《香港傭兵》: [Day 22－現在未來] PART 01
喺壯闊嘅銀河之下，我坐喺廣闊嘅草原上，望住你嘅背影。
微風輕輕吹送，你總愛仰望一望無際嘅星空...
從你眼中，我冇辦法見到你要望去邊，你望緊去邊...
只係知道，你從來都唔在意草地上任何一件事物...
你就好似唔屬於呢個世界...呢個空間...
我好了解...好清楚...好明白你唔係屬於地面，亦唔屬於天空...
你係屬於宇宙...
“颼”微風將你黑色嘅長裙輕輕吹起，你回頭一望，對住坐喺草地上嘅我莞爾一笑...口中好似念念細說：「我們總會再次相見...」
剎那間，壯麗嘅銀河變成灰色...廣闊嘅草原亦變成灰色...整個空間都變成灰色...分裂...
分裂到阿月嘅背影當中...莞爾一笑之中...粉碎...飄散...
當我再次有意識之時...再次睜開眼之時...
『阿...月...阿月...阿月！』我一彈就彈咗起身！坐咗喺...床上？
然後喺我都仲未回過神之時...就有一個...身影飛撲埋嚟！
「飛揚哥哥！」係...羅羅把聲...羅羅飛撲埋我身上！撳返我落床！
『點...點會...』我攬一攬住羅羅...望一望上...粉紅色嘅...天花板...
呢度...呢度係...
「太好喇！太好喇！」羅羅攬得我好實！
呢度係...未來...
「你終於都醒喇！」羅羅攬到我實一實...瞓喺床上...
『我又...我又返咗嚟...』
「我好擔心你吖！」羅羅成個身都壓晒落嚟...
『點解...點解我又返咗嚟未來㗎！』我握實拳頭！一拳揼落床！
羅羅眼定定咁望實我...
『點解呀？點解我又返咗嚟未來㗎？！點解呀！點解呀！點解呀！點解呀！！！』我不停咁一拳一拳...一拳又拳咁揼落床！
點解...我明明...明明仲同阿月...
「你唔係乜嘢返唔返咗嚟...你只係深層睡眠...」呢把係...日倫把聲！
我推一推起羅羅...坐返起身！就望到著住緊身衫褲嘅日倫企喺床尾！
唔止日倫...仲有綽姿！同樣著住緊身衫褲嘅綽姿都坐喺凳上打量住我！
『你哋...你哋都喺度...我真係返咗嚟...我真係返咗嚟呀！點解呀？！』我再揼多張床兩拳！
點解要我返嚟...我明明可以同阿月...再同阿月...
綽姿冷冷淡淡：「你究竟發乜噏瘋？一深層睡眠完就語無倫次...」
『我冇發乜噏瘋！我明明就已經返咗去過去！我返翻去過去㗎喇！點解我又會返翻嚟地獄㗎？！』可惡吖...可惡呀！！！
「你根本就冇返翻去過去...」日倫諗咗一諗，「你只係進入深層睡眠...一日...」
『一...日？』咩...咩一日？
「嗯嗯...你已經深層睡眠足足一日！」羅羅再攬實我！「而家醒返實在太好喇！」
『我...我深層睡眠咗足足...一日？冇可能...冇可能係咁...』冇可能...冇可能...我唔係深層睡眠...明明我就係返翻去過去...屬於我嘅時空...有阿月相伴嘅時空...
日倫打量住我：「呢個係事實...你一直都瞓喺度...足足瞓咗一日有多...」
就連坐喺凳上嘅綽姿都點點頭。
『足足一日...一日有多...冇可能...冇可能...呢度...呢度係...』我橫視四周...
全間房唔係好大...但好整齊...好女仔...
全間房唔係粉紅色...就係以粉色為主嘅色調...
呢度...呢間房...呢間充滿女仔Feel嘅房間...
羅羅隻手仔摸摸我面頰：「呢度係我喺旺角嘅屋企吖...你真係喺呢張床深層睡眠足足一日有多...我哋三個都一直喺你身邊睇住你㗎！我仲好擔心你唔知仲會深層睡眠幾耐...而家醒返實在太好喇！」
羅羅再攬到我實一實！
『點會...點會...』點會咁㗎...
我明明就...明明就返翻去過去...搵返阿月...同阿月過返正常嘅生活...
點解會...點解又會...
日倫一直打量住我：「因為搞到好大鑊...我哋不得不有咁遠走咁遠...」
搞...搞到好大鑊？
咩...咩事咁大鑊？
「嗯嗯～」羅羅點點頭，「我一收到日倫通知，就接咗你哋過嚟呢邊先喇！」
『等等先...你收到日倫通知？』即係點吖？
中間好似...Miss咗好多嘢咁嘅？
「嗯嗯～」羅羅又點點頭，「我同日倫都有啲交情嘅～」
『有啲交情？』我打量住羅羅...再打量住日倫...
日倫諗一諗，立即解釋：「哦哦...我一直都同羅羅有生意來往...我有賣開情報俾佢...佢都有搵我幫手查啲嘢...總之就係我哋都識咗一段時間...」
羅羅又點點頭：「係吖係吖～一直以嚟好多情報都係喺日倫手上買返嚟～我哋都識咗好耐～前晚一聽到日倫講你哋出咗事，我就立即嚟接你哋喇！最主要都係因為你咋！」
羅羅又攬到我實一實...
『哦哦...』原來...原來羅羅都有搵開日倫買情報...
睇嚟日倫嘅人面都...好廣...
不過而家唔係探究日倫人面有幾廣嘅時候...
我仲係...唔明...
『究竟...出咗咩事？』講咗咁耐...究竟係出咗咩事呢？
點解佢哋會話我係深層睡眠...
仲要足足一日有多...
究竟當中發生咗咩事？
我又Miss咗啲乜嘢？
「好喇...」日倫行近我身邊，「而家人就醒咗...可以開始...問清楚...你究竟係咩人？」
『我...』我究竟係...咩人？！
日倫打量住我...
坐喺凳上嘅綽姿冷眼望住我...
就連攬住我嘅羅羅都眼甘甘咁望實我...等我回答...
『咩...咩人？』我都仲係唔明日倫咩意思...
日倫眼定定咁望實我：「係點樣做到？」
『咩...咩點樣做到？』我...我有做過啲乜？
日倫仲係目不轉睛咁望實我：「前晚...」
『前...前晚？』前晚...做過啲乜？
講起前...晚...
日倫疑惑咁打量住我：「你...唔記得？」
『我...我記得前晚...我...我哋三個...一齊潛入西貢囉...』我係記得...我、綽姿同日倫夜晚一齊潛入西貢遺址...
「嗯...」日倫點點頭，「跟住呢？」
『跟...跟住...』我望一望綽姿同羅羅...
佢哋兩個都望實我...又等緊我包膠...
『我哋三個精神化之後就開始潛入...』
「跟住？」
『跟住...我哋沿路避開駐守喺嗰邊嘅解放軍...一直潛入...』
「跟住？」
『跟住...沿路都冇俾解放軍發現...期間都感應唔到有行者嘅存在...我哋三個總算順利入到去西貢遺址...』
「跟住？」
『跟住...跟住...』跟住點呢？
「跟住？」
『跟住...跟...住...』我好似...好似...
「跟住？」
『跟...住...我哋喺哨塔上面...跟住...跟...跟...住！』我雙手撳住個頭！
跟住...跟住係...點解好似...記唔起...
我只係記得...我哋三個...進入入口...跳上一個冇人看守嘅哨塔上...留心觀察...
四周有唔少哨塔...又有唔少射燈射住...四周架設咗唔少吊橋...有唔少帳篷圍住空地...係附上精神能量嘅光學迷彩...
然後...然後呢...
『然後...然後...我返翻去過去！喺巴士上面...』阿月叫醒我...一睜大眼...就見到阿月...
日倫諗一諗：「係冇咗記憶？」
『冇...冇咩記憶？』喺我返翻去過去之前...發生過咩事？
日倫望一望綽姿...
羅羅又跟住日倫望一望綽姿...
綽姿又冇俾啲咩反應...
日倫就繼續講：「喺綽姿拔刀飛落下面條吊橋...將吊橋上兩個解放軍士兵分屍之後...」
『兩個解放軍士兵分屍之後？』有...有啲咁嘅事咩？
「綽姿再跳到落地面...」
『綽姿再跳到落地面...』
「綽姿將在場所有解放軍同研究人員分屍...」
『綽姿將在場所有...』解放軍同研究人員分屍...
「就喺綽姿想衝入帳篷之時，我捉實綽姿隻手...」
日倫捉實綽姿隻手...
「呢個時候...你就跳到落我哋面前...望一望身後...」
我...跳到落佢哋面前...望一望...身後...
「你向住附上精神能量嘅光學迷彩行過去...」
我...向住附上精神能量嘅光學迷彩行...
「在場嘅研究人員都大叫住咁逃跑...」
在場嘅研究人員...大叫...逃跑...
「你伸手入光學迷彩之間...行入光學迷彩之中...」
我行入...光學迷彩...
「當你穿過光學迷彩之後...冇幾耐...你大嗌...」
我...大嗌？
「好似癲咗咁...不停大嗌...」
好似癲咗咁...大嗌...
「我同綽姿都聽到你嗌咗一段時間...然後...你嘅氣息消失咗...」
我嘅...氣息消失咗？
「當我想行去睇吓你有冇事...你由光學迷彩之間行返出嚟...」
我由光學迷彩之間...行返出嚟...
「你穿過光學迷彩...行返出嚟...但你嘅身上...冇任何精神能量...」
我身上...冇精神能量...
「全身黑色...」
全身...黑色...
「一點紅色粒子...」
一點紅色...粒子...都冇...
「喺你身上感覺唔到氣息...感覺唔到精神能量...身上又冇半點紅色粒子...就好似...」
就好似...普通人...
「當我想再行近你...問你發生咩事之時...你拔出...」
我拔出匕首...
「暗黑嘅面容之中...彷彿望住...遠...」
遠遠...遠遠嘅前方...
就好似...好似等緊...等緊啲...將會發生嘅事...
冇幾耐...
“吱！”就有車聲...由遠處傳嚟...
好幾盞車頭大燈...由馬路...遠處射過嚟...
“吱！吱～”好幾架...好多架...一架又一架解放軍嘅裝甲運兵車駛到過嚟...
圍數六七架裝甲運兵車就喺遠處以半包圍式圍住我...用強力射燈射住我...
同時...裝甲運兵車車尾一一打開...一個又一個著上Full Gear嘅解放軍士兵就由車尾跳出...以半包圍式圍住我...用突擊步槍指住我...
唔止...仲有裝甲運兵車上...都有GAU-8對住我...
好多好多...無數咁多條紅色Laser指住我...但我身上並冇紅點...
每條紅色Laser差唔多射到去我身上之時...就逐漸失消...
然後...就有人開咪：「對面的人！你們屬非法進入！立即舉高雙手！」
我並冇理會到佢哋嘅命令...踏前一步...
「警告！立即停止接近！舉高雙手！否則後果自負！」
我亦都冇理會到佢哋嘅警告...再踏前多一步...
就喺呢個時候...
“啪啪啪啪啪啪啪啪啪！”子彈就喺我正前方180度向住我飛埋嚟！
我可以好清楚咁睇到...無數咁多粒子彈...慢慢咁飛緊...飛緊...飛向我面前...
我可以好輕鬆咁...向左行前一步...避開兩粒子彈...又向右行前兩步...再避開四粒子彈...
左閃...右避...右閃...左避...好輕鬆咁閃避子彈...
好清楚...睇得好清楚...子彈嘅軌跡...
越嚟越多...越嚟越密...無數咁多粒子彈向住我集中飛埋嚟...
已經冇空檔去迴避...就要用...手上把匕首...