《香港傭兵》: [Day 20－遺址禁區] PART 05
四個黑色身影...一直向住我哋身處嘅十字路口之中...行近...
越行越近...越近就越清楚見到...四個都係著住黑色大褸...雙手插褸袋...
而喺我哋面前...一步一步...行緊埋嚟嘅...髮長到肩...斜陰...睇起上嚟廿歲左右...皮膚白滑...嬌小...瘦底靚女...好熟口面...
四人再行近啲...再睇清楚啲...
呢個女仔...咪就上兩個禮拜左右...坐林雪架紅Van出嚟嗰時...唔小心頂到個波嗰個靚女？！
靚女行到嚟我哋面前：「乜咁啱吖？日倫～」
同時！其餘嗰三個男人各企喺我哋左右後方！
識得嗌日倫個名...識㗎？
但呢種形勢...咁似包圍住我哋嘅？
日倫帶住微笑：「係咯～又會咁啱喺度撞到嘅～我哋真係有緣喇～」
睇嚟唔單止識...仲好似好熟咁喎...
靚女帶住微笑打量住日倫：「係咩？好有緣咩？同我有緣嘅人...都冇乜好結果㗎喎～嚟呢邊做咩吖？」
同個靚女有緣都冇乜好結果...黑寡婦嚟㗎？
日倫帶住微笑擰擰頭：「冇～嚟呢邊睇睇有冇情報收集咋嘛～你知啦～好似我呢啲調查型嘅，靠買賣情報為生㗎嘛～」
日倫講得出...“好似我呢啲調查型”...即係話...眼前呢個靚女...都係行者？！
估唔到...喺紅Van上頂到個波嘅靚女...都係行者嚟㗎！
唔止...唔止...身邊另外嗰三個包圍住我哋嘅男人...都係行者...
我哋SPIRIT嘅行者真係無處不在！
靚女又帶住微笑打量日倫一眼：「哦～係吖？我都知你哋呢啲調查型嘅好八卦...做咩吖？想調查西貢遺址吖？」
嘩屌！咁都俾你估得到？
不過既然佢講得出“你哋呢啲調查型”...即係話靚女唔係調查型行者啦...
係執行型嘅？
日倫繼續帶住微笑擰擰頭：「點會吖～西貢遺址係禁查區嚟㗎嘛～我又點會咁大膽走去查吖？」
嘩...日倫講大話真係唔會眨眼㗎喎...
靚女繼續帶住微笑打量日倫：「點會冇咁大膽吖？調查型行者吖嘛...就係特別八卦...越係唔俾你哋查...你哋就越係好奇...越係要查個明白...」
嘩嘩嘩嘩嘩...睇嚟個靚女睇人好準咁喎...
定係特別了解調查型行者？特別了解日倫？
嘩...佢哋兩個係咩關係吖？我都好八卦～好好奇喎～
「邊係呢～邊係呢～」日倫帶住微笑擰擰頭，又打量住靚女，「咁你呢？都同我一樣嚟搜集情報？定係嚟守住西貢遺址吖？」
守住...西貢？
靚女望望左右，再打量住日倫：「我要向你匯報㗎？」
日倫揮晒手：「邊敢話匯報咁嚴重吖？只係喺度諗...又駛唔駛搵到好似可愛你呢種大人物，迫我哋行嚟呢度姐～」
等等先...等等先...先唔好深究咩迫唔迫...可愛？！
可愛...係眼前呢個靚女嘅稱號...
而呢個稱號...咪就係喺科學園...地下研究所...滅絕異常生命體嘅時候遇到嗰個...先行者？！
「又唔好話迫～」可愛行前一步，「唔係你哋身有屎...又點會想避我哋...避到過嚟吖？」
同時！身邊另外嗰三個包圍住我哋嘅男人都向住我哋行近一步...
佢哋四個步步迫近...越迫越近...
做...做咩吖？想...想點吖？
佢哋四個越迫越近...近到差唔到貼到埋我哋身邊...面前...
可愛停咗腳步...企定定...然後拎咗部...電話出嚟望一眼，再放到耳邊：「喂？嗯...係...了解。」
又...又係咩情況？
「睇路吖。」可愛一邊轉身，一邊袋返好部電話行。
另外三個男人都跟住可愛身後...離開...
我同日倫就望住四個身影...越行越遠...轉個彎...消失喺我哋嘅視線之後...
「呼...」日倫抖咗啖大氣，「連呢邊都有行者...」
『連...連呢邊...』係指將軍澳呢邊？
「本來諗住馬鞍山嗰邊有唔少行者...所以先打算過嚟呢邊入手...」日倫諗一諗，「估唔到呢邊都有...仲要係四個先行者...」
原來除咗可愛...嗰三個男人都係先行者...
『呃...你哋好似...好熟咁嘅？』我又有啲好奇喇...
「哦～我哋呢啲賣買情報嘅，因為各種原因，好多時都唔會放上情報庫賣...好多時都會約出嚟面對面交易～所以都見過唔少行者～認得唔少行者～相對地，佢哋都一樣～」日倫又諗一諗，「好似我同綽姿咁～好似我同你咁咋嘛～」
『哦...』原來係咁...
「之但係...而家呢種情況...總係勾起當時內鬥嘅感覺...」日倫皺一皺眉...
『內...鬥？』無啦啦內咩鬥？
「嗯...」日倫皺住眉咁點點頭，「係好耐之前嘅事...係...發生喺十一預行者失蹤期間嘅事...」
『十一預行者失蹤？』我好似...喺邊度聽過呢？
好似係...喺情報庫裡面見過...有咁嘅Topic...
「十一預行者失蹤期間，發生咗一段短時間嘅內鬥...雖然話係短時間，但傷亡都幾嚴重...」日倫開始向前行。
「點解會有傷亡㗎？」我又跟住日倫身邊行。
「話明內鬥，就梗係有傷亡...」日倫諗一諗，擰擰頭，「之但係我都真係唔清楚～好多都係聽返嚟～因為嗰陣時...我都冇參與其中...應該話我係避得就避...避開唔捲入內鬥嘅漩渦之中...」
『哦...』雖然都唔係聽得好明...總之就係...唔係好嘢嚟...避之則吉啦～
跟住日倫行出十字路...
『唔知西貢嗰邊會唔會都有行者呢？』我左望右望，望望街上，已經唔見可愛同嗰三個男人嘅蹤影...
「我都唔知...所以今次先要過去睇睇...」日倫邊諗邊行，「如果有就真係麻煩...」
『嗯...唔知可愛佢哋係唔係真係守嗰邊呢...』我都跟住日倫身邊行。
「頭先想探佢哋口風...」日倫又諗一諗，「可惜乜都探唔到...」
『如果佢哋真係守喺裡面...真係好煩麻...』話晒都係先行者...
做得先行者，一定好有料...
以我咁嘅料子，唔好話要查...潛入去都相當困難...
唔單止係我啦...我諗淨係日倫一個，都好難避得開先行者嘅耳目...
仲有仲有...先行者...又要惹上先行者嘅話...綽姿實扭甩我個頭...
「所以而家首先去咗拎工具先...」日倫偷偷留意住四周咁行。
『拎工具？』喺邊度拎？又拎乜工具？
「嗯...」日倫點點頭，保持一般步速行，「我喺呢頭有落腳點...上咗去拎先...唔係好遠㗎咋～跟我嚟～」
『哦...好好...』呢度都有落腳點？
跟住日倫身邊行，行咗一大段路。
一路上，日倫都有偷偷留意住四周。
而我都唔敢太張揚...
寧願留意唔到其他人有冇古怪，都唔好俾其他人留意到自己有古怪吖嘛...
再行多一段路，轉多幾個彎，然後就嚟到...
『日出康城？』日倫嘅落腳點...
日倫就帶我搭𨋢上樓...一個都幾高嘅樓層...解開電子門鎖...入去一個單位入面...
眼見呢個單位...冇乜裝修...亦冇乜佈置...只有日常要用嘅嘢...
『估唔到你喺呢度會有落腳點...』我喺個廳轉咗一圈，行近窗台望一望。
日出康城...係唔係真係望到日出？
日倫就打開個櫃：「喺唔同地方都有落腳點...方便放裝備道具又好...深層睡眠又好...」
『都係嘅...』深層睡眠真係好麻煩...
有時鐘太空艙就話姐...冇嘅話都唔知點算...
唔喺一個安全地方失去知覺...太危險...
日倫喺個櫃入面拎住盒...黑色箱...放喺檯上...
『係...咩嚟㗎？』我又八八卦卦咁望望個黑色箱...
唔算話好大盒...睇起上嚟又唔係好重...
「Drone。」日倫打開個黑色箱。
『係...航拍機吖？』我又八八卦卦望望個黑色箱裡面...
第一時間望到嘅係有幾副眼鏡！然後就有一塊...好細塊...黑色長方塊...
「正確嚟講係微型無人偵測機。」日倫拎完兩副眼鏡望一望之後，又拎塊黑色長方塊喺手...
『呢塊就係無人偵測機喇？』我指住塊黑色長方塊！
冇翼冇引擎...搵支螺旋槳睇睇都冇喎...點飛吖？
只見日倫拎部電話出嚟撳兩撳...
“吱！”黑色長方塊立即好似Transformer咁變形！伸咗四支螺旋槳出嚟！
日倫再喺部電話撳多兩撳...
四支螺旋槳同時轉動！“無人偵測機”隨即喺日倫手上升起！
唔止唔止...唔止升起咁簡單...仲慢慢消失...漸漸消失！
『唔見咗呀！』唔單止螺旋槳轉動時冇聲...仲要隱埋形！
真係無聲無息...
「冇錯...」日倫點點頭，「有隱匿功能嘅無人偵測機～用上SPIRIT嘅物質製造～一般嘅偵測系統都偵測唔到佢嘅存在～」
『咁唔一般呢？』我碌大對眼望住日倫！
「唔一般先算啦～」日倫帶住微笑擰擰頭～
咁...咁即係？
日倫再撳多兩撳部電話...
微型無人偵測機漸漸現返形！同時降落返喺日倫掌上！
“吱！”四支螺旋槳同時收返埋！好似Transformer咁變返塊黑色長方塊！
日倫放返好部微型無人偵測喺黑色箱裡，拎喺手：「好！行得！」
『就...就喺拎部Drone夠㗎喇？』唔使拎其他嘢？
日倫帶住微笑點點頭：「夠㗎喇～綽綽有餘～」
『哦...』日倫話夠就夠啦...
身經百戰嗰個係佢，唔係我吖嘛～
同日倫落返樓之後，佢又拎部電話出嚟睇睇...
『而家我哋...過去西貢嗰邊？』我都一面疑惑咁望住日倫手上盒黑色箱...
「嗯...喺呢邊過去都有啲遠...所以都係搵架共享車先...」日倫望住部電話，「嗰邊有架～」
『哦...好好...』我就跟住日倫身邊行。
沿住條馬路一直行...再轉個彎，就見到有架黑色私家車泊喺路邊！
我同日倫都好快手咁上車！扣好安全帶！
日倫一撳個“Engine Start”！
“吱！”又係Work㗎喎！
老老柒柒我真係有一剎那希望架車唔Work嘅...
唔想搞到好似日倫真係行運超人咁...我就永丸一洋黑咁吖嘛...
“吱～”日倫駕駛住黑色私家車，好順暢咁喺馬路上行駛。
一路上車輛唔算太多。
都係啲巴士小巴的士仲有幾架私家車...
交通唔算繁忙，而且仲越嚟越少...
越係向住西貢駛進，路面上嘅車輛就越嚟越少...
少到淨返...銀色嘅巨型貨車...
“吱～”又有一隊銀色巨型貨車喺對面線駛過...
啱啱先有一隊同我哋擦身而過...駛向西貢方向...而家又有一隊由西貢駛出...
真係有咁多SPIRIT嘅物質，俾佢哋運咩？
而當我哋越接近西貢...我就...越係唔舒服...
總係頭暈暈...呼吸困難...心口頂住頂住咁...
搞咩呢？搭車搭得太耐...太遠路程...舟車勞頓頂唔順？