人～個個都波挺腰幼咁...點練㗎？
天橋之下都有唔少大大小小嘅貨車駛過...
而家已經係下午...好繁忙咁...
睇嚟呢個工業區真係會成功...
好成功咁...掩護神秘工廠...
再跟住日倫橫過天橋，入到嚟一間...茶記...
入到嚟茶記一望...雖然話坐唔滿，但都坐咗唔少人。
而喺我入嚟嘅時候，冇睇到係咩名堂...但就咁睇裡面燈火通明...裝修同擺設都光鮮新穎，似係...連鎖餐廳...
日倫就隨便咁揀咗個路邊二人卡位坐，拎部電話出嚟：「想食啲咩？」
『呃...』我都坐喺日倫面前，『冇乜所謂...』
老老柒柒我都真係唔多覺餓...
「咁就餐腸麵啱唔啱？」日倫拎住部電話撳撳撳。
『啱...啱...』餐腸麵好吖～方便又唔算太飽～
「轉出前一丁？」日倫邊撳電話邊問。
『好好...』出前一丁好吖～如果真係出前一丁嘅話～
「凍檸茶？」日倫再撳多兩撳。
『OK吖～』夠穩陣吖～
「好...」日倫撳多兩撳部電話，「搞掂～」
『哦...哦...你...都幾易肚餓㗎喎...』我打量住日倫...
調查型嘅行者都係易餓啲㗎咩？
同綽姿一齊嘅時候，都唔覺佢成日要食嘢。
「唔係～」日倫望四周一眼，「餐廳易於隱藏...又可以收集情報姐～」
易於隱藏？收集情報？
原來醉翁之意不在酒...
「大型嘅連鎖餐廳都進駐...」日倫諗一諗，點點頭，「睇嚟呢區真係穩得住...」
『嗯...但總係覺得...怪怪地...』怪...怪係...邊呢？
只係覺得怪...但又噏唔出...
「特殊區暴風雨前夕...有跡象顯示解放軍會接手深井...對呢區嚟講理應會更危險...係唔係？」日倫打量住我。
『嗯...係吖係吖...』應該就係咁...仲有嘅係...『假如佢哋唔知就唔會咁夠膽喺度開舖...知度就更加想睇定啲先...』
「啱吖～不過有一點更有可能嘅係...」日倫諗咗一諗，「佢哋好有信心...」
『佢哋？』係指...
「政府。」日倫點一點頭。
係政府...好有信心？
「就咁睇...」日倫又諗咗一諗，「政府對嚟緊嘅局勢...好有信心可以好好控制...喺掌握之中...所以就氹到啲大企入嚟工業廠發展。」
『真係咁有把握？』政府喎...憑咩吖？就單憑解放軍？
老解大撚晒咩真係～
「照而家手上嘅情報...」日倫又諗咗一諗，「就係囉～」
照而家手上嘅情報？
我又唔係好見得咋喎...
「好啦～呢樣都唔急...」日倫又諗一諗，「而家要做嘅...係計劃下一步...」
『哦...』計劃下一步...咩下一步吖？
「頭先都掃過啦？」日倫撳撳部電話，「神秘工廠附近...」
『嗯嗯...』原來係指神秘工廠～
「我之前都有喺呢區調查過...掃過唔少地方...」日倫又撳撳撳部電話，「我Send埋俾你。」
『哦...好吖...』日倫已經調查過...
「你咪話之前入過去掃嘅？」日倫問一問我。
『係吖係吖...』之前我同綽姿都俾羅羅呃咗，同佢一齊入去交委託嗰次吖嘛～
「你連埋嗰次同有掃過嘅都Send埋俾我...我哋將所有掃過嘅資料都合埋一齊。」日倫又撳撳部電話。
『哦哦...點合埋一齊？』
「你揀晒啲資料先～」
『哦...好好...等等...』我就搵返...搵返我上次喺神秘工廠入面掃過嘅...神秘工廠附近嘅...仲有頭先嘅...
揀好晒之後：『OK喇...跟住呢？』
「跟住就等等我...」日倫就再撳撳部電話...
然後我個Mon就顯示出“合併資料”嘅提示方塊...
『撳確定？』
「嗯。」
當我一撳“確定”之後...畫面立即出現一幅完整地圖！
呢幅完整地圖...中心點...顯示住...神秘工廠！
「凍撚死～凍撚查～」一個肥佬侍應放低兩杯嘢飲。
我就啜住杯凍檸茶...睇睇幅地圖...
全幅地圖...工業區嘅地圖...圍繞住神秘工廠做中心...
好仔細...每一棟工業大廈...每一條馬路...街口...
唔止咁樣...仲有紅色一點點...喺各工業大廈出入口...牆身嘅圓點...係CCTV！
已經Mark好晒...仲顯示埋CCTV嘅錄影範圍！
而被CCTV錄影住嘅馬路都有染上黃色...係銀色巨型貨車嘅路線！
再睇清楚啲幅地圖...左碌右碌上碌下碌亂碌幾下...有唔少三角...四方...交叉等嘅符號...
係代表啲咩㗎呢？
而全幅地圖，就只有神秘工廠裡面冇Mark到嘢...
「唔錯...唔錯...」日倫啜兩啖杯凍檸水，眼定定咁望實部電話，點點頭。
『好詳細吖...真係好詳細吖...』合併完之後...竟然可以咁詳細...
日倫真係做足功課呢！
「好啦...就等我再整理...同埋計劃路線...」日倫就撳撳部電話。
『計劃路線？』雖然我覺得幅地圖都已經好詳盡...唔知仲有乜好整理...不過我更好奇嘅係計劃咩路線呢？
「嗯...」日倫諗一諗，「我哋今晚潛入去調查嘅路線...」
『今晚潛入去？』真係要入去調查呀？！
「嗯...」日倫點點頭，「唔入去查唔到啲乜...你放心啦～我計劃嘅路線一定好穩陣～」
『嗯嗯...』我又唔係話唔放心你計劃嘅路線...之但係，『得我哋兩個咋？』
得我同日倫兩個人都唔係問題...最大問題係綽姿！
咁我係綽姿嘅隨行者嚟㗎嘛...要聽佢點㗎嘛...點可以自把自為㗎呢？（我幾時咁聽綽姿話？）
「放心喎...」日倫打量我一眼之後，「一定預埋綽姿～」
『吓？』預埋綽姿？
「嗯。」日倫繼續撳電話。
預埋綽姿...佢就肯㗎喇咩？
你哋都唔係唔知綽姿啲性格㗎啦...預埋佢佢就會嚟咩？
「兩碗餐腸麵～」個肥佬侍應放低兩碗麵就行咗去。
日倫就一邊食麵，一邊撳撳部電話：「食嘢先啦～冇咁快嘅。」
『哦哦...』我就睇一睇部電話...幅地圖...好快就多咗幾個符號...又畫緊幾條線咁...
係同步？
日倫一邊畫...我呢邊都同時收到...
咁又真係幾方便～
有日倫計劃，我都唔使理咁多～可以安心食麵～
仲有嘅係...
「喂...你有冇諗住轉工吖？」
聽聽四周啲客人講乜...
「諗就真係有諗過嘅...話晒嗰邊都係大公司...」
一邊食...一邊偷聽...
「係吖係吖...人工高少少...最重要都係穩陣吖嘛...」
「啱吖...而家都有唔少大公司入嚟開檔啦...又要人...我哋真係可以諗諗喎...大佬...你點睇吖？」
「咁我都想班兄弟好景啲嘅...咁啦！等我打聽一下先啦！」
睇嚟真係...
唔止連鎖餐廳...連大公司都入嚟呢個工業區發展...
「喂你有冇聽過政府俾咗好多著數啲大公司吖？」
「有吖...梗係有聽到啦...鼓勵佢哋入嚟吖嘛...」
「屌真係好唔公平囉...我哋當初入嚟搞生意都係靠自己！幾咁大風險！政府有幫過我哋咩？！」
「唉...咁都冇計㗎...唔好以為係頭啖湯...根本就係開荒牛...」
「咪係囉！開完荒又益晒班大企！」
「唉算啦...政府氹到大企肯入嚟...即係穩陣啦...穩陣就好啦...」
「咁又係...穩陣最重要...班亂黨都搞到香港亂咗咁耐啦...俾我哋穩穩陣陣做生意啦...」
原來係政府俾咗好多著數啲大公司...
屌咁咪又係官商勾結！
啱吖啱吖...香港支共政府除咗官商勾結仲識做乜春吖？
政府就唔多講啦...香港都仲係咁多港豬為禍！
乜撚嘢亂黨？乜撚嘢搞到香港亂咗咁耐？乜撚嘢穩穩陣陣做生意？
你哋班仆街究竟有冇搞清楚邊個先係始作俑者㗎？
係支共呀！
淨係識得搵錢！有冇諗過民生㗎？有冇諗過香港可以安定繁榮咁多年，唔係因為支共嘅霸權式統治...
係民主同自由呀！
冇咗民主同自由，你再搵幾多錢都只會俾支共一刀割！
不過唔係...啲仆街只係想喺香港有咁盡就搵咁盡...然後攬住啲錢逃走！
屌！賣港求榮！
香港人幾時先會覺醒？
唉...過多一百年...香港都只會係一個地獄...
唔係唔係...係衰撚過十八層地獄...
繼續邊食邊竊聽...雖然間餐廳坐唔滿...但都坐咗唔少工人...仲有老闆...
喺佢哋嘅口中都係聽到話呢區開始平穩...有更好嘅轉變...有更多發展嘅空間...
大至上都係局勢靠穩...
之但係...就係聽唔到個原因...
就算我而家聽到咁多...有關局勢靠穩嘅聲音...但都係聽唔到來源...
有乜嘢驅使呢區局勢靠穩？真正嘅原因呢？
佢哋都唔知解放軍將會接手深井...如果知道...又會點諗？
對我而言...始終唔覺得係一件好事...
我始終覺得...俾解放軍接手...會更加危險...
或者喺呢個年代嘅人...早就忘記六四...但我未忘...
假如你覺得警察守住唔穩陣...怕革命軍會由特殊區攻出嚟...讓解放軍守住就好嘅話...
我唔覺得解放軍會係守囉...
出面嘅人唔知道特殊區係咩情況...但我知道...
西貢獻命就唔好講...之但係...天門...
假如俾解放軍入到屯門...瓦解西貢獻命嘅勢力...直接包圍天門所控制嘅元朗及天水圍...
天門有逆行者幫拖...迫狗跳牆反攻出嚟...唔好話要攻陷屯門...深井...直攻出嚟荃灣建立防線...同青衣嘅解放軍基地對峙都仲得！
唔係喇...講多兩講又真係...有啲奇怪...
西貢獻命...同解放軍...